ئەمە بڵاوبكەوە
FaceBook  Twitter  

بەشی دووەم*

شەو گەیشتینە گوندی گردەڕەشەی گەورە و بەرەو ماڵی هاوڕێ –ئارام- چووین، دوای پشودان و نان خواردن، -مام عوسمانی- باوكی هاوڕێ –ئارام- ئاگاداری كردین كە ماڵەكەیان لەژێر چاودێری یەكێتی دایە و، گەلێ جار دێنە لام و داوا دەكەن بۆلای –داود و ئارام- بچم و، بۆ شاربییان هێنمەوە و تەسلیم ببنەوە، -مام عوسمان- بەردەوام بوو، ووتی بۆیە ماڵی ئێمە بۆ مانەوەی ئێوە باش نی یە، ئێمەش قسەی –مام عوسمان-مان بە هەند وەرگرت و، خۆمان ئامادەكرد لە ماڵ دەرچووین و، لە رێگای هەولێر- كەركوك پەڕینەوە و، بەرەو گوندی قەتەوی رۆیشتین و، راستەوخۆ چووینە ماڵی –شەهید وەستان محەمەد- ماڵەكەیان لەسەر رێگای هەولێر- مەخمور بوو، هاوڕێ ئەحمەدی كوڕی –شەهید وەستا محەمەد- و ئەكرەم-ی زاوایان لەماڵ بوون، بەخۆشی یەوە پێشوازیان لێكردین و لەلایان ماینەوە، ئەو كاتە قەتەوی گوند بوو، هاتوچۆ و قەڵەبالغی كەم بوو، بەرۆژ هەتاكو بەر لە نوێژی شێوان لەلایەن بووین و، پاشان خۆمان ئامادەكرد و لەماڵ بەرەو –تیمار- بەڕێكەوتین و لاڕێ رۆیشتین، لە نزیك مەعرەزەكانی –ئۆتۆمبیل فرۆشەكان چووین ناو شار و بۆ ماڵی هاوڕێ عەلی مەجید چووین، هاوڕێ –عەلی مەجید- یادی بەخێر لەگەڵ گەیشتنی ئێمە بۆ بەردەم دەگای ماڵەوەیان، دەرگای بەرێكەوت كرەوە و بەبێ دەنگە دەنگ بۆ ژوورەوە چووین، ماڵەكەی هاوڕێ –عەلی مەجید- لەگەڕەكی ئازادی بوو، خانوێكی گەورەو بوو، جێگای تایبەتی بۆ حەوانەوەی پێشمەرگەی هەبوو، ڕێكەوتین بۆ بەیانی لەگەڵ مەلا بانگدان لەماڵ دەربچین و هەریەكەمان بەدوای راپەڕاندنی ئەركەكاندا بچین و، بڕیارماندا بەخێرایی بەرپرسەكانی رێكخستن ببینین و، كارەكانی رێك و پێك بكەینەوە و، ئەركی سەرەكیمان بۆ ماوەی 15 رۆژ دەبێت تەواوی هاوڕێیان هەوڵی كۆكردنەوە پیتاك و یارمەتی بدەن، بۆ ئەوەی بەزووترین كات بۆ هاوڕێیان رەوانەی –بارزان- بكەین، دوایی ماوەی دیاریكراو لەماڵی(مام خاڵۆی شەقڵاوەیی) یەكترمان گرتەوە و، كۆبوونەوەیەكمان سازداو، بەكورتی باسێكی بارودۆخی ناوشارمان كردو، باری رێكخستن و چالاكییەكانمان لە كۆنووس تۆمار كرد، ئینجا ئەو پارەیەی وەكو یارمەتی بۆ حزب لەلایەن هاوڕێیانەوە كۆكرابۆوە، 25 هەزار دینار بوو، پۆستەمان رێكخست و لە رێگای –مام خاڵۆ- درایە – موختاری- گوندی ماولیانی ناوچەی سورچیایەتی و گەیشتە هاوڕێیان و ئاگادار كراینەوە كە یارمەتیەكە گەیشتووە، بەردەوام مانگانە پۆستەمان لەرێگای –كاكە- موختار- رەوانە دەركرد و، بەبێ گیرو گرفت دەگەیشتە دەستی هاوڕێیان، بەم شێوەیە گەیشتینە كۆتایی مانگی كانوونی یەكەمی 1983 و، كۆبوونەوەیەكمان لەماڵی بەڕێز –حاجی حەسەن –ی ئامۆزای هاوڕێ –كۆچەر- گرێداو، پۆستەمان بۆ حزب ئامادە كرد، ئەو هاوكاری و یارمتییەی كۆكرابۆوە 30 هەزار دینار بوو، هاوكاری ئێمەش لەناوشار وەكو پێشمەرگەكانی حزب 10 دینار بوو، كاتێك پارەكەمان ئەژمار دەركرد، هاوڕێ –كۆچەر- ووتی من پێشنیارێكم هەیە، من و هاوڕێ ئارام، جل و بەرگ و پێڵاوەكانمان كۆنن و كەڵكی ناوشاریان نەماوە، بۆیە داوا دەكەم هەر یەكەو 30 دینارمان بۆ خەرج بكەن، بۆ ئەوەی جل و بەرگی پێبكڕین، ئێستاكە حزب جل و بەرگی زستانەی بۆ پێشمەرگەكان كڕیووە، هاوڕێ –ئارام-یش پشتگیری پێشنیارەكەی كرد، لە وەڵامدا ووتم راستە جلەكانتان كەڵكی پێوە نەماوە و، دەبێت جل و بەرگ و پێڵاوی تازە بكڕن، بەڵام با ئەم پێشنیارە لە كۆنوس تۆمار بكەین و چاوەری بكەین شەش حەوت رۆژی تر وەڵامەكەی دێتەوە و رەزامەندی لەسەر دەدرێت و، پارەكەی خەرج دەكەین، بەڵام بەبێ ئاگاداری حزب دروست نی یە، پارەی حزب خەرج بكەین، هەردوو هاوڕێ ووتیان باشە پارەكە خەرج دەكەین و لەكۆنوس دەنووسین 60 دینارمان بەجل و بەرگ و پێڵاو داوە، ووتم من و ئێوەش دەزانین راسترە رەزامەندی خەرجكردنی پارەكە وەرگرین ئەنجا خەرجی بكەین، بەڵام با پێشنیارەكەی ئێوە جێ بەجێ بكەین و، چاوەڕوانی رەخنەی حزب بین...! پۆستەكەمان ئامادەكرد و، هاوڕێ –ئارام—بۆماڵی مام خاڵۆی برد- من و هاوڕێ كۆچەر-یش شوێنی كۆبوونەوەكەمان بەجێهێشت، پاشان ئاگاداری هاوڕێ –كەریم عەزیز ئەبودارا و هاوڕێ –ئەحمەد و شێخۆ- م كرد بە بابەتی خەرج كردنی 60 دینارەكە، هاوڕێ –كەریم عزیز- ووتی دەبوو پارەكە خەرج نەكەن، بەبێ وەرگرتنی رەزامەندی مەكتەبی لێژنەی مەحەلی، هاوڕێ –كەریم عزیز- كادیرێكی دێرینی حزب بوو، ئەندامی لێژنەی مەحەلی بوو، شارەزای ئەم بابەتانە بوو، ووتی منیش دەزانم راستیكەی ئەوەیە كە تۆ باسی دەكەی، بەڵام پێشنیارەكەی هاوڕێیانم جێ بەجێ كردووە، بابەتەكەمان لەكۆنووسی تۆماركردوووە، پاش ماوەیەك وەڵامی كۆنووسەكە هاتەوە، رێنمایی پێویست و تێبینی مەكتەبی مەحەلی تێداهاتبوو، لەكۆتایی وەڵام و رێنماییەكانی مەكتەبی لێژنەی مەحەلی هاتبوو، هاوكاری و یارمەتییەكە گەیشت و جێگای دەستخۆشی و پێزانینمانە، بەڵام نەدەبوو 60 دینار بۆ كڕنی جل و بەرگی هاوڕێیان خەرج بكەن. بەر لەوەی رەزامەندی مەكتەبی مەحەلی وەربگرن، راستە پارەی حزب بۆ هاوڕێیانە و بۆ كاری حزبە، بەڵام دەبێت بە ئاگاداری و بڕیاری حزب بێت، جێگای رەخنەن و داوا كارین لەدوا رۆژدا رەچاوەی ئەم مەسەلەیە بكەن، ئەم وەڵامەی مەكتەبی لێژنەی مەحەلی خرایە بەردیدی هاوڕێیانەوە و، ووت و وێژی دەبارەكراو، هاوڕێیان رایان وابوو كە نەدەبوو تێبینی رەخنەی مەكتەبی مەحەلی لەسەر كۆنووسەكە بنووسرایە، بەڵام ئەوكات و ئێستاكەش وەڵامەكەی مەكتەبی مەحەلی و رەخنەكەی بەراست دەزانم و دەبوو، ئێستاكەش دەبێت لەم جۆرە رەخنانەی وانە و پەند فێربین، وانەی یەكەم و پەندەكە ئەوایە كە كۆكردنەوەی پیتاك و یارمەتی لەلایەن كادیرو ئەندامانی حزب ئەركەو دەبێت جێ بەجێی بكرێت، بەڵام خەرج كردنی پارەی حزب و داهاتەكانی دەبێت بە بڕیاری ناوەندێكی دەسەڵاتداری حزب بێت و، كەس بۆی نییە لەم بابەتە دەربچێت، ئەمەش بۆ ئەوەیە پارە و داهاتی حزب بۆ رێكخراوەكان لەكاتی پێویستدا خەرج بكرێت نەك هەر رێكخراوێك و لێژنەیەك ببێتە خاوەن موڵكایەتی تایبەتی خۆی، داهاتی حزب بۆكاری تایبەتی رێكخراوەكەی خەرج بكات، لەكاتی وادا ئەو رێكخرانەی لە شارە گەورە و بنكەی فراوانی حزب كاردەكەن، باری دارایی باشبێت، بەڵام ئەو رێكخراوانەی حزب كە لادێ و ناوچە هەژار بنشینەكان كاری حزب رادەپەڕێنن، باری دارییان نزم و لەبارودۆخی خراپ دەبێت، بۆیە لەسنووری هەر پارێزگایەك و لیژنە مەحەلیەك پێویستە تەواوی داهات و پارە بۆ لیژنەی سەركردایەتی پارێزگا بگەڕێتەوە، پاشان لیژنەی پارێزگا بەپێی پێویستی هەر لیژنەیەك و رێكخراوێك پارە و یارمەتی دابەش دەكات و، یارمەتی ئەو كادیرانە دەدرێت كە تەنیا كاری حزبی جێ بەجێ دەكەن و، كاری تایبەتییان نییە، هەر بەهەمان شێوە داهات و پارەی زیادەی لیژنە مەحەلیەكان بۆ سەركردایەتی حزب رەوانەدەكرێت، بۆ ئەوەی لەكاتی پێویستدا بۆ كاری حزبی خەرج بكرێت، بەم شێوەیە دەبینین خەرج كردنی داهات و پارەی حزب مافی هیچ رێكخراوێك و كەسێك نییە، بەبێ‌ وەرگرتنی رەزامەندی دەستە حزبیە بەرپرسەكان، ئەو گیانە پەروەردەییە لەناو حزبی ئێمەدا بەردەوام دووپات دەكرایەوە و، بەهیچ جۆرێك پشتگوێ نەدەخرا، ئەوكات لەسەردەمی نهێی و ژێرزەمین و هەبوونی رژێمێكی دیكتاتۆری رەفتار فاشی، ئەرك و مافی ئەندامان و رێكخراوەكانی حزب وابوو، ناوەندێتی لە دیموكراسی باڵادەستربوو، بەڵام ئێستاكە كات و سەردەمێكی ترەو، كاری حزب بەجۆرێكی تر بەڕێوە دەچێت، هەوڵ دەدرێت ئەرك و ماف هاوسەنگ بكرێت و دیموكراتیەتی ناوخۆی حزبمان بەفراوانی دابین بكرێت، لەگەڵ ئەمەشدا دیسان دەبێت داهات و پارەی حزب بە بڕیاری حزب خەرج بكرێت.

دەربارەی شێرە ژنەكە و بارودۆخیان، نامەیەكم ئاراستەی لێژنەی مەحەلی هەولێر و مەڵبەندی هەولێری پێشمەرگەكانی حزب كرد، لەنامەكەدا داوام كردبوو كە پێویستە ئاگاداری خێزانی شێرە ژنەكە و خێزانەكانی تربن و ئازوقەیان بۆ دابین بكەن، لە وەڵامی نامەكەدا مەكتەبی مەحەلی نامەیەكی بۆ ناردم تێدا هاتبوو (بۆ دڵنیابونت، ئاگادارت دەكەین كە بۆ خێزانەكان تەواوی ئازووقەی زستانمان دابین كردوە، هەر لە برنج و شەكر تا دەگاتە خێو لەیموندزی و سماق و سوباو بیور و تەورداس و بەفرمان داونەتێ، و ئاگادارمان كردونە ئەگەر هەر پێداویستیەكیان هەبوو بەچاوان بۆیان مەیسەر دەكەین و بۆ هەر چوار خێزانەكە، ئێمە هەڵوێستی ئەو شێرە ژنەمان لەبەر چاوە، چۆن هەموومانی بێدەنگ كردو، چاومان پڕفرمێسك بوو) ئەوجا وەرە بگەڕێوە بۆ ساڵی 1983 و، رژێمی بەعسی شۆڤێنی و رەفتار فاشی بخەرەوە یاد كە چۆن گەلی كوردمان- قەتل و عام- دەكرد و، لەم بارو دۆخە نالەبارو سەخت و دژوارە، شێرە ژنێكی كوردی یاخی بوو لە دژی رژێمێكی دڕندەی رەفتار فاشی پارونانی منداڵە وردەكانی لەگەڵ پێشمەرگە دابەش دەكات، جا چۆن دوژمنانی گەلەكەمان بەرگەی توڕەیی و راپەڕینی گەلی كوردستان دەگرن، ئێستاكەش لەقۆناغی رۆڵەكانی گەلەكەماندایە بەیەكڕیزی و رێكخستنی تەقەلاكان و یەك گوتاری دوژمنانی گەلی كوردستان راپێچی زبڵدانی مێژوو بكەن.

*لەبەر هەندێك هەڵە لەژمارەی رابردوو جارێكی دیكە بەشی دووەم بڵاودەكەینەوە.

  • 1