ئەمە بڵاوبكەوە
FaceBook  Twitter  

(كریستینا)ی ئازیز من كە ئەم نامەیەت بۆ دەنووسم ئێوارەیە و لە ژورەكەی خۆم دانیشتووم ، ئەو ژوورەی لە باڵەخانەیەكی دوازدە نهۆمیدایە و هی كاربەدەستێكی حكومەتە و هەر بە كرێش داویەتیەوە بە حكومەت، ژوورەكەم بەسەر بازاڕی كۆنەفرۆشاندا دەڕوانێت، دوێنێ بۆ ڕەواندنەوەی خەمی تەنیایی و بێ تۆیی سەردانێكی ئەو بازاڕەم كرد كە ناوی بازاری كۆنەفرۆشانە ، بەڵام ئازیزی من كریسینا، پێت وانەبێت لەو شارەدا تەنها ئەو بازاڕە كۆنە، بەڵكو زۆربەی رووكار و دیاردە و بونیادەكانی شار هێندە كۆن و كرێت دیارن بۆن كروزیان لوتی مرۆڤ دەكروزێنێتەوە‌و هێڵنج بە مرۆڤ دەهێنن و مێشك و ڕوو كاس دەكەن ڕاستە ئەو شارەی من لێی نیشتەجێم دەیان باڵەخانەی بەرز‌و خانووی مۆدێرن و بازاڕی هاوچەرخی لێیە، تاڕادەیەكی باشیش ڕێگا و بان و شەقامەكانی قیرتاو كراون، بەڵام داخەكەم عەقڵیەتی تاكەكان و داب و نەریت و كلتوری كۆمەڵایەتی دانیشتوانی شار لە زۆر ڕووەوە سەر بە چاخەكانی سەدەكانی ڕابردوون و ئایین بەشی زۆر ڕووبەرە كۆمەڵایەتی و كلتورییەكانی مرۆڤەكانی ئەو شارەی داپۆشیوە ، هەڵس و كەوت و پەیوەندەییە كۆمەڵایەتییەكان و نەریت و رێسا و بیركردنەوەی خەڵكەكەی تان و پۆی سەلەفیەتی فیكری و چەق بەستن‌و بونیادە تەقلیدییەكانی كۆن خەفە كراوە، بۆ نموونە رەمەزان كە مانگێكی پیرۆزی موسڵمانانە و لەو مانگەدا باوەڕدار و شوێنكەوتووانی ئیسلام سی ڕۆژ بە رۆژی دەبن، لەو مانگەدا دەبێت بە شێوەیەكی ئیجباری سەرجەم دانیشتوانی شار خۆیان وا بنوێنن كە بەڕۆژوون، بە بڕیاری حكومەت قەدەغەیە هیچ كەسێك لەسەر شەقام و كوچە و كۆڵانەكان و لەبەر چاوی خەڵك جگەرە بكێشێت، یاخود نان و گوڵەبەڕۆژە و هەر جۆرە خواردنێك بخوات، ئەگەر بێت و كەسێت ئەوە بكات وەكو یاساشكێن مامەڵەی لەگەڵ دەكرێت و تاكو رۆژی جەژن و تەواو بوونی مانگی رەمەزان دەخرێتە كونجی زیندان. با لە باسەكەم دەرنەچم و بێمەوە سەر بازاڕی كۆنەفرۆشان، ئازیزم كریستین، زۆربەی فرۆشیارانی ئەو بازاڕە یان پیرەژنی بێوەژن و بێ كەسن یاخود پیاویخانەنشینن كە سێ مانگ جارێك موچەیەكیان دەدرێتی ، روخساری فرۆشیارانی كۆنە فرۆشان تەمی هیلاكی و وەرەزی و مردووی لێ نیشتوە ، هەموویان بەوپەڕی بێزاریی لەبارەی ژیان و گوزەران و كەمدەرامەتی خۆیان قسە دەكەن و رەخنە و گلەیی زۆریان لە حكومەت و حزبەكان هەیە، كەچی ئەو ڕۆژە بینیم بەشی زۆری فرۆشیارە هەژار و كەمدەرامەتەكانی بازاڕی كۆنە فرۆشان لەسەر حزبایەتی بەرببوونە گیانی یەكتری و یەكتریان كەل و كۆم كردبوو هەر دەتگوت جەنگی مەغلوبەیە، بڕوابكە كریستین گیان سێ كەسی هەژار لەسەر حزبایەتی پەتێكی كۆنیان كردبووە ملی هەژارێكی وەكو خۆیان ئەگەر پۆلیس نەگەشتبایە دەیان خنكاند .

 

 

  • 1