ئەمە بڵاوبكەوە
FaceBook  Twitter  

 

 ئەم عینوانەی سەرەوە پرسیارێکە و هەزاران جار دووبارە بۆتەوە، پێم وانیە هاوڕێیەکی حزبی شیوعی هەبێ دەیان جار ئەم پرسیارەی بە ڕوودا نەدرابێ ..!؟

خەڵک مافی خۆیەتی ئەم پرسیارە بکات ، جا چ لەبەرگی نەیارەوە بێ ،یاخود لە ڕووی خەمخۆریەوە بێت..! چونکە ئەوانەی ئەم پرسیارەیان لەلا گەڵاڵە بوە دەیانەوێ بگەن بە وڵامێکی (مقنع) موقنیع. ئایا هەر بەڕاست ئەم حزبە لە ساڵی 1934 ەوە دروست بوە بۆچی جەماوەری نیە یاخود زۆر کەمە ..؟!

لە کاتێکدا تەمەنی لەهەموو حزبەکانی دی زۆرترەو لە لای زۆربەی خەڵکی ئەم وڵاتە ناسراوەو نامۆ نیە ..!

ڕەنگە هەر کەسێک لە خاوەن ئەم پرسیارانە چەندان جار وڵام درابێتنەوە ، بڵام دڵیان بەو وڵامە ساکین نەبوەو پرسیارەکە هەر لە مێشکیدا خولاوەتەوە ..! بەگشتی ئەم پرسیارە تاکوو ئەمڕۆش لای خەڵک هەڵخراوە، ئەمەش دەلالەتە لەوەی خاوەن پرسیار وڵامی دەست نەکەوتوە..! تەنانەت ئەمڕۆ ئەم پرسیارە ئاڕاستەی خودی خۆم کراوە..؟!

ئایا حزبی شیوعی کە دێرینترە لە هەموو حزبەکان بۆچی یەک کورسی هەیەو جەماوەری زۆر کەمە و بەپێی پێویست نیە ..!؟ لێرەوە من دەگەمە ئەو بڕوایەی کە حزبی شیوعی بەدوای وڵامدانەوەی ئەم پرسیارەوە نەبوەو بەهەندی وەر نەگرتوە ..!

چ لە ئاستی ئۆرگانە پەیوەندیدارەکانیەوە کە بواری ڕاگەیاندنی بینراوو بیستراوو نوسراو دەگرێتەوە، چ لە ئاستی ڕێکخستن و کادرەکانی کە لە ناو جەماوەردان.!!

لە کاتێکدا دەبوو بۆ وڵامدانەوەی ئەم پرسیارە و چەند پرسیارێکی دیکە ، حزب بە شێوازی ئەکادیمی وڵام بداتەوە و قەناعەت لای خاوەن پرسیارەکان دروست بکات و پێیان بسەلمێنێ کە حزب بۆچی دەنگ و لایەنگری کەمەو بەپێی پێویست نیە..!

کورد دەڵێ (دووکەڵ بێ ئاگر نابێ...!)

کەواتە ئەم پرسیارە و نەبوونی وڵامێکی بڕوا هێنەر ، دەری دەخات کە بەڵێ حزب حاڵی باش نیەو خەلەلێک هەیە و دەبێ چارەسەر بکرێ ..!

کێشەکەش دەگەڕێتەوە بۆ دۆخی بابەتی لەلایەک و دۆخی خودی لەلایەکی دی ..

ئەوەی پەیوەندی بە دۆخی بابەتیەوە هەیە ئەوەیە کە هۆشیاریەکی چینایەتی لای کومەڵگا بەپێی پێویست وجودی نیە و تاک هەست بە ئەرک و مافی خۆی ناکات و خاوەنداری لە پرسە نیشتیمانیەکان و پرسە چینایەتیەکان ناکات .

لە هەمان کاتدا وڵات لەڕووی گەشەی ئابووریەوە هیچ هەنگاوێکی نەناوەو داهاتی تاک زۆر کەمترە لە خەرجیەکەی، هەروەها لە ڕووی پیشەسازی و کارگەو کشتوکاڵ و سێکتەرەکانی دیدا زۆر لە پاشەو ئەمانەش دەبنە هۆکاری هەژاری لەڕووی مادی و مەعنەوی و هۆشیاری تاک و کۆمەڵگا..!

لێرەدا گرنگە ئاماژە بە وتەیەکی کارڵ مارکس بکەین کە دەڵێ (هەژاری شۆڕش دروست ناکا ، ئەوە هۆشیاری هەژارانە شۆڕش دروست دەکات..!)

بەم شێوەیە دەگەینە ئەو بڕوایەی کە گەشە نەکردنی حزبی شیوعی و کەمی ژمارەی دەنگەکانی پەیوەندی بە نەبوونی یان لاوازی هۆشیاری چینایەتی خەڵکەوە هەیە، بەتایبەتی خەڵکی کرێکارو زەحمەتکێش.. لەلایەکی دیکەوە باری خودی کە مەبەست میکانیزمی کارکردنی حزبی و ئاستی ڕۆشنبیری کادرەکان و خوێندنەوەی قۆناغەکەو بەرنامەکەیەتی ، پێم وایە دەبێ بگەڕێینەوە بۆ قۆناغی تەسقیف زاتی خۆمان و ئاشت بوونەوە لە گەڵ کتێب و خوێندنەوەی کلاسیکیاتی مارکسی و بایەخ دان و گۆڕینی چەندایەتی بۆ چۆنایەتی و تێکەڵاوبوون لە گەڵ چین و توێژەکان و سلوک و بنەما ئاکاریەکانی گیڤارا بکەینە سەرچاوەی کارەکانمان و هۆشیاریەکی چینایەتی لە ناوخۆوە پەرە پێ بدەین و پاشان لەناو جەماوەر ..

گەر دیراسەیەکی قوڵ و زانستیمان بۆ باری زاتی و مەوزوعی کۆمەڵگا کرد و میکانیزمێکی گونجاویشمان هەبێ بۆ تێکەڵاوبوون لەگەڵ هێزە چەپ و مارکسیەکان، ئەوکات دەتوانین وڵامی هەموو پرسیارەکانی خەڵک بە شێوەی بڕوا پێهێنەر بدەینەوە.

بژی سۆشیالیزم ...

 

  • 1