ئەمە بڵاوبكەوە
FaceBook  Twitter  

 

خەلەكا پێنجێ‌ و داویێ‌

چاوان ب نەزانیبوون مرۆڤ دبیتە بەشەك ژ پلانا داگیركەران:

كارێن سیاسی یێن نە ب دیراسە دهێنە ئەنجامدان، مەبەست ئەو كریارێن ب لەز و بەز ژ دایك دبن، ئاراستەیێن وان یێن لەیزوكن، هن جاران تڤیەكا سەرخوەیا بای دێشێت هن كەرستێن ئاراستەیا وان بگوهریت، بێكو خوەدیێن ئەوان كاران هەست بهندێ‌ بكەن، كو ئەو یێ‌ دارێ‌ دپشت پێد خوەرە دبڕن، لبەندا چارەنڤیسەكێ‌ نەدیار و كەفتنەكا موحتەمەلن، هەر وەسا د هن ئەنالیزەیان داژی دێ‌ بینی، یێن كەفتیە دناڤا بەرەیەكێ‌ هەڤدژی پرسگرێكا خوە یا رەوا دە، وی دەمی مرۆڤ چ ب زانیبوون یان نە ب زانیبوون خزمەتا پلانێن داگیركەران دكەت، هن ئەنجام یێن هەین پێش وەخت مرۆڤ دزانیت، میناك ژڤێ‌ چەندێ‌ ڕە، رێكەفتن دگەل نەیاران نە هند كارەكێ‌ ئاسانە، هەستیاریەكا زێدە مەزن ژێرا دڤێت، لێ‌ دگەل ركەبەرێن خوە یێن سیاسی هەمی وەختان نە درەنگە و دەرفەتا دانوستاندن و لێكتێگەهشتنێ‌ هەیە، ناكوكی و نەڤیان د كیژان ئاستدابیت، نابیت دڤی بواری دە مرۆڤ یێ‌ دویری بویەران بیت، چونكە نە تنێ‌ زیان دێ‌ گەهیتە تەڤگەرا مرۆڤی د مەیدانا سیاسی دە، بەلكو پرسگرێكا گەل ب تەمامی دێ‌ كەڤیتە بەر مەترسیێن ناڤچوون و نەمانا ئێكجارەكی، پاشانا ژی هەتا هەتا دێ‌ مرۆڤ وەكە سوجدار هێتە دیتن.

پرسێن هەرێمێ‌ چەند یێن ئالوزبن هەر خەما خەلكێ‌ وێنە:

دڤان سیه سالان دە، تەخێن هەژار و زەحمەتكێش یێن گەلێ‌ مە گەلەك هاتنە ئێشاندن، قوناغێن زێدە سەخت و دژوار دەرباسكرن، هن كەس و ئالی لسەر كیستێ‌ گەل دەولەمەندبوون و بوونە ملیاردێر، دەهان و سەدان كێماسی د بیاڤێن ئازادی یا ڕادەربرینێ‌ و كەیسێن مافێن مرۆڤان دە هاتنە توماركرن، گوڕەپانەكا تەژی تشتێن سەیر و نەچاڤەرێكری بوون، كێشە و گرفت هن هاتنە ئالوزكرن خوەدیێن مالێ‌ بخوەژی مفتەلابوون ژ دیتنێن چارەسەریێن بنگەهین ..! پرسگرێكا هەری مەزن ئەوە دانپێدان ب شاشیان ب عەیب دهێتە دیتن، كار و كریارێن وان چەند یێن خەلەتبن نە ڕەخنێ‌ قەبولدكەن نە خوە ڕاستڤەدكەن و هەر ل بیانوویان دگەرن ..!

ئێش و ئازارێن مە ناهێنە ئینكاركرن، دەسهەلات بخوە ژی ب نەپەنی و شێوازەكێ‌ شەرمنوكانە دانپێدانێ‌ بهندێ‌ دكەت، كو كێشە یێت مەزنن و هەرێم یا راستی كریزێن (سیاسی، ئابوری) یێن جدی بووی، چارەسەری ب ئێك و دوویا ناهێتەكرن، رەۆش پێتڤی شیانێن تەڤانە، گەرەكە هەموو ئالی ملێن خوە بدەنە بەر، كێشە كێشە یا هەمیانە، ئەگەر دەستكەفت كەفتنە بەرگەفێن ناڤچوونێ‌ تنێ‌ حزبێن دەسهەلاتێ‌ یێن زەرەرمەندنابن بەلكو چ كەس و چ ئالی نامینن زیانێن مەزن بەرنەكەڤن، مامەلێن دەمارگیر خزمەتا مە ناكەن ئەم بلا ب هەستیاری تەڤبگەرین و هەموو مەترسیان لبەرچاڤ وەرگرین.

كەسێن مەعنی ب پرسگرێن هەرێمێ‌ خەلكێ‌ هەرێمێ‌ بخوەیە، ئەوان ماف یێ‌ هەی دەسهەلاتێ‌ ڕەخنەكەن و فشارێ‌ بكەنە سەر دەسهەلاتێ‌ ب مەبەستێن هندێ‌ خوە راِستڤەكەت و ریفورمێن بنگەهین پێكبینیت، خەلكێ‌ دن نەیێ‌ مەعنی یە، ئەو تنێ‌ دكارن وەكە فاكتەرەكێ‌ هاریكار پێشنیاران ژبوی چارەسەریێ‌ بدەن، وەكە دن هەر لڤینەكا بهێتەكرن دێ‌ كەڤیتە دچوارچوفێن مایتێكرن و دەستێوەردانان دا، ڕامانا ئەڤێ‌ ژی نە چارەسەریە بەلكو تێكدان و پتر ئالوزكرنا پرسگرێكا یە.

بێگومان نەیا ڕەوایە ئەم كەس و ئالیێن نە عەلەقەدار ڕاكێشینە دناڤا پرسگرێكێن خوە یێن هوندر دە، چاوان ئەم دبێژین ئەم هەرێمەكا نیمجە سەربەخوە دخوازین، كو ئەم بێ‌ هەبوونا فشاران خوە ب ئازادانە ئیدارەكەین، ئەڤە بخوە ژی مافەكێ‌ سرۆشتی یە، ئەڤجا دپشت ئەڤاهە ڕە، ژبوی بەرژوەندێن بەرتەسك هن ئالی كار و كریارێن بەرۆڤاژی ئەڤان پرەنسیبان تێكڤەدانێ‌ بكەن، ئەڤ تێكڤەدانە دێ‌ مالێ‌ لمە دەتە لایەكێ‌، ئەگەر ئەم هشێن خوە نەئینینە سەرێ‌ خوە و زوی لخوە نەزڤرین.

نورمالە ئەم وەكە ئێك هزرنەكەین، د هەموو چەمكێن سەرەكی یێن ژیانێ‌ دە ژی مە جیاوازی د خواندن و نرخاندنێن خوە دە هەبن، بەس لسەر خالێن هەڤبەش و كاركرنا بهەڤرە ئەم نابیت یێن كەمترخەبین، ئەز بێژم هەمی گاڤان ژی دەرفەتێن كارێن هەڤبەش یێت هەین، ئەگەر بەرژوەندێن گشتی لپێشیا مەبن دویف دە یێن حزبی و كەسوكی مە چ گرفت نامینن، ئەگەر ژی بەروڤاژی بەرژوەندێن حزبی و كەسوكی لبەری بەرژوەندێن گشتی بن، د وێ‌ باوەرێ‌ دامە دێ‌ سیتافكا مەژی بیتە كەلەم و دێ‌ لێ‌ هەلنگڤین، ئێدی دێ‌ هەجەت و بیانو هندی دونیایەكێ‌ پەیدابن، هەر جار دێ‌ بدەستێن خوە پروبلێمان بخوە ژبن عەردێ‌ ئینینەدەر، دێ‌ گلەیی و گازندێن خوە بو وان ئالیان ڤەگەرین ئەڤێن لبەر سەرێ‌ مە دگەرن ..!

پێتڤیاتیا دەنگێن نەرازی ب رێكخستن و ئورگانیزەكرنێ‌ هەیە:

بەری ئەم گرنگیا ئەڤی سەبتایتلی بنرخینین، گەرەكە ئەم د سەری دە بزانین نەرازیبوونێن گەل د ئەڤێ‌ قوناغێ‌ دە ل هەرێما مە ب چ ئاوایەكێ‌ نە، ژ سەرهەلدانێ‌ وەرە هەتا ئیرۆ نەرازیبوونان ئەو سنور دەرباسنەكرینە یێن خواستیكا وان گوهرینا سیستەما حوكمرانیێ‌ بیت، نەرازیبوون دناڤ جڤاكێ‌ مەدا ئاستێن جودا جودانە، هن ژ وان نەرازیبوونێن هەیی یێن دەمكینە، واتە یێن گرێدایی كێشەیەكا هەری بچوكن، هەر دەما ئەو خالا نەرازیبوون لسەر هاتیە ئاڤاكرن ژ هولێ‌ هاتە رَاكرن، وی دەمی ئەو كەس و ئالی دوستن و چ پروبلێمێن وان نامینن، ئەڤ نەرازیبوونە چاوان زوی (توڕەدبن، گەرمدبن) وەسا ژی زوی ساردبن و گورەپانێ‌ چولدكەن، شورەش و رێكخستن لسەر ڤان جورە نەرازیبوونان ناهێنە ئاڤاكرن.

نەرازیبوونێن مینا كەلا نیسكێ‌ دسەر خوە دە دچن، تەڤگەرێن پوپولستی د دەرفەتێن هەری كورت دا دشێن یاریا ب هەستێن وان بكەن، پاشان د پروسەیەكێ‌ دە چەند دەرجكەكا پێ‌ سەركەڤن، سەركەفتنا وان ژی یا دوم درێژ نابیت، رەنگە دڤی بواری دە گەلەك میناك ژی هەبن، لسەر ئەڤان بنەمایان هن تەڤگەر ژی هاتنە ئاڤاكرن، پێلێن نەرازیبوونێن شەپرزە متمانە نەدایە تەڤگەرێن پوپولیستی، بەلكو د پرۆسەیەكێ‌ دە هێزێن دەسهەلاتێ‌ سزادان و ئەڤ (√) ب ئاوایەكێ‌ فری بەخشیە تەڤگەرێن پوپولست، پشتی هەلبژارتنان راستە هەژمارێن كورسیێن هن ئالیان كێم و زێدەبوون، لێ‌ د ناڤەرۆكا خوە دە یێن بێ‌ كاریگەری بوون، هێزێن گەرمێن نوی هاتیە پێش لداویێ‌ مینا تەڤگەرێن رەپ و رویت یێن بێ‌ جەماوەر و رێكخستن خوە دناڤ گورەپانێ‌ دە بتنێ‌ دیتن ..!

ژینگەها ئیرۆ ل هەرێما كوردستانێ‌ نەژینگەها پەیدابوونا رێكخستنێن نوی یە، چونكە ل هەرێمێ‌ رێكخستنێن هەیی ب تەڤایی یێت دناڤا كریزێن هەرە دژوار دە دژین، كومەلگەها كوردستانی متمانە ب حزبێن سیاسی نەمایە، ئەڤ خڕڤەبوونێن جەماوەری یێن نها لدۆرێن حزبێن سیاسی دهێنە دیتن، دەربڕێ‌ ژ قەناعەت و باوەریا وان ناكەن، ژبەركو د هەرێما كوردستانێ‌ دە حزب یێن بوویە ژێدەرێ‌ مەعیشەتی، خەلك نەچارە ل دیوانخانێن وان ئامادەبیت، بناغێن دەسهەلات لسەر هاتیە ئاڤاكرن نە یێن كونكریتینە، هەر تم ئیحتمالا كەفتن و شكەستنان دهێتە چاڤەرێكرن، هەر چەندە ئەڤ گوتنە یێن دلئێشن، لێ‌ مخابن كەسابەتا مە دڤان هندە سالێن دویر و درێژ دە بڤی ئاوای هاتیە پلانكرن و ب ڤەرێژێن كرێت و ڕەشبین ئایندە دایە نهانكرن.

هێشتا نە درەنگە .. دەرفەتێن هێژا لپێشیا مەنە .. شیانێن مە وەكە گەل گەلەك یێن مەزنن، ئەگەر ئەم هەموو پێچێبوونێن خوە بكەینە ئێك دەست، باوەرناكەم چ هێزەك هەبیت بشێت خوە لبەر سینگێ‌ مە بگریت، ب هەموو واتەیەكێ‌ ئەم خوەدیێن گەلەكێ‌ زێندینە .. گەلەكێ‌ مرۆڤ دوستین .. گەلەكێ‌ خوەدی وژدانین .. ژ پێكڤە ژیانێ‌ حەزدكەین، دناڤ ئەڤی گەلی دە حەزێن هندێ‌ نینە زوریێ‌ ل كەسەكێ‌ بكەن، ب ڕاستی مرۆڤ ب ئەڤان ساخلەتان زێدە یێ‌ سەربلندە، د دەڤەرێ‌ دا ئەم ملەتەكێ‌ نمونەین میناكێن گەلێ‌ مە گەلەك یێن كێمن، مادەم ئەم خودانێن ئەڤی گەلینە، گەرەكە ئەم یێن بخوە باوەربین، شیانێن مە تێرا هندێ‌ هەنە ئەم پرسگرێكێن خوە یێن هندر چارەسەركەین و پێتڤیاتیا مە ب دەستەكداینا كەسێ‌ نەبیت، تشتێ‌ ئەم گەلەك پێتڤی ئەوە ئەم هەڤدو قەبولكەین و ئێكەتیا خوە چێكەین و ب پڕاكتیك ببینە خوەدیێن گوتارەكا كوردستانی یا ئێكگرتی، هووسان ئەم دێ‌ شێن سەركەڤین و لهەمبەری گەلێ‌ خوە خوەدیێن وژدانە رحەت و تەنابین.

 

  • 1