ئەمە بڵاوبكەوە
FaceBook  Twitter  

خۆشەویستم كریستین، لە میانەی مانەوەم لێرە لە هەرێمی كوردستان دۆست و برادەری زۆرم پەیدا كردووە و هەموویانم خۆش دەوێت و ئەوانیش زۆر ڕێزی من دەگرن ، وەكو گوتم كوردەكان میوان دۆستن لە ئاست غەریبە و بیانی تابڵێی بەڕێز و ویقارەوە هەڵس و كەوت دەكەن، بەڵام دیسان دووبارەی دەكەمەوە لە ناو خۆیان لەگەڵ یەكتری وانین و زۆربەیان بە تایبەتی سیاسییەكانیان رقیان لە یەكتری دەبێتەوە و كەم كەسم بینیوە لە سیاسییەكان دانی خێر بە یەكتری دابنێن و یەكتریان خۆش بوێت.

یەكێك لەو برادەرانەم كوڕێكی گەنج و تا بڵێی روو خۆش و بەڕێزە ئەو منی خۆش دەوێت و منیش ئەوم خۆش دەوێت، بەڵام كوڕەكەی خۆی و بنەماڵەكەی تابڵێی هەژار و نەدارن ، بۆیەش ناوە ناوە هاوكاریم دەكرد و لەرووی ماددی دەستم دەگرت، رۆژێكیان ئەو برادەرەم داوەتی ماڵەكەی خۆی كردم بۆ نان خواردن كۆمەڵێك خواردنی كوردەواری خۆش و بەتامیان بۆ من ئامادە كردبوو، كە نانمان خوارد باوكی برادەرەكەم دوای گفتوگۆیەكی زۆر پێی گوتم (كلارك) من زۆر سوپاسی تۆ دەكەم كە بەردەوام هاوكاری كوڕەكەمان و ئێمە دەكەی و بڕوابكە تۆ نەبوای ئێمە گوزەران و ژیانمان زۆر سەختتر دەبوو ، بەڵام داواكاری و ئامۆژگاریەكم لە تۆ هەیە ئەویش ئەوەیە دەبێت ببیتە موسڵمان و هەر خۆشم فێری نوێژت دەكەم، ئاخر حەیف و مخابن تۆ بچیتە جەهەننەم ! منیش پێم گووت خاڵە تۆ چۆن دەزانیت من دەچمە جەهەننەم ؟ ئەویش لە وەڵامدا گووتی ئاخر بەهەشت تەنها بۆ موسوڵمانانە و سەرجەم ئایندار و بێ باوەڕەكانیش هەموویان جێگەیان ناوەندی جەهەننەمە !! منیش پێم گوت هەزاران دەوڵەمەند لەو شارە هەن ئەی بۆچی بچوكترین هاوكاری ئێوە ناكەن و تۆزێك لە خەم و باری گرانی هەژاریتان كەم بكەنەوە؟ باوكی برادەرەكەم گوتی راستە بەڵام ئەوان برای دینی ئێمەن و هەر ئەوانم پێ لە تۆ باشترە !

كریستینای من، بەڕاستی پێم سەیر بوو پارەكەی منیان كە رەمزی بەریتانی بەسەرەوەیە دەخەنە تەنگەی گیرفانیان كەچی گومان لە باوەڕ و ئیمانی ئێمە دەكەن

كریستینا كوردەكان تابڵێی مرۆڤی باش و بەڕێزن لەگەڵم، بەڵام داخەكەم هەستی عەشیرەتگەری و حزبی و ئایینی و بونیادە لۆكاڵییەكانیان لە هەستی نەتەوەیی بەهێزترە و هەر ئەوەش یەكێكە لە فاكتەرە سەرەكیانەی نەیانتوانیووە ببنە خاوەنی قەوارە و دەوڵەتی سەربەخۆ..

 

 

 

 

  • 1