ئەمە بڵاوبكەوە
FaceBook  Twitter  

 

چالاكڤانێن بەهدینان ئەڤێن چەند مەهان بەری نها ژ بال هێزێن دەزگەهێن ئەولەهیا هەرێمێ‌ ڤە هاتیە بنجاڤگرن، لڤێ‌ داویێ‌ ژی ژ ئالیێ‌ دادگەهێ‌ ڤە شەش سال زیندانی بۆ هاتیەبرین، ئەڤێ‌ چەندێ‌ لسەر ئاستێن جودا جودا ڕەنگڤەدانێن خوە پێكئینان، د دەزگەهێن ڕاگەهاندنی و تورێن سوشیال مەدیایێ‌ دە دەنگڤەدانەكا ئێكجار مەزن دویف خوە دە ئانی، ئێدی ئەڤ یەكە بوویە مژارەكا سەرەكی لجەم ئالیێن سیاسی و پڕانیا پارت و لایەنان گومان دانە پال بریارا دادگەهێ‌، دهەمان دەم داژی ب بریارەكا سیاسی و حزبێ‌ دایە هەژمارتن.

د هەرێما كوردستانێ‌ دە، ئەم هەموو باش دزانین چ تشتەك نەمایە نە هاتیە حزبیكرن، گەلەك جاران رایەدارێن هەر دوو حزبێن سەرەكی ب ئاشكرایی دانپێدانێ‌ بهندێ‌ كریە، كو ل زوما زەر ئێكەتی نكاریت پاقژكەرەكێ‌ دامەزرینیت، هەر وەسا د بەرامبەر داژی ل زوما كەسك پارتی نەشێت ئێك كەس دامەزرینیت، بەرتەسكیا حزبی د هەرێما كوردستانێ‌ دە دڤان ئاستێن هەری مەترسیدار دایە، دەما ل ئێك ژڤان هەر دوو زومان كەسەك دبیتە رێڤەبەر یان دادوەر یان داواكارێ‌ گشتی دناف ڤێ‌ ململانا حزبی یا پاشڤەرۆ دە، چاوان یێ‌ سەربەخوە و بێلایەن بیت ...! ما ئەگەر خەلك بزانیت سەرۆكانیا دەستنیشانكرنا وان بۆ وەرگرتنا پوستان لق و مەلبەندن، كەسێن پوستان وەردگرن نەك تنێ‌ دێ‌ ب فیت و ئیعازێن حزبی گاڤان هاڤێژن، بەلكو مینا كوێلان دێ‌ ب سوپاسی ڤە فەرمانێن وان جیبەجیكەن.

یا رۆهن و بەرچاڤە، كو چالاكڤانێن بەهدینان د بنەكوكا خوەیا جڤاكی دە، هەژمارەكا گەنجێن دەڤەرێن سەر ب پارێزگەها دهۆكێ‌ نە، ژ مالباتێن هەژار و تێكوشەرن، ب شێوازێن جودا جودا بەردەوام دەسهەلاتێ‌ ڕەخنەدكەن، خەلكێ‌ ڕەسەنێن دهۆكێ‌ نە، لسەر ئێش و ئازارێن تەخ و توێژێن جڤاكێ‌ د پتریا خرڤەبوونان دە چ وەكە رۆژنامەڤان چ ژی وەكە چالاكڤان ئەركێن خوە یێن نیشتمانی پێكئانینە، د چ خرڤەبوونەكێ‌ دا ژی بویەرێن نە یاسایی و نەشیاو ژ ئالیێ‌ وان چالاكڤان ڤە نەهاتنە پێش، واتە توند و تیژی ب چ شێوازان نەهاتیە بكارئانین.

كەس نكاریت ئینكاركەت، كو دەسهەلات د درێژاهیا تەمەنێ‌ خوە دە، ل دەڤەرێ‌ سیاسەتەكا قەلس د بیاڤێن ئازادیا ڕادەربرینێ‌ دە پەیرەۆدكەت، لهەمبەری ئەڤێ‌ سیاسەتێ‌ ژی، خەلكەك هەیە د سرشتێ‌ خوە دە، یێن نەرم و رحەتن .. یێن كونسەرڤاتیڤ و موحافزكارن .. یێن دویرن ژ هەلچوون و توڕەبوونان .. یێ‌ موجامل و مرۆڤ دوستن .. یێن ئاشتیخواز و موسالمن، كو هەر تم دخوازن پرسگرێك ب رَێكێن دایەلۆك و دانوستاندنان چارەسەربن.

بەرتەسكی د سیاسەتكرنێ‌ دە كێشەیەكا گەلەك مەزنە، بەردەوامبوون لسەر ئەڤێ‌ زهنیەتێ‌ لەزێ‌ ل ئینانە پێشا ئایندەكێ‌ نیگەتیف دكەتـ، گەلەك یا سەیرە كار بگەهیتە ئەوان ڕادان، لایك و كومێنت ژی بهێنە هەژمارتن وەكە گەفە لسەر ئاسایشا نەتەوی و ب رەنگێن هەمە جۆر حساب بو بهێتەكرن، پشتڕاستبن دورپێجكرنا ئازادیان تەمەنێ‌ دەسهەلاتێ‌ درێژناكەت، تاكە رێكا گرەنتیكرنا كورسیكا دەسهەلاتێ‌ خزمەتكرنە .. خزمەتكرنە .. خزمەتكرنە ..! بزانن ژبلی ڤێ‌ چ رێكێن دن نینە.

ئەڤ كەسێن نها وەكە چالاكڤان ل دەڤەرێن بەهدینان لسەر ئاستێن هەرێمێ‌ ناسناڤێ‌ خوە وەرگرتی، من نەڤێت نرخێن وان كێمكەم، چونكە ئەو برا و ڕومەتا مەنە، بەس من هەست نەكریە ئێك ژوان كەسان نڤیسەرەكێ‌ ب باندۆر بیت .. رەۆشەنبیرەكێ‌ كاریگەر بیت .. سیاسیەكێ‌ خوەدی پرۆژە و ئەلترناتیف بیت .. كەساتیەكێ‌ جڤاكی یێ‌ خوەدی سەنگ بیت .. هەلگرێن باوەرنامێن ئەكادمی و بلند بیت .. یان د ملێن هزری دە مرۆڤێن پێگەهشتی بن .. خوەدی پڕەنسیب و ئایدیولوژیا بن .. ڕەنگە ئەز دڤێ‌ هەلسەنگاندنێ‌ دە یێ‌ شاشبم، لێ‌ دڤان بیاڤان چ كەسەك ژوان نەهاتیە بەرچاڤێن من ..! هەر وەسا من گوهداریا دیدار و گوتن و نڤیسینێن وان ژ نێزیكڤە یێن مێزەكری و بهیستی، تشتەكێ‌ پلانكری من تێدا نەدیتیە، ڕەخنێن وان ژی گەلەك یێن نورمالن و ب زمانەكێ‌ سادە دەربڕین ژ بوچونێن خوە كریە.

ئەڤ چالاكڤانێن مە ئاماژە بوكری، ئەگەر ناڤەرۆكا وان وەكە ئەڤێ‌ بەرگرافا سەری بن، چما دەسهەلاتێ‌ كەیسێن وان بڤی ستایلی زێدە مەزنكرن ..؟ ئەڤ چالاكڤانە بەری بهێنە دەستەسەركرن نە كارێكتەربوون .. نە مرۆڤێن كاریزمابوون، هەتا ب بانگەوازەكا وان خەلك دابەزیتە سەر شەقامان، ب هەموو واتەیەكێ‌ مرۆڤێن نورمال بوون، مەزنكرنا كەیسێن وان بەری هەر كەس و ئالیەكێ‌ زیان گەهاندنە خودێ‌ دەسهەلاتێ‌ بخوە، دەزگەهێن چاڤدێریا لڤینێن تاكێن جڤاكێ‌ دكەن، گەرەكە ب رحەكا نیشتمانی و نەتەوی سەرەدەریێ‌ بكەن، د نڤیسینا ڕاپورتێن خوە دە یێن ب وژدان و مرۆڤ دۆستبن، نابیت وەكە نەیار ژ ڕەخنەگر و تاكێن نەرازی و ئوپوزسیونخواز ڕە مێزەكەن، چونكە ئەو بەشەكێ‌ گرنگێ‌ جڤاكێنە، گەرەكە ب ئاوایەكێ‌ شارستانی مامەلە دگەل دە بهێتەكرن، ئاراستەكرنا مافان و ڕەخنەكرنا شاشیان واتەیا نەڤیان و دژایەتكرنێ‌ ناگەهینیت، نزانم بوچی دەسهەلات ب ئاوایەكێ‌ ڤەكری خوە دڤان مژاران ناگەهینیت.

ئەڤ بویەرە ل دەمەكێ‌ دانە، كو ل هەرێما كوردستانێ‌ دەهان كریزێن (ئابوری، سیاسی، ئەولەهی) هەنە، د گەلەك دەمان دا هەست بهندێ‌ دهێتەكرن، كو مەترسیێن ژناڤبرنا دەستكەفتێن گەلێ‌ مە ل ئارادانە، بەرامبەری وان مەترسیان ژی رێزێن پارت و ئالیێن سیاسی یێن كوردستانی یێن پەرت و بەلاڤن .. گوتارەكا سیاسی یا پارچە پارچەكری ب زەقی دهێتە دیتن .. دەنگویێن چووت ئیدارەبوونێ‌ د ئەوان پەرێن گەرمبوونێ‌ دانە .. دناڤبەرا هەرێمێ‌ و بەغدا ڤەقەتیانەكا نیگەتیف هەیە .. گەفە و ماتێكرنێن توركیا و ئیرانێ‌ هێشت زێدەتر ژ جاران ب پراكتیك جهێ‌ خوە گرتیە، حزبیكرنا چەمكێن نیشتمانی پتر ژ بەری یێت دهێنە بازنەكرن، سەبارەت پێكئینانا چاكسازی و ڕیفۆرمان لسەر عەردێ‌ چ ژ ڕایا گشتیڕە ناهێتە پارڤەكرن ..!

تێكچوونا رەوشا ئابوری یا هەرێمێ‌ و نەدابەشكرنا مووچێن فەرمانبەران، كارتێكرنەكا نیگەتیف یا كریە سەر سایكولوژیەتا تاكێن جڤاكێ‌، د تێكرایا بواران دا گەل یێ‌ نە رحەت و نەرازییە، دەما بەشەك ژ تەخ و توێژێن كومەلگەهێ‌ گازندە و ڕەخنێ‌ دكەن و جار جاران د ئازرن، هەلبەت ئەڤە حالەتەكێ‌ نورمالە و یێ‌ دویرە ژ دیاردێن پیلانگێریێ‌، لهەمبەری ئەڤان لڤینان دەسهەلات نابیت خوە شەپرزەكەت و بیر د ئێشاندن و گرتنا خەلكێ‌ دە بكەت ..!

كێشا هەری مەزن تاكڕەویا پارتێن سەرەكیێن دەسهەلاتێ‌ یە د بیاڤێن حوكمرانیێ‌ دە، دیسان ژی بەردەوام ب ئیسرار دخوازن هەموو چەمكێن ژیانێ‌ داگیركەن و سیستەمێ‌ مۆنوپولەكرنێ‌ پڕاكتیزەكەن، ڕژدیا ئەڤێ‌ سیاسەتێ‌ هوكارێن سەرەكینە پەیوەندیێن حزبێن كوردستانی بكەڤنە دقوناغێن هەری مەترسیدار دە، هەر ئەڤە بخوەیە ژی د بیتە سەردەمێن هندێ‌ بیركرنێن نامۆ د نیڤبەرا ركەبەران دە سەرهەلدەن، ئیرۆ زێدەرتی هەر دەمەكێ‌ دن پێتڤیاتیا مە ب ئێكرێزیێ‌ هەیە، بەسە ئێدی خوە ب مژارێن لاوەكیڤە مژویلنەكەن، چونكە ئاراستەیا حوكمرانیێ‌ ژی ل بەغدا بەرف خواستێن ڤەگەراندنا شوڤینیەتێ‌ یە، هەر وەسا دەولەتێن هەرێمی ژی (توركیا، ئیرانێ‌) ئەجیندایێن وان هەلگرێن سیاسەتا تەوسعێنە، بۆ هندێ‌ رێك لڤان پلانان بهێتەگرتن پێتڤیاتیا مە هەمیان ب هەڤدوو هەیە، رێكا هەبوونا دانوستاندنان د نەقەبا هێز و ئالیێن كوردستانی دە كارەكێ‌ هەری لەزگینە ..!

یا بەرچاڤە دەمێن كەسەك دهێتە گرتن، دێ‌ هێتە دادگەهكرن ژی، ئەنجامێن دادگەهێ‌ چ ئازادكرن بیت یان زیندانكرن بیت، ئەگەر بریارا دادگەهێ‌ یا نیگەتیف بیت ئانكو زیندانكرن بیت، وی دەمی پارێزەرێن زیندانكری دكارن ئەپێلكەن و تانێ‌ ل بریارا دادگەهێ‌ بدەن، هەموو ئالیەكێ‌ خەمخور د ملێن یاسایی دە دشێت ب ئاوایەكێ‌ پوزەتیف ب داینا بەلگە و دكیومەنتان دەستەكێ‌ بدەتە ئەڤی بیاڤی و هەولێن چارەسەریێن یاسایی ڤەبینن.

لدۆر ئەڤێ‌ مژارا نورمال، حزب و ئالیێن سیاسی وەسا ب لەز و بەز بۆ ڕایا گشتی داخویانی و بەیانێن تایبەت وەشاندن، هەر وەكی هەرێم یا بێ‌ گرفت و پرسگرێك، لجها ئەوێ‌ خوە شەپرزەكرنێ‌ بلا پیچەك هەناسەكا درێژتر دابایە خوە و لبەندا ئەنجامێن ئەپێلكرنێ‌ سەكنیبان، نەدخواستە هندێ‌ ئەڤێ‌ مژارێ‌ هندە مەزنكەن و خوە پاڤێژنە بەرپێت دەسهەلاتێ‌، داكو لداویێ‌ دەسهەلات ئازادكرنا وان بخوە هەم بكەتە دەستكەفتەكێ‌ سیاسی، هەم ژی بكەتە منەت لسەر ئەڤان ئالیێن خوە ئالوزاندی، یا دن ژی ئاراستەیا وان یا بنگەهین تەڤلیهەڤكەن ..!

لگور نێرینا من، مەزنكرنا كەیسێ‌ دادگەهەكرنا چالاكڤانێن بەهدینان، هن خالێن نیگەتیف تێدە دهێنە دیتن:

◦ دەسهەلات بخوە ژێدەرێ‌ مەزنكرنا ئەڤی كەیسی یە، هەر ئەو بخوە ژی زەرەرمەندێ‌ سەرەكی یە، ڕەنگە دەسهەلاتێ‌ پتریا دەمێن خوە یێن گەنگەشێ‌ بڤان پرسان ڤە دەرباسكربن، زێدە بالا وێ‌ لسەر ڕیفورمان نەمابیت.

◦ مەزن بەرسڤهاتنا حزب و ئالیێن سیاسی ب داینا داخویانی و بەیانێن تایبەت لسەر ئەڤێ‌ مژارێ‌، ئاراستەیا تێكوشانا خوە بچۆك كر، ژ ئەنجامێن خواستێن مژویلبوونێ‌ ب پرسێن لاوەكی ڤە، پرسێن دیتر یێن گرنگ و چارەنڤیساز بتنێ‌ هێلان.

◦ داخویانیێن سەروكێ‌ هەرێمێ‌ و سەرۆكێ‌ حكومەتێ‌ پتر گومان خستنە سەر نە سەربەخویی و بێلایەنی یا دادگەهان ل هەرێما كوردستانێ‌.

◦ ئەو دوركەفتنا دناڤبەرا هێز و ئالیێن سیاسی دە هەی، زێدەتر نەڤیان و ململانێ‌ كەفتە د نەقەبا وان دە، لجها نێزیكبوونێ‌ خورتر ژینگەها فەقەتیانێ‌ پەیدابوو.

◦ دەسهەلاتێ‌ دڤیا یاریەكێ‌ بكەت بو ترساندنا چالاكڤانان، بەس ئەو یاری خراب ب سەر وان دە شكەست، هەر چەندە د ئەساس دا خواستا دەسهەلاتێ‌ ئازادكرنا وان بوویە، لێ‌ ژبەركو دناڤبەرا مەشهەدێ‌ ئێكێ‌ یێ‌ سیناریویێ‌ و مەشهەدێ‌ دوویێ‌ یێ‌ سیناریویێ‌، بوشایەكێ‌ درێژ جهێ‌ خوە ڤەوژارتبوو، ئالیێن سیاسی ئەو بوشایی ب دەرفەت دیت تەڤلیهەڤیەكێ‌ تێدا چێكەن و سحرا سیناریێ‌ بەتالكەن ..!

◦ بریارا دادگەهێ‌ ب فیتا دەسهەلاتێ‌ و جرە جرا هێز و ئالیێن سیاسی دگەل دا، هەرێم د قادا نیڤ نەتەوی دا زێدەتر كرێتكر.

 

  • 1