ئەمە بڵاوبكەوە
FaceBook  Twitter  

لەڕوانگەی چینایەتییەوە

  ڕۆڵی شیوعییەکانی کوردستان لەدامەزراندنی حزبی شیوعی عێراقەوە دیار و بەرچاو بووە، بەو پێیەی نیشتمان و گەلی کوردستان دابەشکراوە و لێکنراوە بە چوار دەوڵەتی ناوچەکەوە ( ئێران -عێراق-تورکیا-سوریا). باشووری کوردستانی لکێنراو بە دەوڵەتی عێراقەوە وەک هەریەک لەم بەشانەی تری کوردستان خاوەنی هیچ ئازادی و مافێکی نیشمانی و نەتەوەیی خۆی نەبووە، هەربۆیە شیوعییەکان لەڕێگە و لەناو ڕیزەکانی حزبی شیوعی عێراقەوە خەباتیان کردووە کە ئەوکات تاکە حزبی سەرانسەری عێراقی بووە و خەباتی لەپێناو مافەکانی سەرجەم گەلانی عێراق کردووە و دروشمی مافی چارەی خۆنووسینی بۆ گەلی کوردستانی لەساڵی ١٩٤٥دا بەرزکردەوە لەڕۆژنامەی (کفاح الشعب)دا، کە تاکە حزبی عێراقی بووە بڕوای بەسەربەخۆی گەلی کوردستان بووە، بەڕەچاوکردنی تایبەندمەندی نەتەوایەتی و نیشتمانی گەلی کوردستان و ڕۆڵی شیوعیەکانی کوردستان لەخەباتی سیاسی و لەناو حزبی شیوعیدا، (لقی کوردی) لەساڵی ١٩٤٥دا پێکهێناوە، پاشان بووەتە (لقی کوردستان) و مافی دانانی بەرنامە و پەیڕەوی ناوخۆی هەبووە و لەساڵی ١٩٦٦دا یەکەمین کۆنفراسی خۆی بەستووە و لەساڵی ١٩٦٧دا و لەسێیەمین کۆنفراسدا بووە بە (ڕێکخراوی هەرێمی کوردستانی حزبی شیوعی عێراق) و لە ئایاری ١٩٦٩دا یەکەمین کۆنگرەی ئەنجامدا و بەرنامەیەکی نیشتمانی و چینایەتی داڕشتووە، لەسەر ئەو بنەمایەی کە گەل و نیشتمانی کوردستان لەلایەک خەڵک و خاکەکەی بەبێ خواستی خۆیان لکێنراون بەدەوڵەتی عێراقەوە و خاوەنی ئازادی و سەربەستی نەبوون، لەلایەکی ترەوە کوردستان کۆمەڵگەیەکی چینایەتییە و چینی کرێکار و توێژی جووتیاران و ژنان و ڕۆشنبیران تیادا چەوساوەی دەست و سیاسەتی پاشماوەکانی دەرەبەگایەتی و سەرمایەداری تازە دروستبووی ناوخۆی بووە، بۆیە دەبێت حزبێک هەبێت کە نوێنەرایەتی ئەم گەل و چینە ستەمدیدەیە بکات، ئەم حزبە لە مێژووی ٨٧ ساڵی خۆیدا بەپێی پەرەسەندنی قۆناغ و دۆخی سیاسی ڕێکخستن و کاری ڕێکخراوەی بەرەو پێش بردووە و پەرەی پێداوە، بەتایبەت دوای بەرنامەی (تەعریب و تەرحیل و تەبعیس) و سیاسەتی تاوانکارانەی (جینۆساید و ئەنفال و کیمیابارانکردنی خاک و گەلی کوردستان لەلایەن ڕژێمی بەعسی دیکتاتۆرەوە)، کە سەدان هەزار شەهید و برینداری لێکەوتۆتەوە دواجار لە ١٩٩١دا ڕاپەڕینی گەلی کورستان وەرچەرخانێکی گەورەی مێژوویی هێنا لەگەڵ خۆیدا و دۆخی سیاسی و ئابووری و کۆمەڵایەتی کۆمەڵگەی کوردستان و بزووتنەوەی ڕزگاریخوازی گەلی کوردستانی بردە قۆناغێکی ترەوە و لەهەمانکاتدا بوونی جیاوازی چینایەتی و جەور و ستەم و ناعەدالەتی بەرانبەر بەکرێکاران و ڕەنجدەرانی بیروبازوو لەلایەن دەوڵەتی عێراق و لەلایەن لایەنەکانی ناوخۆی کوردستانەوە وایدەخواست کە حزبی شیوعی کوردستان وەکو پێداویستییەکی نیشتمانی و چینایەتی و وەڵامدەرەوە بە پەرەسەندنی دۆخ و قۆناغی سیاسی کوردستان دروست ببێت هەر بۆیە شیوعییەکانی کوردستان لە شاری سلێمانی و لە (کۆنگرەی دووەمی هەرێمی کوردستانی حزبی شیوعی عێراقدا) لە ٣٠/٦/١٩٩٣دا، حزبی شیوعی کوردستانیان ڕاگەیاند و لە (کۆنگرەی پێنجی حزبی شیوعی عێراقدا) پەسند کرا. حزبی شیوعی کوردستانی- عێراق لەو ڕۆژەوە بەردەوامیداوە بە خەبات و تێکۆشان لەهەرێمی کوردستان و عێراقدا لەپێناو ئازادی و یەکسانیدا و گرنگی بەرنامە و خەباتی ئەم حزبە ئەو جیاوازییە سەرەکییەیە لەگەڵ سەرجەم پارت و لایەنە سیاسییەکانی کوردستاندا کە بەرنامە و دروشم و ئامانجەکانی تەنیا لەپێناوی ڕزگاری نیشمانی و مافی نەتەوایەتیدا نییە، بەڵکو ئاڵاهەڵگری(نیشتمانێکی ئازاد و گەلێکی بەختیارە) کە بەدەستێک خەبات بۆ ئازادی و سەربەستی تەواوەتی و یەکجارەکی نیشتمان و گەلەکەی دەکات و بەدەستێکی تری تێکۆشان بۆ یەکسانی و دادپەروەری دەکات دژی چەوسانەوەی چینایەتی و هەوڵدان بۆ ڕزگاری چینی کرێکار و توێژی جووتیاران و ژنان و ڕۆشنبیران کە گیرۆدەی سیاسەتی سەرمایەداری ناوخۆیی کوردستانن، حزبی شیوعی کوردستان پێی وایە کە کۆمەڵگای دیموکراسی دوور لەدیکتاتۆری و لەبەرزترین ئاستی گەشەسەندنیدا ناتوانێ چەوسانەوەی مرۆڤ لەلایەن مرۆڤەوە کۆتایی پێبهێنێ، هەربۆیە وەک بەرنامە و سیاسەتی ستراتیژی خۆی پێداگیری دەکات لە سەر (سۆسیالیزم) بۆ دەربازبوونی مرۆڤ لەچەوسانەوە و نەهێشتنی کۆمەڵگای چینایەتی کە لەدۆخی ئێستای کوردستاندا بەڕوونی دەبینێرت، بە دەیان هەزار مرۆڤ بێکار و کەمدەرامەتن و بەهەزارانی تریش بێخانە و لانەن و ڕۆژبەڕۆژ بۆشایی چینایەتی فراوانتر دەبێت و هەموو هێز و توانای مادی و مەعنەوی کومەڵگەی کوردستان خراوەتە خزمەت توێژێکی مشەخۆرەوە و بەدەیان و سەدان سەرمایەدار خاوەنی ملیارەها دۆلار دەبینی بێ ئەوەی هیج ڕەنجێکان کێشابێت بوونەتە خاوەنی سامان و دەسەڵاتی وڵاتەکە. بۆیە لەم قۆناغەدا ئەرکی شیوعییەکانی کوردستان گرانە و دەبێت ژیرانە و بەهاوسەنگی مامەڵە بکەین لەگەڵ هەردوو ئامانجەکەدا کە پێداویستی قۆناغەکەن تا بتوانێ کاروانی پڕ لەقوربانی و فیداکاری دەیان ساڵی ناو زیندان و شار و شاخ بە دواهەواری ئازادی و یەکسانی بگەیەنێت، چونکە مێژووی دوور و نزیکی لایەنە بۆرجوازییە نەتەوەییەکان و ئیسلامییەکان ئەو ڕاستییەیان سەلماندووە کە ئەوان ڕاستگۆنین لەگەڵ هیچ کامێک لە ئامانجە نیشتمانی و چینایەتییەکان و کەڵەکەکردنی سەرمایەی بێ شوماری تاڵانکارانەیان و پێشێلکاری ڕۆژانەی ئازادییەکان و مافە ئابووری و کۆمەڵایەتییەکانی جەماوەری کوردستان سەلمێنەری ئەو ڕاستیانەن و دەبێت ئێمەی شیوعی و ئازادیخوازان تێکۆشەرانە و بێ سڵەمینەوە، کاراتر بەردەوام بین لە کار و چالاکی سیاسی لەپێناو ( نیشتمانێکی ئازاد و گەلێکی بەختیار)دا.

  • 1