ئەمە بڵاوبكەوە
FaceBook  Twitter  

هەموو ئەوقەیرانە سیاسی و سەربازی و ئابوریانەی كە لەم وڵاتەدا لە گەشە و كەڵكەڵەدان و ڕۆژانە مەرگەسات بەرهەمدەهێنن دەرئەنجامی شكستهێنانی پرۆسەی دەوڵەتداری و سێستەمێكی نامۆیە بە پڕەنسیپەكانی زانستی سیاسی و ئیدارەدانێكی سیاسیانەی باش، چونكە ئەمانە دەیانەوێت قەیران بەقەیران چارەسەربكەن و هەموو ئەو پەشَێوی و نائارامیانەش بەڵگەی بەرچاون و نیەتی دەوڵەتداریەكی سەركەوتووی باشیان نیە ، ئەمەش لە خەسڵەتی فەرمانڕەوایدا مەترسیەكی یەجگار گەورەیە و دەبێتە هۆی لە دەستدانی میسداقیەتی سیاسەت و ڕەنگە پرۆسەكە ئاوەژوو بكاتەوە بەو ئاراستەیەی كە ئێستا لێرە دەبینرێ. لێرە هەنگاونان بە ئاراستەی تاپۆكردنی جومگەكانی حوكمڕانی و قەدەغەكردنی قسە و ڕەخنە لێگرتنی هەڵە و كەمووكورتیەكان بوەتە خاڵی بنەڕەتی بیركردنەوەی ئەو حزبانەی دەسەڵاتیان بەدەستە و وەك مەترسیەكی گەورە ڕەنگی داوەتەوە لە ژیانی هاوڵاتیانی ئەم كۆمەڵگایەدا ، بێگومان ئەمەش هۆكارە بۆ ئەوەی تاكی كورد لە بیركردنەوەی خۆیدا سیاسەت بە درۆیەكی گەورە وێنابكات، ئەم دەسەڵاتدار و سیاسیانەی ئەم كۆمەڵگایە هێندە سەقەت مامەڵەیان بە سیاسەت و حوكمڕانیەوە كردوە ، سیاسەت بوەتە ئەكتێكی قێزەوەن و نەیتوانیوە تاكی كورد لە بوونێكی لاوەكیەوە بگۆڕێت بۆ بونێكی كاریگەر ، چونكە لە دوای نەوەدەكانی سەدەی ڕابردوەوە سیاسەت بە جۆرێك بێ بەهاكرا تا ئەو ئاستەی تاكی كورد متمانەی بە هیچ نەماوە و چاوەڕوانی فەزڵی سیاسیەكانە بۆ ئەوەی بیژێنێت .

ململانێ ناڕەواكانی ئەحزابی فەرمانڕەوا لە سەر بەرژەوەندی تایبەت و دەسكەوتی زیاتر بە هەموو جۆرێك كۆمەڵگای كوردیان ماندوو كردوە، وای لێهاتوە خەڵك تەمەنای گەڕانەوەی بەعس و هەر هێزێكە كە ڕەگ و ڕیشەی ئەمانە لە بن دربێنێ ، ئەم هێزە دەسەڵاتدارانە بونەتە هۆكاری مەترسی لەنێووبردنی ئەزموونەكە و كۆمەڵگایان بە یەكجاری وێران كردوە ، ئەوەندە كاڵفامانە مامەڵە بە سیستەمی حوكمڕانیەوە كراوە تاكی كورد بێ ئومێد و سەر لێشێواو لە خۆی دەڕوانێ و خەون و ئامانجە ڕاستەقینەكەی لێبوەتە مەحاڵ و متمانەی بە هیچ نیە . ئەمە لەكاتێكدایە كە سیاسەت بەرهەمی ئەقڵ و بیركردنەوەیە بۆ ڕێكخستنی پەیوەندییەكانی كۆمەڵگا و وەك بەستەرێك لە فەزایەكی دیموكراتیدا پەیڕەوی لێ دەكرێ نەك پێچەوانەكەی، سیاسەت میتۆدێكە بۆ بەرهەمهێنانی رێچكەیەك بۆ رێكخستنی كۆمەڵگا و وەڵامدەرەوەی پرسیارەكانی خەڵكە لە بارەی دەوڵەتێكی باش كە خزمەتگوزاری و سەرچاوەكانی ژیان تێیدا فەراهەم بكرێت و ناكۆكیەكان نەبنە ڕێگر لە بەردەم پرۆسەی گەشەكردنی كۆمەڵگادا چونكە وەك دەوترێ كۆمەڵگا لە هەناوی خۆیدا بەرژەوەندی جیاواز و بیركردنەوەی جیاوازی هەڵگرتوە ئەمەش بەریەك كەوتن دروست دەكات . بەڵام لەم مەملەكەتە ئەم بەریەككەوتنانە لێكەوتەی ناشرینی وای لێدەكەوێتەوە و سەردەكێشێ بۆ توندوتیژی و بشێوی وا كە ئەقڵ تەسەوری ناكات و دواجاریش هەموو ڕێسەكە دەكاتەوە بە خوری، هەربۆیەشە دەبینی لەكاتی ململانێ سیاسی و ناوخۆییەكاندا ئەمانە هیچ مانایەك بۆسیاسەت ناهێڵنەوە و دەستدەكەن بە شكاندن و تەوهین كردنی یەكتر و تەزویركردن دەبێتە پارسەنگی یەكلاكەرەوەی كێشە و ململانێ كان و، لەپێناو بەرژەوەندی خۆیاندا هەرچیان پێبكرێ دەیكەن و سڵناكەنەوە لەوەی چی دەكەن ، بەڕاستی ئەمە لە جەوهەر و ماهیەتی ئەحزابی فەرمانڕەوا دا پرسێكی یەكجار مەترسیدارە و كەس تێناگات لەوەی ئەمە سەر بۆكوێ دەكێشێ چونكە ئەمانە كەوتوونەتە ئەوپەری و لە بازنەی فەشەلی سیاسەت و دەوڵداری دا بێخەم یاری بە چارەنووسی خەڵكەوە دەكەن و بوونەتە مۆرانەی شێواندنی كۆمەڵگاو پایەكانی سێستەمی حوكمڕانی و هەرچیان پێخۆشبێ دەستی بۆ دەبەن و باكیان بەكەس نیە .

  • 1