ئەمە بڵاوبكەوە
FaceBook  Twitter  

پشكا شەشێ‌ و داویێ‌

خالێن گرنگ یێن هەژی ئاماژەكرنێ‌:

o دڤێ‌ قوناغێ‌ دە گەرەكە هەولێن جدی بهێنەدان ژبوی رێكخستن و ئورگانیزەكرنا ناڤ مالیا كوردستانی، ب مەبەستێن هندێ‌ ئەتموسفەرێن د نیڤبەرا وان دە نورمال ببن، بەرژوەندێن نیشتمانی و گەل بكەڤنە سەر هەموو بەرژوەندێن بەرتەسكێن حزبی، ل هەمبەری پرسێن چارەنڤیساز خوە بكەنە ئێك هەلویست و ئێك گوتار، نەمازە لهەمبەری ئوپەراسیونێن لەشكەری یێن توركیا ل دەڤەرێن باشۆرێ‌ كوردستانێ‌.

o بنگەه و بارەگایێن لەشكەری یێن توركیا پرانی ل جهێن سڤیلن میناك ژی بنگەهێن لەشكەری یێن داگیركەرا ل (ئامێدیێ‌، شێلادزێ‌، بامەرنێ‌، كانیماسێ‌) لڤێ‌ داویێ‌ ژی ل بلنداهی و زنارێن چیایێ‌ كێستە و هرورێ‌، ئەڤ ئاراستەیە یا مەبەستدارە، فەرە جڤاكێ‌ كوردستانی لسەر ئەڤێ‌ چەندێ‌ بێدەنگ نەبیت.

o ئارمانجا توركیا نە لێدانا پەكەكێ‌ یە بەلكو د بنگەه دا داگیركرنا باشورێ‌ كوردستانێ‌ یە، چونكە ئەگەر توركیا راست دبێژیت بلا قەرەقولێن خوە ببەت دانیە بلنداهیێن وان چییان یێن دویر ژ جهێن سڤیل و گوندێن ئاڤەدان، كو سەد ژ سەدێ‌ ل وان جهان تەڤگەرا پەكەكێ‌ لێهەیە، چما وێ‌ ناكەت ئەو یەك جهێ‌ پرسیار و گومانێ‌ یە ؟

o بێدەنگیا نها ل هەرێما كوردستانێ‌ دهێتە دیتن لهەمبەری ئوپەراسیوونێن لەشكەری یێن توركیا، هوكارێن وێ‌ ڤەدگەرن بو ئەڤان چەند خالان: 1) نەهێلان و بەرتەسكرنا بیاڤێن ئازادیا رادەربرینێ‌، باندورا سیاسەتا ترس و توقاندنێ‌ ل دەڤەرێ‌، نەمازە پشتی گرتن و دادگەهكرنا چالاكڤانێن بەهدینان. 2) نەبوونا پەیوەندیان دناڤبەرا هێزو ئالیێن سیاسی یێن كوردستانی دە، دكارین بێژین جورەكێ‌ ڤەقەتیانێ‌ دناڤبەرا وان دە دهێتە هەستپێكرن. 3) سیاسەتا پاوانكرنێ‌ سیاسەتەكا سەردەستە، ژبەر وێ‌ یەكێ‌ دەسهەلاتا دەڤەرێ‌ پەكەكێ‌ پتر توركیا وەكە گەفە و مەترسی لسەر دەڤەرێ‌ دبینیت. 4) بەشێ‌ هەری گرنگ یێ‌ دەسهەلاتێ‌ تەماشەی توركیا ناكەت وەكە هێزەكا داگیركەر، رەنگە پتر پرسا داگیركەریێ‌ دانیتە پال پەكەكێ‌.

o ئەگەر ئەڤ هێزێن لەشكەرێ‌ توركیا ل دەڤەرێ‌ نێشتەجێبن، دێ‌ گەلەك دیاردێن مەترسیدار ل پاش خوە هێلن، ئێك ژوان دیاردێن دهێنە پێشبینیكرن پەیدابوونا سیستەمێ‌ چەتەگەریێ‌ یە ل دەڤەرێ‌، چونكە توركیا ب مەبەست دێ‌ ئەولەهیا دەڤەرێ‌ تێكدەت و دێ‌ ترسێ‌ لدەڤەرێ‌ پەیداكەت، هەڤدەم دگەل ئەڤێ‌ ژی ئیكونومیا خەلكێ‌ د ئاستێن هەری خراب دایە، دویر نینە ئەڤ خالێن لاواز بهێنە بكارئینان و خەلكی راكێشنە بن سیستەمەكێ‌ بڤی شێوەی.

o توركیا د درێژاهیا تەمەنێ‌ خوە سیاسەتا ئینكارێ‌ ددەتە مەشاندن، لجەم وێ‌ نورمالە بێژن (كوردستانا ئیراقێ‌ .. كوردستانا سوریێ‌ .. كوردستانا ئیرانێ‌) لێ‌ نابیت بێژن كوردستانا توركیا، دگەل هندێ‌ دانپێدانێ‌ ب كوردێن خوە ناكەت ناهێلیت كوردێن بەشێن دن ژی ببنە خوەدی دەستكەفت و ماف، نە ئاسانە توركیا دەستان ژ زمانێ‌ چەكی بەردەت.

o حكومەتا توركیا دخوازیت پرسگرێن خوە یێن ناڤخوەیی ببەتە دەرڤەی سنوران، بڤێ‌ رێكێ‌ د پلانا وێ‌ دایە ل هەلژارتنان دەنگدەرێن خوە ب خاپینیت، ئوپەراسیوونێن لەشكەری ل حەفتەنینێ‌ و گارە راستی شكەستن و شەرمزاریێ‌ هاتن، ئەز باوەرم د ئوپەرسیوونا مەتین و ئاڤاشین دە ژی راستی شكەستنێن مەزن بهێن.

o ئەگەر ئەز شاش نەبم، سالا (1995) ێ‌ هێزێن لەشكەری یێن توركیا ب هەماهەنكی دگەل دەسهەلاتا دەڤەرێ‌ ئوپەراسیونەكا بەرفرەه دایە دەستپێكرن، بەرپرسێ‌ هەماهەنگیێ‌ یێ‌ وی سەردەمی د كونگرەكێ‌ رۆژنامەڤانی دە گوت: بەری ئوپەراسیوون بهێتە دەستپێكرن، مە ناڤێن هەموو گوندیان دانە لەشكەری، مە گوتێ‌ هەر كەسەكێ‌ هەوە دیت ناڤێ‌ وی دناڤ ئەڤان لیستان دا بیت، ئەو هەڤالێ‌ مەیە و كەسەكێ‌ سڤیلە، لەشكەری گوت تەمام ئەمێ‌ وێ‌ یەكێ‌ بێكبینین، د گەرماتیا ئەنجامدانا ئوپەراسیوونێ‌ دە ل دەڤەرێن سەرسنكێ‌ سێزدە كەسێن سڤیل گرتن، بەرپرسێ‌ هەماهەنگیا دەڤەرێ‌ گوت: مە پەیوەندی پێكر، كو ئەو كەسێن هەوە گرتی كەسێن سڤیلن باشە هەر نوكە ئازادكەن، ئەوان گوت تەمام ئەمێ‌ سبە وان ئازادكەین، سپێدەیا رۆژا پاشتر كەلەخێن هەر سێزدا ب گوشتی هاتنە دیتن، نە تنێ‌ كوشتبوون بەلكو ئەشكەنجەدابوون و پاشان رەمیكربوون ب گولەیان و ب ئاوایەكێ‌ دروندانە ئەندامێن لەشێ‌ وان ژێڤەكربوون و حەنەكێن خوە ب كەلەخێن وان كربوون، ئەڤ رۆژە گەرەكە چ جاران نەهێنە ژبیركرن.

o توركیا دەما كارەكێ‌ ئەنجام دەت، هزرێ‌ بو فاكتەرێ‌ دەرەكی ژی دكەت، ئەگەر هات و كارڤەدانێن نیڤنەتەوی هاتنە پێكئینان، د ئەنجام دە مژارا دروستبوونا مەترسیان بو ئایندێ‌ توركیا هەست پێهاتەكرن، وی چاخی لجەم توركیا پرسا پاشڤەكێشانێ‌ پرسەكا نورمالە، ئەوێ‌ پاشەكشێ‌ ب شكەستن نا حەسبینیت، واتە دڤێرە دە سیاسەتەكا هێمن و لسەر خوە هەتا رادەكێ‌ دمەشینیت، ئەڤا نها ل باشورێ‌ كوردستانێ‌ دبیت، بەشەكە ل وێ‌ سیاسەتێ‌، هەر ئوپەراسیونەكا ئەنجامدەن هەولدەن هن خالێن دن یێن ئارمانجا وان داگیركرن زێدەكەن، هەلبەت خالێن وان ل جهێن ستراتیجیكن، چێكرنا ئەوان خالان بنەجهكرنەكا هەتا هەتایە نەكو خالێن وەختینە، چونكە دگەل ئەوان خالان هەولێن گوهرینا دیموگرافیێ‌ ژی هەنە، زوردارترین وەلاتێ‌ داگیركەر لگور نێرینا من وەلاتێ‌ توركیا یە، هەتا لدەمێن زاروكینیێ‌ ژی ئەگەر ئێك یێ‌ خرابكار و زێدەروبایە دابێژنێ‌ دێ‌ روینەخار هەی جەندرمێ‌ توركا، نها ئێدی ئەڤ راستیە لجەم هەر تاكەكێ‌ كورد دروستبوویە، توركیا ب ئاشكرایی لهەمبەری گەلێ‌ كورد سیاسەتەكا دوژمنكارانە برێڤەدبەت، گەلەكێ‌ زێدەتری چل ملیونان دخوازیت ژ هولێ‌ راكەت و هەبوناوی ب چ ئاوایان نادەتە پەژراندن.

 

 

  • 1