دلێر كەریم/ ئەبو ڤیان دەنووسێت" دزییەكی ناڕەوا، لەپێناو كارێكی رەوا

لەساڵانی هەشتاكانی سەدەی رابردوو دڕندەیی رژێمی بەعس گەیشتبووە لووتكەو ئەو رژێمە دەستی لەهیچ تاوانێك دەرهەق بەنەتەوەی كوردو گەلانی عێراق نەپاراست. شاڵاوی ئەنفال و كیمیابارانكردنی خەڵكی كوردستان، لەساڵی 1988 بۆ سڕینەوەی كورد بوو لەعێراق، بەڵام ئەم پەلاماردانانە سەرەڕای ترسناكیان چۆكیان بەخەڵك و هێزەكانی پێشمەرگەی كوردستان دانەدا. لەوكاتانەشدا مەفرەزە پارتیزانەكانی حزبی شیوعی كوردستان لەناوچەی گەرمیان درێژەیان بەخەباتی خۆیان دەداو بە پێچەوانەوە ئەوان بوونە هۆی مەترسی بۆپیاوانی رژێمی بەعس. قارەمانێتی و گیانبازی پێشمەرگە پارتیزانەكانی گەرمیان بەهاوكاری دۆست و لایەنگرانی حزب بووە قوتابخانەیەكی نوێی خەبات.  لەڕۆژگارێكدا بەعس شەڕی لەگەڵ سێبەرەكەی خۆیدا دەكرد، پارتیزانەكان رێگای هەندەران و هەڵهاتن لە نیشتیمانیان كردە قوربانی لەپێناو مانەوە لەگەرمیانی سوتماكداو بە بەعسیان گوت" ئێمە لێرەین و مردن هەڵدەبژێرین و سەرتان بۆ دانانەوێنین".

لەوكاتانەدا مەفرەزەی پارتیزانی شەهیدان ئەبوڤیان و ئەحمەد بازۆكە بۆ وێنەگرتن ناچار دەبن دوكانی وێنەگرێك لەناحیەی (صمود) ببڕن و هەندێ كامێراو فیلم ببەن، بۆئەوەی بتوانن وێنەی هاوڕێیانی پێ بگرن و بتوانن ناسنامە دروستبكەن و بەدووربن لە گێچەڵی بەعسییەكان. لەكاتی بڕینی وێنەگرەكەدا نامەیەك جێدێڵن و دەنووسن" ئێمە دز نیمان، ئەم كارە ناڕەوایە دەكەین لەپێناو كارێكی رەوا". لەكۆتاییشدا هاوڕێ ئەبوڤیان دەنووسێت" دزێكی بەوەفا". لە دوای تەنها 16 رۆژ بەسەر ئەم رووداوەدا هەموو ئەو شتانە بۆخاوەن دوكانەكە دەگێڕنەوە، وەك خاوەن دوكانەكەش ئاماژەی پێدەكات ئەوان لەو ماوەدا نازانن چۆن وەڵامی بەعسییەكان بدەنەوە، كە ئەوە چۆن روویداوە. ئاماژە بەوەشدەكات لەكاتی هێنانەوەی شتەكاندا خۆیان وایانزانیوە 14 پارچەیە، كەچی 18 پارچە بووە، بەڵام بەداخەوە لەدوای نزیكەی دوو مانگ شەهیدان ئەبوڤیان و ئەحمەد بازۆكە بەچاوساغی سیخوڕەكانی بەعس و لەهەمان ناحیە دەكەونە بۆسەی بەعسییەكانەوەو ئەبوڤیان شەهید دەبێت و ئەحمەد بازۆكەش بە برینداری دەگیرێت و لەپاشان لەسێدارە دەدرێت، بەبێ ئەوەی ناوی یەك كەس لەهاوڕێیان بێنێت.  لەدوای راپەڕینەكەش رێكخستنی رزگاری سەردانی ئەو خێزانە دەكات و ئەوانیش بۆیان دەردەكەوێت رووداوەكە چۆن دەبێت.

دلێر كەریم/ واز لە پەرلەمان بێنن، بڕۆن پەروەردە چاكبكەن!

 

لەچەند رۆژی رابردوودا دەنگۆی فرۆشتنی پرسیارەكانی قۆناغی ئامادەیی هەرایەكی زۆری نایەوە، لەبەرانبەردا وتەبێژەكەی وەزارەتی پەروەردە وەك ئەوەی خۆی كردبێتی حاشای لەو كردارە قێزەوەنە كردو دەیگووت" شتی وەها نییە. پارلەمانیش لەبری دڵ خەڵك خۆشكردن، خەریكبوو دنیامان لێ بكەن بەدۆزەخ، وەك ئەوەی نەبوونی ئاو و كارەباو مووچەو بەنزین و گاز نەیتوانیبێت بمانخنكێنن!

جەنابی وەزیرو كاكی وتەبێژ، من پێرار لەكۆنتڕۆڵ سەرپەرشتیارم بینی سجلێكی پێبوو نووسیبووی" ئەمە گرنگە بۆهاتنەوەو لەناو پرسیارەكان بوو! هەر ئەوكات نووسینێكم نووسی و رامگەیاند ئەوە سوكایەتییە بەسیستەمی پەروەردە. بەڕێزم كەسێك لەكۆنتڕۆڵ یان لیژنەی نووسینەوەی پرسیارەكان بێت، چۆن دەبێت خەریكی كردنەوەی دەورات بێت و بەپارەی خەیاڵی كوڕی (فەقیرنا) دەوڵەمەندو وەزیرو پەرلەمانتاران فێر بكات؟! ئاخر خۆ من هیچ بەڵگەیەكم پێ نییە، بۆئەوەی بزانم فرۆشتنی پرسیارەكان راستە یان نا، بەڵام دڵنیام راستەو لەكوردستان بەهۆی نەزانی حكومەت و نەبوونی سزاوە هەموو ئەوانەی باس دەكرێن دەكرێت رووبدات. تكایە كۆنگرەتان بەست چیتان لە پرۆگرام كرد؟ دوای دووساڵ لە بێنەو بەردەی پرۆگرام بیرتان كەوتەوە قسەیەكی لەسەر بكەن؟

بۆیە نەك تەنها كابرایەك لە فەیسبووك بڵێ پرسیارەكانم وەرگرت بكەونە خۆتان، دەبێت لەكاتێكدا وڵات ئارامیش بێت و كەس باسی قۆپیەو فرۆشتنی پرسیارەكانیش نەكات، دەبێت لێكۆڵینەوە بكەن. شوورەییە نەتوانن باندەكانی قاچاغچێتی دەستگیربكەن و بیاندەنە دادگا، چەندینجار بیر لەقسەكەی "چەرچڵ" دەكەمەوە كە دەڵێت" لەدوای جەنگی جیهانییەوە تەنها بە باشكردنی پەروەردەو دادگاكان دەتوانین بریتانیا بنیات بنێینەوە، بۆیە لەوێوە دەست پێبكەن.

تكایە وازبێنن لەحكومەت، لەپارلەمان، ئاخر كە پەروەردەی سەقەت كەسی سەقەت نەنێرێتە ئەو شوێنە بۆ ئەو شوێنانە دەبنە بنكەیەكی ئارام بۆگەندەڵی و ململانێی حزبایەتی؟! ئێوە لەوەزارەت و وەزیرەكان گەڕێن، وەرن تاكی تەندروست و دڵسۆز بەخاك و نیشتیمان و ژینگەو خەڵك پەروەردە بكەن، ئەوكات هەموو جومگەكانی وڵات باش دەبێت. ئەوكاتە پێویستمان بەوە نییە ئەمە لەحزبی فڵانە، یان لە فیسار، گرنگ ئەوەیە نابێتە كۆیلەی هیچ هێزێك و بە ئازادانەو دڵسۆزانە كاری خۆی رایی دەكات. تكایە پشت بەكۆمسیۆن مەبەستن بۆ هەڵبژاردنەكان، تاكی بەویژدان و دڵسۆزی گەلمان دەوێت، هەزار چاودێر دابنرێت دەتوانێت گەندەڵی بكات، دەتوانێت دەنگی زیاد بنووسێت، بەڵام كە پەروەردەت كرد خۆی دەبێت چاودێری خۆی و لێ مەترسە.

رەخنە لەمامۆستاو دكتۆر و ئەندازیارەكانت مەگرە، بڕۆ لە پەروەردەو باخچەی ساوایانەوە فێریان بكە مرۆڤایەتی پێویستی بەچییە، نەك بیخەیتە ئەستۆی سەردەمەكە! تكایە هەموو رەخنەیەك قبووڵ بكەن، وەرنە خوارەوەو گوێ لەو كەسانەش بگرن قسەیان پێیە، نەك هەمووان بەدوژمنی خۆتان بزانن.

واز لەپارلەمان بێن، با هەر شەڕە كورسی بكەن تا نەوەیەك پەروەردە دەكەن دەزانن دەنگ بەكێ دەدەن و دەزانن خەڵك و هاونیشتمانیان پێویستیان بەچییە، ئەوكاتە نابێتە كۆیلەی هیچ حزب و هێزێك و ئازادانە بیردەكاتەوەو بڕیار دەدات.