گوڵان سه‌لیم/ داعش دژی مه‌عریفه‌و دوژمنی به‌ها مرۆییه‌كان

 ئیسلامیه‌ توندڕه‌وه‌كان هه‌موو مه‌عریفه‌و ئه‌زمونه‌ مرۆیبه‌كان به‌ كه‌م به‌هاو سوك سه‌یر ده‌كه‌ن، دژی دیموكراسیه‌ت ده‌وه‌ستنه‌وه‌ پێیان وایه‌ دیموكراسیه‌ت زه‌وتكردن و ته‌حه‌دای مافی خودایه‌ له‌كاتێكدا دیموكراسیه‌ت رێ به‌هه‌موان ده‌دات بونیان هه‌بێت و كه‌شی گفتوگۆو ئازادی راده‌ربڕین ده‌خولقێنێ و تاكه‌ رێگه‌ی پێكه‌وه‌ ژیانی مرۆڤه‌كانه‌ له‌گه‌ڵ یه‌كتری، چه‌تری گردكردنه‌وه‌ی ئاینه‌ جیاوازو كلتوره‌ جیاوازه‌كان و بیرو بۆچونه‌ جیاوازه‌كانه‌، دژی چه‌مكی حاكمیه‌تی ره‌هاو تاكڕه‌ویه‌ له‌گه‌ڵ مه‌سه‌له‌ هاوبه‌شه‌كان ته‌باو گونجاون.

داعش په‌یڕه‌وی حاكمیه‌تی ره‌ها ده‌كات، به‌بێ تێڕامان و ووردبونه‌وه‌ بێ ره‌چاوكردنی پیرۆزی مرۆڤ، كه‌ جێنشینی خودایه‌، بێ هیچ لێكدانه‌وه‌و راڤه‌كردنێك، دوور له‌ژیری و به‌شداری كردنی هزر راسته‌وخۆ قورئان به‌مه‌زه‌نده‌ی دژه‌ مرۆیی خۆیان وه‌ك فه‌رمانێك وه‌ری ده‌گرن و وه‌ك سه‌ربازیك جێبه‌جێی ده‌كه‌ن، بێ ئه‌وه‌ی هیچ بیردۆزیه‌ك بهێڵنه‌وه‌، چه‌ته‌كانی داعش رێك به‌م ستراتیژه‌ به‌م ئایده‌لۆژیاو قه‌ناعه‌ته‌وه‌ په‌لاماری (شه‌نگال) یاندا وه‌ك ره‌وه‌ گورگ به‌ربوونه‌ گیانی ئێزیدیه‌كان كه‌ كوردی ره‌سه‌نن و به‌درێژایی هێرش و په‌لاماره‌كانی دوژمنان و داگیركه‌ران ئایین و كلتورو گه‌وهه‌ری خۆیان پاراستووه‌، جینۆسایدی شه‌نگال په‌ڵه‌یه‌كی ره‌شه‌ به‌ ته‌وێڵی ئیسلامیه‌ توندڕه‌وه‌كان شه‌رمه‌زاریشه‌ بۆ ئه‌وانه‌ی چاویان له‌ئاست ئه‌م په‌لاماره‌ به‌ربه‌ریه‌ نوقاند، كاره‌ساتی شه‌نگال جگه‌ له‌وه‌ی كاره‌ساتێكی گه‌وره‌ی نه‌ته‌وه‌یی بوو زه‌مینه ‌سازییه‌كی یه‌‌كێتی نه‌ته‌وه‌یش بوو، ئێزیدیه‌ ئاواره‌كانی شه‌نگال له‌خانكێ له‌دیمانه‌یه‌كدا ئاوایان گێڕایه‌وه‌:-

به‌سیمایه‌كی شێواو، له‌بارێكی ده‌روونی ناجێگیر، به‌ده‌م هه‌نسكی گریان، ئافره‌تێك گووتی: نازانم خه‌ون بوو یان راستی؟ دڕنده‌بوون یان مرۆڤ؟ په‌لاماریان داین، پیاوه‌كانیان گوله‌ باران كردین، كچ و منداڵه‌كانیان بردین.

یه‌كێكی دی به‌هه‌ردوو ده‌ستی پرچی خۆی ده‌ڕنیه‌وه‌ هاواری ده‌كرد: پێشمه‌رگه‌ ئێمه‌ی به‌ته‌نێ جێهێشت، بێ كه‌س و پشت و په‌نا ماینه‌وه‌ به‌رده‌ستی ئه‌وان چه‌تان، ماڵی مه‌ خرابوو.

ژنێكی به‌ته‌مه‌نی چوارشانه‌ به‌چاوی گریانه‌وه‌ گوتی: چوار منداڵی ئێمه‌یان بردووه‌ به‌ زۆر داوایان لێ ده‌كه‌ن ببنه‌ موسڵمان، ئه‌گه‌ر نه‌بن، ئه‌وا گوله‌بارانیان ده‌كه‌ن، خوا ئه‌وه‌ قبول نه‌كات.

به‌ده‌نگێكی نوساوو پڕ حه‌سره‌ت ژنه‌ چاو شینه‌ سورو سپیه‌كه‌ گووتی: منداڵه‌كانمان خڕ له‌به‌رده‌ستی داعشن، نازانم چیان به‌سه‌ر دێت؟

منداڵێكی پێداویستی تایبه‌ت (نوقسان) له‌گه‌ڵیانه‌ ده‌بێ ئێستا چی بكات؟ كێ خزمه‌تی بكات؟ پێویسته‌ حكومه‌تی هه‌رێم و نه‌ته‌وه‌ یه‌كگرتووه‌كان رێگا چاره‌یه‌كمان بۆ بدۆزنه‌وه‌، منداڵه‌كانمان بهێنێته‌وه‌.

ئه‌و ژنه‌ی قوڵایی چاوه‌كانی وه‌ك ئاگردان كڵپه‌ی سه‌ندبوو، هاواری كردوو چاوه‌كانی بریسكه‌ی خه‌مێكی قوڵی لێ هه‌ستاو گووتی: ماڵی ئێمه‌یان هه‌موو برد (13) نه‌فه‌رن، هه‌واڵ هه‌یه‌ هه‌موویان گوله‌ باران كردوون، ماڵی بابی ئێمه‌ش هه‌موویان له‌ده‌ست داعشن، زۆریان لێده‌كه‌ن ببنه‌ موسڵمان، ده‌نا ده‌یان كوژن، كچ و منداڵه‌كانیان شوێن بزر كردووه‌، نازانین بۆ كوێیان بردوون.

ئه‌و ژنه‌ی برینێكی قوڵ له‌ناخیدا بوو گووتی: ناتوانم قسه‌ بكه‌م به‌ده‌م گریانه‌وه‌ له‌هۆش خۆی چوو..

ئه‌مانه‌ دڵۆپێكن له‌ده‌ریای تاوانه‌كانی داعش، رووداو و به‌سه‌رهاتێكی زۆری پڕ تراژیدیا له‌سه‌رده‌ستی گورگه‌ هاره‌كانی ( ده‌وڵه‌تی ئیسلامی) روویداوه‌ بیرو هۆش له‌ئاستیدا ده‌وه‌ستێ ئاژه‌ڵه‌ كیویه‌كانیش ئه‌نجامی ناده‌ن.

 

تیبینی :ئه‌م ریپۆرتاژه‌ هه‌فته‌یه‌ك دوای كاره‌ساته‌كه‌ی (شنگال) ئاماده‌كراوه‌، هه‌ر به‌بۆنه‌ی ئه‌م تراژیدیایه‌ بۆ یه‌كه‌م جاره‌ بڵاودەبێتەوە