شه‌پۆل فه‌تحی كه‌ریم/ روو له‌ خه‌ڵك، پشت له‌ده‌سه‌ڵات

به‌رپرسیارانه‌ مامه‌ڵه‌ كردن بۆ به‌ده‌ستهێنانی مافه‌ نیشتمانی و چینایه‌تیه‌كان ئه‌ركێكی مێژوویی گرنگی هه‌ر تاكێكه‌ په‌یڕه‌وی بكات دوور له‌ به‌رژه‌وه‌ندی تایبه‌تی و حزبایه‌تی، مێژوویه‌كه‌ قوربانی و خوێن پێشكه‌شی كوردستان ده‌كه‌ین، له‌قۆناغه‌ جیاجیاكان له‌پێناوی كوردستانێكی سه‌ربه‌خۆی خاوه‌ن قه‌وه‌ره‌و ئاڵا گیانی خۆمان به‌خت ده‌كه‌ین.

پاوانخوازی، قورخاكاری، شه‌ڕه ‌په‌ڕۆ، دوواكه‌وتنی كوێرانه‌ ئێمه‌ی به‌و ده‌رئه‌نجامه‌ گه‌یاند له‌ژێر دروشمی نیشتمانی و كوردستانی له‌وڵاتی خۆت نامۆو بێ نان و برسی و ناسه‌قامگیربی و ژیانت لێ بكه‌نه‌ ژه‌هری مارو خۆزگه‌ به‌ رابردوو بخوازی.

به‌تاڵان بردن و برسی كردنی خه‌ڵك له‌ژێر دروشمی بریقه‌دارو فریودانی جه‌ماوه‌ر له‌ژێر ئاڵای كوردایه‌تی، راوو ڕووت و گه‌نده‌ڵی و دزینی قوتی خه‌ڵك به‌رۆژی روناك، كاره‌ساته‌ گه‌وره‌كه‌یه‌.

كاراكته‌رو سه‌ركرده‌و كادری گوێ له‌مست و ته‌شیرێسی ئه‌م حزبه‌ ده‌سه‌ڵاتدارانه‌ وه‌ك گه‌نه‌ جه‌سته‌و خوێنی ئه‌م خه‌ڵكه‌ به‌شمه‌ینه‌ته‌ ده‌مژن و به‌راست و چه‌پ ئاگری فیتنه‌و ئاژاوه‌و خۆشده‌كه‌ن بۆ ئه‌وه‌ی له‌ئاوی لێڵدا راو بكه‌ن و خێریان له‌و ململانێ و كێشانه‌دایه‌و سنگ ره‌پێش ده‌كه‌ن تا قسه‌ی نابه‌جێ و ژه‌هر رشتن هه‌بێ قسه‌یه‌كی خێر ناكه‌ن و بۆ ئه‌وه‌ی ( گه‌نده‌ڵیه‌كانیان) حه‌ڵال بكه‌ن و پێگه‌و پایه‌یان له‌ناو حزبه‌كانیان قایمتر و ورگنترو باخه‌ڵیان پڕتر بێت.

ئه‌مانه‌ كاراكته‌ری سه‌ره‌كی و پێكهاته‌ی راسته‌قینه‌ی ئه‌م حزبانه‌ن تا خاوه‌نی ئه‌م (زورنا ژه‌نانه‌) بین و چاوساغ و راوێژكاری حزبه‌كانیان بن" له‌و ده‌رئه‌نجامه‌ باشتر نادوورینه‌وه‌و له‌گێژه‌نێكی داخراوی مه‌رگهێنی وه‌ك ( ئیجه‌) ده‌سوڕێینه‌وه‌.

تۆڕێكی فراوانی مشه‌خۆرو گه‌نده‌ڵ و پاشه‌ڵ پێش و هه‌ڵپه‌رست ئه‌و حزبانه‌یان ته‌نیوه‌، جالجالۆكه‌ ئاسا به‌دووای نێچیر ده‌گه‌ڕێن و هیچ شتێك لێیان ده‌ربازی نابێت، ئه‌وان خه‌ریكی گه‌نده‌ڵی و دزی و راوه‌ڕووت و هه‌ڵگیرساندنی ئاگری فیتنه‌و ئاڵۆزكردنی دۆخه‌كه‌و قایمكردنی پێگه‌ی خۆیانن، فاكته‌ری سه‌ره‌كی قوڵكردنه‌وه‌ی قه‌یرانه‌كانن.

حزبی له‌و چه‌شنه‌، موڵگه‌ی پاشه‌ڵ پیس و مشه‌خۆرو گه‌نده‌ڵ و تاڵانچی له‌وه‌ زیاتر چی لێ چاوه‌ڕوان ده‌كرێت؟ ئه‌وان پارووی ده‌می منداڵانی شه‌هیدان و ئه‌نفالكراوان و پێشمه‌رگه‌ و به‌شمه‌ینه‌تان ده‌دزن، سه‌نگه‌رو باوه‌ڕو ئه‌خلاق و مێژووی خۆیان ده‌فرۆشن، ئاسایی یه‌ نیشتمانیش هه‌راج كه‌ن، ئه‌وان لێبونه‌ته‌وه‌، باكیان به‌هیچ نییه‌‌، زۆریان بۆ بێت ( به ‌شانازیه‌وه‌) ده‌ستی داگیركه‌ران ده‌گرن و هه‌ڕه‌شه‌ی پێ ده‌كه‌ن و هه‌موو ره‌وشت و به‌هایه‌ك وه‌لاده‌نێن، .

پێویسته‌ كاردانه‌وه‌ی دوور له‌ عه‌قل و مه‌نتیقیمان نه‌بێت و به‌ره‌فتاری دزێوو نابه‌رپرسانه‌ی ده‌سه‌ڵات نه‌كه‌ین، خێریان له‌برسی كردنی خه‌ڵك و ئاژاوه‌و شه‌ڕدایه‌، با زوڵم و سته‌می ئه‌وان به‌رچاومان تاریك نه‌كات، با زه‌مینه‌ سازی بكه‌ین، بێ جیاوازی له‌ده‌وری یه‌ك كۆبینه‌وه‌، ووزه و تواناكانمان یه‌كخه‌ین، ستراتیژو به‌رنامه‌یه‌كی روونمان هه‌بێت خۆمان رێكخه‌ین، سه‌ره‌ڕای جیاوازی بیروبۆچوون بۆ به‌رژه‌وه‌ندی گشتی هه‌ڵوێست و ره‌فتار بنوێنین، ده‌سه‌ڵات جگه‌ له‌ به‌رژه‌وه‌ندی خۆیان و پاراستنی ئه‌جیندای داگیركه‌ران باكیان به‌ باروو گوزه‌رانی هاووڵاتیان نییه‌، شوره‌یی یه‌ خه‌ڵك دووای ئه‌م ده‌سه‌ڵاته‌ بكه‌وێ و به‌ ده‌هۆڵی ئه‌وان هه‌ڵپه‌ڕێ، به‌واده‌و به‌ڵێنه‌كاینان باوه‌ڕ بكات، به‌سه‌ كویله‌ی حزبه‌كان بین، با به‌ راستگۆیی و راشكاوی خه‌مخۆرو دڵسۆزی ستراتیژی نه‌ته‌وه‌ییمان و پێشمه‌رگه‌ی به‌وه‌فای گه‌لی كوردستان و نیشتمان بین.

شەپۆل فەتحی/ گەمە دۆڕاوەكان

ململانێی حزبی، بەرژوەندی تەسك، لەسەر سەرۆكایەتی هەرێم و دەسەڵات، دۆخەكەی خستە بارێكی ترسناك و ماهیەت و ناوەڕۆكی (5) حزبەكەی كردە بوخچەیەكی كراوە، هەگبەكانیانی خاڵی كردەوە لەمەبەست و ئامانجە شاراوەكانیان" ئەوان پۆست و دەسەڵات و دەسكەوتە حزبیەكانیان پێ گرنگترە لەبەرژەوەندی خەڵك بەرژەوەندی نیشتمان، ستراتیژی نەتەوایەتی.. هەریەكەیان لەژێر دروشمی چاكسازی و ببڕكردنی گەندەڵی، كە لە راستیدا مەرامی حزبیان لەپشتەوەیە. خەڵك چەواشە دەكەن و دەیانەوێت ئەجێنداو بەرنامەی تەسكی حزبەكەیان جێبەجێ بكەن.                  

سووربونی (پارتی) لەسەر مانەوەی كاك مەسعود تا دوو ساڵی تر مانایەكی نییە، نە لەبەرژەوەندی پارتیدایە، نە قامەتی باڵای كاك (مەسعود بارزانی) ی پێ بڵند دەبێت بە پێچەوانەوە بچوككردنەوەی مێژوو كەسایەتی كاك مەسعود بۆ ئەو ئاستە كارێكی نەشیاو و نەگونجاو و بێ مانایە تۆ بڵێی راوێژكارەكانی و دڵسۆزانی ئەم راستیە نەزانن.                                

لەم قۆناغە هەستیارە سێ سەركردەی شایستە هەن كە بە قۆناغی سەختی تێكۆشانی پڕ هەورازو نشێو تێپەربوون ژیان تەزكیەیان دەكات و ئەوان بەهەڵبژاردن و ململانێی نادروست و بێ مانا ئەو كەسایەتیە كارێزمایەیان بۆ دروست نەبووە، بەڵكو خەبات و شەونخونی و تێكۆشانی بێ وچان و وێستگە سەختەكانی تێكۆشان بە سروشتی دروست بوون.                          

تا ئێرە گەنجی و جوانی و تەواوی تەمەنی خۆیان بەخشیوە بە خاك و نەتەوە ئەوانیش بەرێزان ( مام جەلال، ئۆجەلان، مەسعود بارزانین) نەك هەر بۆ سەرۆكی حزب، شایستەی ئەوەن رابەری بزتنەوەی رزگاریخوازی گەلی كوردستان بن هەریەك لە (مام جەلال و ئۆجەلان) دۆخەكەیان دیارە، لەم قۆناغە مەسعود بارزانی شیاوی ئەو شوێنەیە، مەخابن نەخۆی و نە حزبەكەی ئەو زەمینەیان نەرەخساند، بەرژەوەندی تەسك و پایەندبوون بە بەرنامەو سیاسەتی حزب و چوونە ناو ململانێی تاقەت پڕوكێنی بێ بەرهەم ئەم بژاردەیەی دوورخستنەوە هاوكات چونە ناو شەڕی لابەلاو لاوەكی ئەركە نەتەوەییەكەی قەتیس كرد لە (بەرژەوەندی حزبی) بەدرێژایی مێژوو هۆكاری شكستەكان و بەردەوامی جولانەوەی دۆزی كورد لەبازنەیەكی داخراودا پەرت و بڵاوی و ململانێی لاوەكی و بەرژوەندیخوازی كە بۆتە هۆی ( فرە كوێخایی) و پەرت و بڵاوی گەلەكەمان لەئاست مەسەلە هاوبەشەكانمان، هەتا بەو عەقلیەتە تەسك و ناوچەگەری و خێڵەكیە مامەڵە لەسەر پرسە نیشتمانی و نەتەوەییەكان بكەین، حاڵمان لەوە چاكتر نابێـت، ئەوانەیش سەرچاوەی قوڵكردنەوەی بارگرژی و قەیرانەكانن،‌ بێشك وەك ئەوانی دی كه ‌سەرچاوەی كێشەكانن بەرپرسیارێتی مێژووییان لەئەستۆیە و هیچ جیاوازیەكیان نییە، حیكمەتی حزبی سیاسی كە خۆی بە بەرپرسیار بزانیت نابێ بێ دەربە‌ستانە مامەڵە بكات، بەقەد ئەوەندەی دەبێت لە هۆشیاری و دەرك كردن بە بەرپرسیارێتی ژیرانە مامەڵە بكاو كاردانەوەی نەرێنی نەبێت بە پێچەوانەوەی (5) حزبەكە تێكڕا نا بەرپرسیارانەو دوور لە پرنسیپ و بەها نیشتمانی و ئەخلاقیەكان مامەڵە دەكەن و بونەتە (بار) بەسەر شانی خەڵكەوە ئەوان بە بیانوی بەرژوەندییەكانی خەڵك دەیانەوێت خۆل بكەنە چاوی خەڵك و هەریەكەیان وەكو ئەوی تر، كە لقی قەدێكن، خوێنی خەڵك دەمژن لەسەر ئێسك و پروسكیان باڵەخانەی دەسەڵاتە (بێ دەسەڵاتەكەیان) بنیات بنێن كە لەلایەن هێزە دەرەكیە‌‌كان ووزەو ئیعاز‌ وەردەگرن، پێ دەچێ هیچ ئەزمونێكیان لەوانە تاڵەكانی رابردوو وەرنەگرتبێ.