ئەم هەواڵە بڵاوبكەوە
FaceBook  Twitter  

عەبدوڵڵا پۆڵا/ ئێستا لەهەولێر هەموو پرتەقاڵی دەخۆن

ساڵی 1987 بۆ بارەگاكانی پێشمەرگە لەدۆڵی بالیسان گەڕاینەوە، تەپوتۆزی تێكدان و كاولكردنی گوندەكان دەستی پیكردبوو، عەلی كیمیاوی گۆڕبەگۆڕ فەرماندەی هێزەكانی باكوری تازە وەرگرتبوو، دەستی بەشواربی داهێنا گوتی" تۆوی پیشمەرگە ناهێڵم"، ئێستاش نەوەكانی سەدام و عەلی كیمیاوی وازیان لەو دڕندایەتییە هەر نەهێناوە. وێنەی ئەو كۆمەڵە كیژوكارەم لەبیرە كەوا لە بەهاری تەمەنیان بۆتۆلكەو كاردی و كەنگر لەبناری چیای قەرەچوغ ساڵی 1987 دەرچووبوون، دوای ئەوەی چەند فڕۆكەیەكی كۆپتەر لەسەر سەریان دەنیشێتەوەو یەكێك لەكچۆڵەكان مێشكی دەپڕژێ، هەر ئەو فڕۆكەوانە كوردە خۆفرۆشەبوو، كەوا دەنیشێتەوە لەلای كیژووكارەكان بەكوردی لەگەڵیان دەپەیڤێ. لەدوای رووخانی حكومەتی سەدام و بەشداری كورد لەحكومەتی بەغدا بەپلەیەكی باڵا لەسەر لیستی كورد ئەو ئەفسەرە خەڵات دەكرێ؟ا لەم رۆژانەش یادی كیمیابارانی گەلی بازێ دەكرێتەوە، كەوا لەپێش چاوی ئێمە فڕۆكەكانی رژێمی سەدامی گۆڕبەگۆڕ رۆژی 8/9/1988 كیمیابارانی گەلی بازێی كردوو بەدەیان هاووڵاتی بوونە قوربانی، بەهۆی كاریگەری زیانەكان رۆژانی رەشی قۆناغەكانی ئەنفالی ناوچەی سۆران و گەرمیانمان لەبیرچۆوە. دوورۆژ پێشی ئەم بەروارە سەدامی گۆڕبەگۆڕ ئیعلانی عەفوعامی كرد، بۆئەو خەڵكانەی لەشاخ دوای پرۆسەی ئەنفال گیریان خواردبوو، بەشێكی زۆریان خۆیان تەسلیمی رژێم كردەوە، ئێمە لەچیای گارە دەمانزانی حوكمەت بەتەمایە گەلی كورد لەناو ببات و لە ئۆردوگاكان تەلبەندیان بكا، بۆیە هەولماندا خەلكەكە بەرەو سنوورەكانی ئێران و توركیا كۆچ بكات، ژمارەیەك بۆ سەرسنوور بەهەزار نانی عەلی دەرباز بوون، بەلام زۆربەیان بەهۆی فراونی شالاوەكانی ئەنفالی هەشتی بادینان، نەیانتوانی بۆ سنوورەكان دەرباز بن، چونكە حكومەتی عیراق هەموو هێزەكانی بۆ ناوچەی بادینان هاوردبوو، بەتایبەتی دوای ئەوەی خومەینی ژەهرە نەگریسەكە دەنۆشێ و ئیعلانی راگرتنی شەری راگەیاند، كەوا هەست دەكان لەو راگرتنەی شەر پێكێك ژەهری ماری حەوت سەر دەنۆشی، لەئەنجامدا حكومەتی عێراق دەستی واڵا دەبێ و لەشكرەكەی بۆ ناوچەكانی كوردستان دەگوازێتەوە، بەتایبەتی ناوچەی بادینان كەپشكی شێریان بەردەكەوێ؟ بۆیە ئەو خەڵكانەی خۆیان رادەستی رژێم دەكەنەوە، بەرەو موعەسكەرەكان و پاشان ئۆردوگاكانی جەژنیكان و بەحركە راپێچ دەكرێن، بەشێكی زۆریان بەرەو ئەنفالی مەرگ رەوانە دەكرێن. وێنەی زۆربەیانم لەبەرچاوە، بەتایبتی خێزانەكانی دانیشتووی گوندی مەرانێ لەدۆڵی بالیسان لەگوندی ئەشكەفتە بارگەمان تێكنا، پاش ماوەكی درێژ خوالیخۆشبوو باوكی فەلاح ناسراو بەحەسەن نانەوام بینی، ماڵیان لەتەنیشت بارەگای رێكخستنەكانی حزبی شیوعی بوو، منداڵەكان سەركەو بنكە بوون، فەلاح گەنجێكی تازە پێگەیشتوو سیمای لەخۆبوردەیی پێوە دیار بوو، باوكی فەلاح گوتی" ئەمڕۆ میوانی ئیمە دەبیت، زۆرم پیخۆشبوو دەمزانی چێشتی مەفەر یان فاسۆلیا یانیش نۆك بوو، نانیان دانا تەیارەی پیلاتۆز گرمەی لێوە هینا، لەچەند شوێنێك بۆردومانی دەكرد، لەگەڵ منداڵەكان بەرەو كونەتەیارە بۆ قەدپاڵی شاخەكە چووین، بۆسەر سفرەی نان گەڕاینەوە؟ هەركە پارووەكە نەچووبووە خوارێ، دیسان پیلاتۆز گرمەی لێهینایەوە، لای ئێمە ئاسایی بوو، بەڵام بۆمنداڵەكان زۆر ناهەمواربوو، چەند جارەكی بۆناو كونەتەیارە دەچووین و دەگەڕاینەوە. لەدوای هەر دانیشتنیك بۆئەوەی ورەیان بەرز بكەمەوە، بەمنداڵەكانم گوت" لە شارەكان و لەهەولێر ئێستا دەڵێن پێشمەرگە موقاوەمەی فڕۆكەكانی سەدام دەكات، دایكی فەلاح وەڵامی دامەوەو گوتی" دەزانی چی بەخوا ئێستا لەهەولێر هەموو پرتەقاڵی دەخۆن، كەس ئاگای لە ئێمە نییە؟ لەوانەشە هەر ئەو فڕۆكەوانە خۆفرۆشە بێ، بەهۆی ململانێی حزبی و وەرگرتنی كەسانی خۆفرۆش و ناشایستە لەو نێوانە خۆی خزاندبێ. ئەنفالی كورد هەموو كەس دەزانێ كەوا سەرۆك جاشەكان تاوانباری سەرەكی بوون، لەدادگای باڵای تاوانەكانی عێراق تایبەت بەكەیسی ئەنفال حوكمی دەستگیركردنیان دەردەچێ، بەڵام بەهۆی ململانێی نێوان دەسەڵاتداران ئەو فەرمانە جێبەجێ ناكرێ و بەڵكو پایەكانیان بەرزتر دەكرێ؟ پێوستە گەنجەكان روو لەگۆڕەپانە گشتییەكان بكەن، ئاڵای چاكسازی ریشەیی هەڵگرن، وەكو ئەوەی لەبەغدا ئەنجامدەدرێ. وێنەی ئەو موستەشارە خۆفرۆشەی كەوا لەلایەن حزبێكی دەسەلات بە پیاو ماقول خانەنشیندەكرێ، دوای ئەوەی سەنگەرەكەی و ئاخورەكەی دەگۆرێ كورەكەشی بەپلەیەكی ئەفسەری باڵا دادەمەزرێ، لەهەرێمی كوردستان گەر بیانەوێ چاكسازی بكەن؟ دەبێ خۆیان لەكەسانی خۆفرۆش پاكبكەنەوە، كەسانی خۆفرۆش و گەندەڵكار بدەنە دادگا، ئەگینا ئەو هەموو گەندەڵییەی لەكوردستان دەكرێ، دەبێ كێ ئەنجامدەری بێ؟ ماوەی پتر لەدوو مانگە حكومەت وپەرلەمان ئیفلیجكراون، بۆیە دەبێ خەڵكی خاوەن بڕیار بێ، چونكە حزبەكان نایكەن، دەبێ خەڵك و شەقام بڕیاری هەبێ، ئەگینا كۆبوونەوەكانی هەر پێنج حزبەكەی دەسەڵات بێ ئەنجام بەردەوامی دەبێ؟ حكومەتی عەبادی 334 بەرپرسی دا دادگا، بەڵام دەبێ دەزگای نەزاهەی هەرێمی كوردستان لەكوێ خەوتبێ؟! بۆ لەماوەی ربردوودا، بەرپرسێك دادگایی نەكراوە؟ ئایا بەرپرسەكانی هەرێمی كوردستان پەڕەسێلكەن؟! بۆحوكمی یاسا بەسەر گەندەڵكاران ناسەپێ؟ دەڵێن هەمیشە دنیا بۆ پرتەقاڵ خۆرەكن بووەو ماندوێتی و قوربانیش بە باڵای قارەمانەكاندا، بەڵام ئەوە لە رابردوودا، بۆنی ئەو جاشەی قاسمە كوێری وەكو كەلاكی كەری تۆپی بۆنی هەفتەیەك دەبێ، هەر لە لووتم دەمێنێ، كاتێك دەیگوت" شۆڕش چی بۆ نەكردوومە، تەنها بە پلەی نەقیب خانەنشینكراوم"، كاوجۆی سەردەمی جاشایەتی زیاد خواردبوو، هەردوو چاوی لەدەست دابوو، لەمیحوەری مەخموور بە كەمئەندام هەمدیسان خانەنشینیانكراوە، پێدەچوو ئاخورەكەی گۆڕی بێ پاداشت كرابێ؟ ئەو گەندەڵەی كەوا لەباندێكی دزی ئۆتۆمبێلی ئامۆزاكەمی دزی بوو، ئێستا بەرپرسی میحوەرێكە، بۆهەموو كوردستانت بۆ نافرۆشێت، یان ئەو ئەندامەی ئەنجومەنی سەركردایەتی كەوا چەندین پێشمەرگەیان شەهید كردو تەسلیمی رژێمی سەدامی گۆڕبەگۆڕ بۆوە، حكومەتی سەدامیش بەقاتێك جلی سەوز پاداشتی كرد!! ئەمڕۆش لەكوردستان ئەندامی سەركردایەتی حزبێكی دەسەڵاتە، گەر چەندین پێشمەرگەی شەهید كردبێ، ئەوە هەموو گەلی كوردت بۆ نافرۆشێ؟! ئایا ئەو خۆفرۆشەی دەیان پێشمەرگەی شەهید كردوو ئێستا پلەی ئامر لیوای پێ بەخشراوە، دەبێ حكومەتی هەرێمی كوردستان یان حزبەكە تەمای چی پێبێ؟! چاوەڕوان ناكرێ كوردستان یان حزبەكەی خڕ بە قرۆشێك بفرۆشێ؟ شۆڕشەكانی هەموو جیهان سووتەمەنی شۆڕشگێرەكان بووەو ترسنۆكەكانیش هاتوونەتە سەر حازرەكی و بەرهەمی خەباتی ئەو خەڵكەیان قولف داوەو لەكوردستانیش زۆربەی جاش و موستەشارەكان و خیانەتكارانی سەردەمی سەدامی گۆڕبەگۆڕ پاداشتكراون، بەڵام دەبێ ئەوە بزانن نەوەی ئێستا دیلی و زەبوونی و ناعەدالەتی قبوڵناكات، گەرچی هەموو ژیانی میللەتەكەمان هەر كۆچ و رەوی بەكۆمەڵ بووە. ئەو وێنانەی ئەمڕۆش لە تیڤییەكان بڵاودەكرێتەوە، یەكێكە لەو ئەنفالانەی رابردوو بەرامبەر گەلی كورد ئەنجامدران، وێنەی ئالانی كوردی هەموو جیهانی دەرەوەی هەژاند كەلەرۆژنامەكانی جیهانی بە ئالانی كوردی ناسرا، بەڵام بایی تاڵە موێك ویژدانی بەرپرسانی هەرێمی نەبزواند، ئەگینا دەبوو هەر زوو كۆمەڵێك یاسای بەجێ لەبەرژەوەندی هاووڵاتیان، بەتایبەتی گەنجان دەربكەن، بۆئەوەی كۆچی گەنجان بەرەو مەنفا رابگرن. پێشمەرگە لەبەرەكانی شەڕ مووچەكەی پێنج سەد هەزار دینار بێ و ئەندام پەرلەمان 8 ملیۆن و وەزیرو گزیریش چەند هێندەی مووچەی ئەو پێشمەرگەیە بێ، كەوا سنگی خۆی بەر گوللەی داعش دابێ، لەولاوەش چەندین كادیری حزب بێ ئەوەی یەك رۆژ خزمەتی هەبێ، یان پێشمەرگایەتی كردبێ، بەپلەی نایاب خانەنشین كرابێ، تاكەی ئەو گەندەڵییە دەسەڵاتدارانی هەرێم، خەریكە بۆنەكەی پیست و ئێسقان بسووتێنن.