ئەم هەواڵە بڵاوبكەوە
FaceBook  Twitter  

محەمەد چۆمانی/ بەخڕی قووتمان دەدەن

 

هیچ نەماوەتەوە تێهەڵدانی ئەو بێڕیزییە نەبێت

ئێوە خۆتان لەژووری كۆبوونەوەكان بئاخنن و مەوەستن و شەڕی یەكتر شكاندن و سووككردن ببەنە شەقەمەكان! یاسا بدەنە بەر قامچی و شەللاق! كەس ئاگای لەشەقام نییە! عەیامێكە لەگردو كۆشكەكانن و گووتان بەشەقام وەركردووە!هەروا ئۆتۆمبێلی جامڕەش و بێ‌ ژمارە بەوێنەی سەركردەو بنكردەو پەڕۆی حزبەكان، مافیائاسا لەشەقامەكاندا تف لەنیشتمان دەكەن! ئای نیشتمانی داغكراو، دە دەستێك بەرووتدا بێنەو تۆش تفێك لەنێو چاوانیان بكە! خەتای ئەوان نییە، خەتای باوكەكانیانە! ئێمە هەروا پڕدەبین و ئێوەش بەتاڵ! پڕبوونی ئێمە قەهرو بەتاڵی ئێوەش ئەخلاق! هیچ نەماوەتەوە، تێهەڵدانی ئەو بێڕیزییە نەبێت.! 

بەخڕی قووتمان دەدەن!

ئەمساڵ لەهەردوو خولی تاقیكردنەوە وەزارییەكانی دوازدەی ئامادەیی، قۆپییە فڕكان فڕكانی بوو، مافیای گزیكردن، گرووپی گزیكردن، بەنێرەكەری پرسیارەكانیان دەفرۆشت!! لەقسان پەروەردە كونی تێببوو، لەو كونە پرسیارەكان دەهاتنەدەر!! لەسایتەكان ریكلام بۆفرۆشتنی ئامێری قۆپییە دەكرا! بەدەیان هۆڵی تاقیكردنەوە مامۆستاو بەڕێوەبەرانی زیاد لەدووجار گۆڕدراون!! هەڵگرانی چرای زانست دەستیان بەكڵاوی خۆیان گرتووە با نەیبات!! كار گەیشتە ئەوەی سەرپەرشتیاران خۆیان ببنە بەڕێوەبەری هۆڵ، خۆش حكومەت و پەروەردە! یەك سوپا نەوەی گزیكار بەڕێوەیەو دەبنە كەڵەگاو حووتی دیكەو بەخڕی قووتمان دەدەن.! 

ببورە لەخەومان كردی!

كاكم تاقیكردنەوەی خولی دووەمی هەیە، كاتژمێر 9ی بەیانی تێلیان بۆماڵەوەیان كردووە، ئەنجا بەخەبەرهاتووە، دوای سعات و نیوێك هاتە قوتابخانەو چوومە بەردەمی و پێمگوت" ببورە كە لەخەویشمان كردی!! نەوەی فەیسبووك ئەوەیە!! نەعل لەپێ‌ و نیوەی پاژنەی لەدەرەوەو و پانتۆڵ لەخوار قوونان و خەناوكە لەمل و زنجیر لەدەست!! 4ی بەیانی دەخەوێت و پاش نێوەڕۆ هەڵدەستێت!! دەسەڵات ئەوەی دەوێت! گەنجی بێ‌ پرسیارو هەمیشە لەخەومان و غەفڵەت!! دەمێكە دەستم لەو نەوەیە شووشتووە! وێرانتر دەبێت، با ئێمە بڕۆین و ئەوان بێن، ئەنجا شام شەكرەو وڵاتی شیرینتر دەبینین چۆن دەكەنە زەقنەبووت. 

بەس ماوە تۆڕەكەیان بدڕێت!

خولی ئیسپانی هاتەوە، سیاكۆ لەریاڵەوە سەنگەری گواستەوەو بووە بەرشە، گوتم" سیاكۆ ورەت بەرزبێت، گوتی" بابە هەر دۆڕان و دۆڕان، ئاخر منداڵ لەكۆڵان و مەكتەبێ‌ گەمانم پێدەكەن!! چیدیكە چەپڵان لۆ فەریقی دۆڕای لێنادەم!! منداڵێك ئەوە هەست و نەستییەتی، دەبێتە خۆی و تێدەگات فەریقێك شیاوی چەپڵەیە یاری باش بكات و ئەنجامی هەبێت، جاوەرە میللەتی بەمێگەلكراو چۆن بەرگەی یاری پێنج گۆڵی هێزە سیاسییەكان دەگرێت، كەهەروا دەدۆڕێن و ئەنجامیش سفر بەدەست!! ئێستا وا خۆیان گۆڵ لەیەكتری دەكەن، كەس نەما لەرێی ئەو فەریقە پێنج قۆڵییە گۆڵ لەفەریقی كوردستان نەكات!!، لەدەرودراوسێ‌، لەداعش، لەئەمریكا، چاكە بەرگەی ئەو هەموو شووت و تۆڕ هەژاندنە دەگرن!! بەس ماوە تۆڕەكەیان بدڕێت!! ئەوەی عەجایبە میللەتە، بەم هەموو دۆڕانە هەر هاندەرەو چەپڵە لێدەدات.! 

سواری كەشتی كرایەوە

دەستی دەرۆزەمان پان بوو

چاومان زەق زەق چاوەڕوانبوو (گۆران)

هەر خانووە نووسراوە"بۆفرۆشتن"، هەر خەڵكە ماڵ دەفرۆشێت و نیشتمان جێدێڵێت!! بڕۆن ببینن خەون و جوانی هەراج دەكرێت!! چاو لەچاوەڕوانی! لەبن دەریای نەوتدا دەستی سواڵ پاندەبێتەوە!! چ بێهوودەیی و بێهیواییەكیان دروستكرد سیاسییەكان!! خەڵك ماڵ هەراج دەكات، ئەوان نیشتمان! دیسان نیشتمان لەكۆڵ نراو سواری كەشتی كرایەوە! بنی پێڵاوەكان لەو سەرزەمینەدا دەگیرسێنەوە، كەلەباوەشی بگرن.