ئەم هەواڵە بڵاوبكەوە
FaceBook  Twitter  

محەمەد چۆمانی/ كاری خێر بەتەعجیل و شەڕیش بەتەحلیل

 

ئاسانە خوێندەواری و چ ئەستەمە تێگەیشتن!

بانقەكان بەتاڵ و ژێرزەمینەكان پڕ! بزانن خەڵكیان چۆن بەئەلیكترۆنیكردنی سیستەمی مووچە سەرقاڵكردووە!! وەك بڵێی هەموو رۆژێك مووچەیەو هەر ئەو بەزمەی كەمە! گاڵتەكردن بەعەقڵی خەڵك تەواونابێت! كەناڵی دینی لۆكاڵی حەشر دەكات و هەر بابایە تێل دەكات" مامۆستا مندارمان نابیت! مامۆستا كو سەعی بكەم! مامۆستا كلیەم بەردی هەیەو دوعای خێرم لۆبكە! تاكی بێ‌ مێشك و گاڵتەكردن بەمیللەت تەواو نابێت! داراییەكەی هەرێم ئێژێت" پارەی نەوتمان لەتوركیایەو دۆلارە، دەنا پارە هەیەو پێش جەژن مووچەی هەموو وەزارەتێك دەدەین، خورمەش لەبەغدا زۆرە! گاڵتەكردن بەشعوری خەڵك تەواو نابێت! لەحەڤدە قوتابی، پازدە كچیان یەكەمی هەرێم بوونە، ئەهلی عەولەمە شەڕیانە چەندیان سفورو چەندیان حیجابن! تاكی بێ‌ مێشك نابڕیتەوە! پەكوو لەو مەملەكەتە وێرانە، خوێندەواری چەند ئاسانەو ژیربوون و تێگەیشتن چ ئەستەم و گرانە.      

با گوێزی هەورامان بخۆن!

نەمامۆستای تایبەت، نەبەشداری سەنتەرو خولەكانی پارەخواردن! نەمەلزەمەی زانست فرۆشتن! نەلەقوتابخانەی نموونەیی و ئەهلی، ئەنجا سەد لەسەدو یەكەمبوون لەكوردستان.! چ نەنگییەكە دووكانەكانی بن باڵی پەروەردە بەو كچە نەگەنەوە!! عەبدولڕەحیم عەدەس لە (هونەری وانەگوتنەوە)دا دەڵێت" ئەم شێوە فێركردنە توێكڵەو ناوكی نییە! رووخساری هەیەو جەوهەری نییە!" سەنتەرو قوتابخانە نموونەیی و ئەهلییەكان بەهرەو تواناكانی قوتابیانیان كوشت، خوێندن بەو بازرگانییە سووك و ریسوا كرا! دایكی دونیا گوتی" گوێزی هەورامان لەماڵمان نەبڕاوە، بۆیەش كچەكەمان مێشكێكی تیژو سافی هەیە" هەقە بەرپرسانی پەروەردە، بۆئەوەی ببنە خاوەنی ئەو مێشكەو باشتر لەپەروەردە تێبگەن، گوێزی هەورامان بخۆن!! یەكەمەكان هەردەم لەناوچە دوورو پەراوێزخراوەكان بوونە، شاری پڕ ئاپارتمان و مۆڵ و ملیۆنێرەكان، لەگەڵ هەڵەبجەیەكی بەسەریەكدارووخاو دەرناچن!! پەككو لەو بێشەرمییە.!

 

گەنجێ‌ بەبار بێ‌، بەزەهرە مار بێ‌

ئەم پەندە پێماندەڵێت كەسێك خێر لەوڵاتەكەی نەبینێ‌، با هەر زەهری ماری پێوەركرێت!! كۆچی ئەمجارە، كۆچ نییە، هەڵاتنە لەنیشتمان. بەسیاسەتی لەخشتەبردن و بەمووچەخۆركردن و بەبندیواركردنیان و لێسەندنەوەی ئیرادە، رۆحی بەشێكی زۆری گەنجیان گەندەڵكرد!!! بەشێك لەو گۆڕە پاڵدانەوەو خواردن، بەشێكیش دانامەزرێت و بێكارو ئەوەتا بەهەشتی حكومەتی بنكەفراوان جێدێڵێت!! خوێنی ئەو 20گەنجە خنكاوە بتانگرێت! شەرم ناكەن لاوانی شورەی پۆڵایین و هێزی لەبن نەهاتوو لەدەستتان هەڵدێت! كورد دەڵێت" هەر نانخۆرێكیان لەكۆڵ بێتەوە"، نەمانی ئەم هەموو گەنجە ماڵداری بەدەخیلەی حكومەت بۆحزب گەورەتر دەكات! كەجەوانان دەڕۆن، كەس ناچێتە بەردەم عەرشی دەسەڵاتیان و دەنگی نا و شەقام خرۆشانیش كپ و مانگرتن و خۆپیشاندانیش كەمدەبێتەوە! بڕۆن بنی پێڵاوەكانتان لەكوێدا گیرسایەوە، ئەوێ‌ نیشتمانی ئێوەیە. 

 

لەچ كونان دیار نینە

هەمیشە گەف و هەڕەشە! ئەگەر بەغدا وانەكات دەوڵەت رادەگەیەنم! ئەگەر بودجە نەنێرێت نەوتی خۆم دەفرۆشم! پارەی پترۆ دۆلاری كەركوك نەدات، نەوتی كەركوك قفڵ دەدەین! "هەڕەشە نیوەی مێردییە" كورد بەهەڕەشەش هیچی بەهیچ نەكرد! بێتام بوو قسەكردن! لەبەرجوینەوەی قسە، كارو كردەوە لەچ كونان دیار نینە! "كاری خێر بەتەعجیل، كاری شەڕ بەتەحلیل" كورد نە لەوەختی خۆی بڕیاری دەست و برد ئەدات، نەلەساتی تەنگانەدا بڕیارێكی عاقڵانە وەردەگرێت!" راوێژكار لەسەری دەڕژێت، كەچی ئەوە حاڵ و وەزع! زۆر بڕیارو پرس هەر فیعلی منداڵانەیە!! لەكوێ‌ پسا لەوێ‌ گرێی دەداتەوە"!! بڕیارو سیاسەت و بەرنامە زوو دەپسێن و لەولا پێكیان وەدەنێنەوە!! تێپەڕاندنی قەیران و كێشەكان خۆنەویستی دەوێت، توڕدانی قین و بەرژەوەندی دەخوازێت، بەڵام هەمووان هەمزاغای سمێڵ سوور بن، ئەوە ئەو بارە هەر لەسەر پشتی میللەتە.!