ئەمە بڵاوبكەوە
FaceBook  Twitter  

سمکۆ محەمەد/ راكردن لەجەهەنەمەوە بۆ بەهەشت

میدیا ژیانی بە ئاراستەیەكدا گۆڕی كە وەكو كاڵا مامەڵە لەگەڵ ئینسان بكات، ئەمەش كاریگەری نەرێنی هەبوو لەسەر ئەوەی دونیا لەدوو دیمەنی جیاوازی جەهەنمی رۆژهەڵات و بەهەشتی رۆژئاوا كۆبكرێتەوە.

ئەم هاوكێشەیە كە تەنها بۆ بەراوردكردنی دوو سەر زەمینی بەپیت و بێ‌ پیت نییە، بەڵكو شەڕێكی دیكەی نادیارە لە نێوان ئەمریكا و رۆژئاوا كە رۆژهەڵاتییەكان باجەكەی دەدەنەوە.

ئەوەی كە لەماوەی رابردوودا زیاتر لە 500 هەزار كۆچبەری هاندا بەبیانووی ئەوەی ژیان لەرۆژهەڵات نەماوە و بەرەو رۆژئاوا كۆچ بكەن و نزیكەی 250 هەزاریان بەهۆكاری ئەوەی رێگا سەختە و بەنایاسایی كۆچ دەكەن لەرێگەی قاچاخچییەكانەوە، گیانیان لەدەستداوە، مەرگی ئەو هەموو ئینسانە لەوێدا شەرمەزارییە بۆ رۆژئاواییەكان كە ئەوان دەیانزانی لەترسی مەرگ هەڵاتوون، بۆچی رادەستی قەدەری مەرگێكی دیكەیان دەكەن، لەكاتێكدا ئەوروپای ئینسان دۆست تەنها وەكو هەواڵێك ئەم دۆخە نائاساییە دەبینێ‌ كە دەكرا رێگەیەكی یاسایی و ئاسانی بڕەخساندایە بۆ دەربازبوون لەجەهەنەمەوە بەرەو بەهەشتە وەهمیەكە. 

راكردنی ئینسانی رۆژهەڵاتی كە هەمیشە لەكەش و هەوای جەنگدا دەژی و ناچارە لە جەهەنمی رۆژهەڵاتەوە بەرەو وەهمی بەهەشتی رۆژئاوا كۆچ بكات، تەنها لەترسی داعش و نەبوونی سیستم و وڵاتی ئارام نەبوو كە پێشتر وڵاتەكانیان جیاوازیان لەگەڵ رۆژئاوا نەبوو، بەڵكو كۆچە بەكۆمەڵەكە لەو رستە رەگەزپەرستیەی مێركڵ راوێژكاری ئاڵمانەوە سەرچاوەی گرت كە گوتی كۆچبەران دەیانتوانی بچن بۆ نزیكترین شوێن كە مەككە و مەدینەیە و هاتوون بۆ رۆژئاوایەك كە لەگەڵ كولتووری ئاینی و كۆمەڵایەتی رۆژهەڵات جیاوازی هەیە، بەڵام ئێمە دڵسۆزترین لە نزیكەكانیان و باوەشیان بۆ دەكەینەوە.

سەرباری ئەوەی ئەم رستە سیاسیەی مێركڵ ئیستفزازی بوو بۆ ئەوانی دیكە، بەڵام پرسیارەكە ئەوەیە ئەوروپا چ پێویستی بەوە هەبوو لە لایەك بانگەوازی دەرگا كردنەوە بكات بۆ ژیان و وەرگرتنی پەنابەر و لەلایەكی تریشەوە چارەنووسی ئەو هەموو هەڵاتووە لەمەرگەوە جارێكی تر رادەستی قاچاخچی و مافیاكان بكات و لەلایەكی تریش دەرگا دابخات.

ئەم جیاوازییە لە گوتاری ئینسان دۆستیدا رۆژئاوای خستۆتە بەردەم پرسیاری شەرمهێنەرەوە كە بەخاتری ئەوەی بیسەلمێنن ئەوان سۆزی زیاترییان هەیە بۆ ئینسانی رۆژهەڵاتی و لەبەرامبەریشدا سعودیە و وڵاتانی كەنداو شەرمەزار بكەن، بەپێچەوانەوە شان بەشانی كەنداوییەكان بە گیانلەدەستدانی ئەو ژمارە زۆرەی كۆچبەر، نەك هەر لەبری جەهەننەم بەهەشتیان رەخساندوە، بەڵكو خۆشیان شەرمەزار كرد.

ئەگەر بیانووەكەی ئەوروپا ئەوەیە كە وەكو ساڵانی نەوەدەكان پێویستیان بەدەستی كارە و لەژێر عینوانی دیكە كرێكاری یەخە رەش كە كرێكاری چالاكن و ئەوروپییەكان ئەو كارەی رۆژهەڵاتی ناكەن، بۆیە رۆژهەڵاتی وەردەگرێت، بۆچی لەبری ئەوەی ژیانی دەیان هەزار كەس دەخاتە مەترسییەوە، رێگەیەكی یاسایی و ئاسایی دوور لەهات و نەهات نادۆزێتەوە، چ پێویستی بەوەدەكرد بە ئەوروپا و ئامریكا رۆژهەڵات بەتەواوەتی بكەن بە جەهەننەم و شەڕ و ژیان تێكبدەن، تاكو خەڵكەكە بەگشتی كۆچ بكەن ببن بە كەرەستە و قوربانی گەمەی ئابووری نێوانیان كە لەراستیدا بەشێكی زۆری سەرهەڵدانی ئەو دیاردەیە، كارتی فشارە لەلایەن ئامریكاوە بەرامبەر رۆژئاوا بەكاریان دەهێنن بۆ ئەوەی قەیرانی ئابوورییان زیاتر بێت، بەڵام بەمردنی ئەو رێژە زۆرەی كۆچبەر و مامەڵەیان لەتەكیاندا، ئەوروپا نەك هەر بەهەشتی نیشاندان، جەهەنمێكی دیكەی نیشان رۆژهەڵاتیەكاندا.

 

  • 1