ئەمە بڵاوبكەوە
FaceBook  Twitter  

سمکۆ محەمەد/ سیاسه‌ت و پێكه‌نین 

سه‌ره‌نجام سیاسه‌ت كرا به‌ كۆمیدیا و نوكته‌ و پێكه‌نین، ئه‌و سیاسه‌ته‌ی‌ جگه‌ له‌ده‌رهاویشته‌ ئابورییه‌كانی‌ خۆی‌ و ره‌نگدانه‌وه‌ی‌ به‌سه‌ر ره‌فتاری‌ كۆمه‌ڵگه‌وه‌، له‌بری‌ به‌شداری پێكردنی‌ خه‌ڵك له‌چاره‌سه‌ركردنی‌ دۆخی‌ سیاسی‌، له‌بری‌ به‌شداریكردنی‌ گشت له‌و چاكسازیه‌ و بنبڕكردنی‌ گه‌نده‌ڵی‌، نه‌ك هه‌ر موفره‌ده‌ی‌ جیاوازی‌ به‌زاری‌ عه‌وام به‌رهه‌مهێنا، به‌ڵكو بوو به‌ پێكه‌نین بۆ گشت و نه‌گبه‌تی‌ بۆ گه‌نده‌ڵكاران، به‌مه‌ش به‌شێك له‌و ترسه‌ی‌ ره‌وانه‌وه‌ كه‌ رووبه‌ڕووی‌ ده‌سه‌ڵات و سیاسه‌تی‌ هه‌موو هێزه‌ سیاسیه‌كان ده‌بووه‌وه‌، به‌كارهێنانی‌ نوكته‌ له‌بڕی‌ توڕه‌بوون و له‌بری‌ ناڕه‌زایه‌تی‌ و له‌بری‌ بیركردنه‌وه‌ له‌ ئه‌لته‌رناتیڤی‌ سیاسی‌، پێكه‌نین جێگه‌ی‌ به‌هه‌موو شتێك گرته‌وه‌ كه‌ سیاسه‌ت ترسی‌ لێنیشتبوو، له‌به‌رامبه‌ریشدا نه‌هاتی‌ بۆ خواپێداوانی‌ مشه‌خۆر. 

هه‌ڵخه‌ڵه‌تان و فرێودانی‌ خه‌ڵك له‌لایه‌ن میدیاوه‌، كه‌ره‌سته‌یه‌كی‌ دیكه‌ی‌ سه‌یروسه‌مه‌ره‌ی‌ ده‌سه‌ڵات و به‌ناو ئۆپۆزسیۆنه‌، باشترین سه‌لماندن ئه‌وه‌یه‌ كه‌ به‌رله‌وه‌ی‌ قه‌یرانه‌ سیاسیه‌كه‌ دروستبێت، گوێمان له‌هیچ جۆره‌ ناڕه‌زایه‌تیه‌ك و هیچ جۆره‌ زاراوه‌یه‌ك به‌ناوی‌ راپه‌ڕینه‌وه‌ نه‌بوو، ئێستا كه‌ دۆخه‌كه‌ تێكه‌ڵه‌یه‌كه‌ له‌قه‌یرانی‌ دروستكراوی‌ سیاسه‌تی‌ نێوخۆ و ئابووری‌ كه‌ له‌ئه‌سڵدا قه‌یران نییه‌، بگره‌ گواستنه‌وه‌ی‌ دۆخێكی‌ ئابورییه‌ بۆ دۆخێكی‌ دیكه‌ كه‌ره‌نگه‌ ناوهێنانی‌ پاره‌ تێیدا یاساغ بێت، میدیا به‌شێوه‌یه‌كی‌ ئاشكرا له‌لایه‌ن حیزبه‌ سیاسیه‌كانه‌وه‌ هه‌م ئاراسته‌ ده‌كرێن دژ به‌یه‌ك و خه‌ڵك فریوده‌ده‌ن و هه‌م له‌بری‌ حیزبه‌كانیش جه‌نگه‌كه‌ سارد ده‌كه‌نه‌وه‌، ئه‌م شێوه‌یه‌كی‌ دیكه‌ی‌ نوكته‌یه‌ كه‌ میدیا قه‌یران دروست بكات و هه‌م خۆشی‌ چاره‌سه‌ری‌ بۆ بدۆزیته‌وه‌ و دواجاریش بیكات به‌ نوكته‌ له‌هه‌واڵ و ریپۆرتاژه‌كانیاندا. 

داهێنانی‌ زاراوه‌ی‌ سه‌یرو سه‌مه‌ره‌ی‌ بازاڕی‌ كه‌ پێشتر له‌گه‌ڵ هاتنی‌ داعش و دوای‌ داعش، وه‌كو (ئه‌منت لێ دیاره‌، معاشه‌كه‌ت جوانه‌، نیو مه‌عاش) و ره‌نگه‌ زاراوه‌ی‌ دیكه‌ش به‌رهه‌مبێت و هه‌روه‌ها به‌رهه‌مهێنانه‌وه‌ی‌ بۆ سه‌ر زاری‌ خه‌ڵك، دوو ئامانجی‌ سیاسی‌ له‌پشته‌وه‌یه‌، یه‌كه‌میان ئه‌وه‌یه‌ كه‌ توڕه‌بوونی‌ خه‌ڵك و به‌و هه‌ناسه‌ كۆمیدیه‌ چاره‌سه‌ر بكه‌ن، دووهه‌م ئه‌وه‌یه‌ كه‌ هێزه‌ سیاسییه‌كان جارێكی‌ تر خه‌ڵك تاقیبكه‌نه‌وه‌ له‌قه‌یراندا چۆن مامه‌ڵه‌ ده‌كه‌ن، ئه‌م داهێنانه‌ گاڵته‌جاڕییه‌ له‌مێژه‌ له‌نێو ژیانی‌ سیاسی‌ كۆمه‌ڵگه‌ی‌ كوردیدا هه‌یه‌، ئه‌و وه‌خته‌ی‌ كه‌ جه‌نگی‌ نێوخۆیی‌ بوو و پاشترین كه‌ كۆتایی‌ هات، هه‌موو نه‌هامه‌تی‌ و گرانی‌ و بێڕێزی‌ كردن به‌كه‌سایه‌تی‌ كورد و تێكچوونی‌ شیرازه‌ی‌ كۆمه‌ڵایه‌تی‌ ده‌یان و سه‌دان ماڵی‌ كورد به‌هۆی‌ دوو به‌ره‌كیه‌وه‌، به‌ چه‌ند نوكته‌یه‌ك كۆتایی‌ هات و له‌بیر خه‌ڵكیان برده‌وه‌، ئێستاش به‌كارهێنانی‌ ئه‌و زاراوانه‌ ته‌نها به‌ نوكته‌كردنی‌ سیاسه‌ته‌ له‌لای‌ خه‌ڵك و هیچی‌ تر.

ده‌ستپێكردنه‌وه‌ی‌ ناڕه‌زایه‌تییه‌كان له‌ژێر چه‌تری‌ سیاسه‌تێكی‌ دیاریكراو، جۆرێكی‌ دیكه‌ی‌ كۆمیدیای‌ سیاسیه‌، پاساو بۆ ئه‌م قسه‌یه‌ ئه‌وه‌یه‌ كه‌ یه‌كه‌م نه‌ده‌بوو خه‌ڵك ته‌نها له‌بری‌ ئه‌وه‌ی‌ موچه‌ی‌ پینادرێ‌ ناڕازی‌ بێت، به‌ڵكو ده‌بوو له‌سه‌ره‌وه‌ختی‌ پاره‌زۆریدا رێگه‌ی‌ له‌و خراپ به‌كارهێنانه‌ ئابورییه‌ بگرتبا، دووهه‌م نه‌ده‌بوو رێگه‌ بدات هه‌میشه‌ هێزێكی‌ سیاسی‌ بۆ مه‌رام و به‌رژه‌وه‌ندییه‌كانی‌ خۆی‌ خه‌ڵك هه‌ڵبخڕێنێ‌ و دواجار به‌ نوكته‌ كۆتایی‌ به‌ سیناریۆكان بهێنێ‌، هه‌روه‌ك بینیمان له‌رابردوودا چۆن له‌پێناو به‌شدارییه‌كی‌ سیاسی‌ و كه‌ڵك وه‌رگرتن له‌ناڕه‌زایه‌تی‌ خه‌ڵك، پۆستیان وه‌رگرت و گفتی‌ ئارامییاندا كه‌ ئه‌مه‌ نوكته‌یه‌كی‌ سیاسی‌ بوو دواجار كه‌وته‌ سه‌ر زاری‌ خه‌ڵك، نوكته‌یه‌ك كه‌ له‌هه‌ناویدا تراژیدیای‌ هه‌ڵگرتبوو، چونكه‌ سیناریۆكه‌ به‌ خوێنی‌ به‌ناهه‌ق رژاوی‌ كۆمه‌ڵێك گه‌نج و منداڵی‌ سه‌ر شه‌قامه‌كان كۆتایی‌ هات و خه‌ڵكی‌ له‌ ئومێدێكی‌ سیاسیه‌وه‌ كرد به‌ كائینێكی‌ نوكته‌باز.

  • 1