ئەم هەواڵە بڵاوبكەوە
FaceBook  Twitter  

"چاكی مەكەن با خراپ نەبێت" ئیدیۆمێكی تەنزئامێزە و زۆر جار لە نووسیندا بەكار هاتووە، ئامانجەكە لەم تایتڵە دژبە یەكە، ئەوەیە حكوومەتێك نەتوانێ‌ كێشە كەڵەكەبووەكان لە ریشەوە چارەسەر بكات، باشترە دەستكاری نەكات و بەنیوەناچڵی و بۆ رواڵەت، ماوەیەكە باس لە پرۆسەی چاكسازی دەكرێت و گوایە تۆمەتبار و ئاژاوەچییەكان، زێدەڕۆچییەكان، گەندەڵكاران و ستەمكاران رادەستی دادگە دەكرێن، تا ببنە پەند بۆ ئەوانی تر كە بەنیازن درێژە بەو ملهوڕییانە بدەن كە هەموو لایەكی تەنگەتاو كردووە، كەچی رۆژ بەڕۆژ خراپەكاری، سەرپێچی، ستەمكاری، زێدەڕۆیی و پێشێلكردنی یاسا بە بەرچاوی حكوومەتیشەوە بەردەوامی هەیە و لەبری چاككردن، بارودۆخەكە خراپتر بووە. 

بۆیە دەڵێم چاكی مەكەن با خراپ نەبێت، چونكە خەڵك لە چاو دەزگە بەرپرسەكان، رۆحیەتێكی باشتریان هەیە بۆ چاكسازی، مەبەستم ئەوەیە خەڵك باشتر خەریكی چاكسازین لە بواری كۆمەڵایەتییەوە، بەو پێیەی بەهەموو كەموكوڕییەكەوە خەڵك بە ویژدان و پرنسیپەكانی ئاین مامەڵە لەگەڵ كێشە هەڵایساوەكان دەكەن، بەڵام ئەوەی زۆر دیارە و لەبەرچاوە، گوێنەدانی بازرگانانە بە ویستی شایستەی خەڵك كە هەرچی كاڵای خراپە تا ئێستەیش، هاوردەی دەكەن بەبێ‌ ئەوەی كۆنتڕۆڵی جۆری فلتەریان بكەن و سزایان بدەن.

كاڵا و شمەك فرۆشتن لە بازاڕ بە ئارەزووە كە لە توانای خەڵكی هەژار قورسترە، تەنگژەی كرێچێتی و بێ شوێنی تا دێت بەرزتر دەبێتەوە و كرێی خانوو نەك هەر بەپێی بڕیاری حكوومەت كەم نەكرایەوە، بگرە كرێچی ناچار بە قبووڵكردن كراوە، شەقام تا دێ خزمەتیان كەمتر دەبێتەوە و كەمتەرخەمی لەبارەی پاك و خاوێنی شارەكانی هەرێمی كردووە بە گوفەكێكی گەورە، حاڵی تەندورستی نەك هەر كێرڤی بەلای خراپدا بەرز دەبێتەوە، بگرە دەنگوباسێكی مەترسیدارە و كرێی چارەسەریش لە نەخۆشخانەكانی كەرتی تایبەت تاقەت پڕووكێنە. سەرباری هەموو ئەوانە، بێ‌ مووچەیی بەشێكی ئەو چاكسازییەیە كە بووەتە خەونی هەمووان، بەڵام دەركەوتووە هەموو ئەمانە بەم شێوە چاكسازییە ناكرێت كە كارێكی كردووە خراپتر بێت. 

بڵاوبوونەوەی هەواڵی كوشتنی ئەو گەنجەی لەسەر "فول لایت" هەفتەی رابردوو لەلایەن كەسێكی خاوەن عەشیرەت و پلەداری سەربازی، ئەگەرچی رووداوەكە كەیسێكی ئاسایییە و لە هەموو دنیا ئەو تاوانانە ئەنجام دەرێن و خەتاكە لە حكوومەت نییە وەك كردەوە، بەڵام جیاوازی ئەم تاوانە لەگەڵ تاوانەكانی تری دەرهەق بە خەڵك، ئەوەیە كە بكوژی گەنجەكە ناسراوە و ناگیرێ، هەڵبەت ئەمە لە هەموو ناوچە و شارەكانی كوردستان هەیە و تا ئێستە بكوژ و تاوانبار خۆیان رادەستی یاسا نەكردووە و پۆلیس ناتوانن بیانگرن، بە بیانووی ئەوەی پێشمەرگە دەبێت دادگەی سەربازی بكرێت، بۆیە هەم حزب و هەم پیاوانی دەسەڵاتداری سیاسی و عەشایەری، پشتگیرییان لێ دەكەن. 

ئەم بابەتە سەرباری ئەوەی كۆمەڵایەتییە كە بەشی زۆری خەڵك بەچەك مامەڵە دەكەن و كێشەی خۆیان چارەسەر دەكەن، نەك هەر خەڵكی ترساندووە و تووڕەی كردووە، بەڵكو دەزگەكانی جێبەجێكاریشی بێ‌ بەها كردووە لەبەرچاوی خەڵك، تا ئەو رادەیەی رای گشتی وایە متمانەیان بە تەناهیی كوردستان نەمێنێ‌، بۆیە دەڵێم چاكی مەكەن با خراپتر نەبێت.