ئەم هەواڵە بڵاوبكەوە
FaceBook  Twitter  

له‌م رۆژانه‌دا هاوڕێیه‌كم كه‌ كه‌سێكی‌ بیانییه‌و نزیكه‌ی‌ 12 ساڵه‌ له‌ هه‌ولێر ژیان به‌سه‌ر ده‌بات، وه‌كو خه‌مخۆرێكی‌ شاره‌كه‌ ته‌له‌فونی‌ بۆ كردم‌و وتی‌: (خه‌م له‌و شوێن‌و چوارڕیان‌و شوێنانه‌ ده‌خۆم كه‌ سیمبولی‌ شاره‌كه‌ن‌و خه‌ریكه‌ ناویان ده‌سڕنه‌وه‌ یان وه‌كو خۆیان نۆژه‌ن ناكرێنه‌وه‌، ئه‌مه‌ ته‌نها لایه‌نه‌ نێگه‌تیڤه‌كه‌ی‌ بۆ مێژووی‌ شاره‌كه‌و نه‌وه‌كان نییه‌، به‌ڵكو بۆ ئه‌و كه‌سانه‌شه‌ كه‌ به‌و خه‌یاڵه‌وه‌ ده‌ژین كه‌ یاده‌وه‌رییان له‌گه‌ڵ ئه‌و سیمبولانه‌ هه‌یه‌). هه‌ستێكی‌ زۆر نیشتمانپه‌روه‌رییانه‌ بوو، له‌ كاتێكدا ده‌بوو نووسه‌رو رۆشنبیرو سیاسییه‌كان بیریان له‌وه‌ بكردایه‌ته‌وه‌ كە شار بە مانەوەی سیمبول نابێت و كەلێنێكی گەورە دروست دەكات لە یادەوەری بۆ نەوەكانی داهاتووش.

یه‌كێك له‌و دیاردانه‌ی‌ كه‌ شاری‌ پێده‌ناسرێته‌وه‌ سیمبوله‌كانیه‌تی‌ كه‌ له‌سه‌روه‌ختی‌ خۆیدا به‌شێكیان قه‌ده‌غه‌ بوونه‌و به‌شێكیان رێگه‌یان پێدراوه‌ بكرێن به‌ په‌یكه‌ر یان شوێنێكی‌ كه‌لتووری‌ ناسراو، شاره‌كانی‌ كوردستان به‌هۆی‌ ده‌وڵه‌مه‌ندی‌ فره‌یی‌ له ‌نه‌ته‌وه‌و ئاین، هه‌روه‌ها به‌هۆی‌ ئه‌و شۆڕشانه‌ی‌ كه‌ له‌ دژی‌ دیكتاتۆره‌كان كراون، زۆربه‌ی‌ چوارڕیان‌و شه‌قام‌و خوێندنگه‌و...هتد به‌ناوی‌ بزووتنه‌وه‌یه‌كه‌وه‌ یان كه‌سایه‌تییه‌وه‌ كراون، به‌ڵام ئێستا ئه‌م دیارده‌یه‌ به‌هۆی‌ هاتنی‌ ئه‌و مۆدێله‌ نوێیه‌ی‌ كه‌ كوردستان كه‌وتۆته‌ ژێر كاریگه‌رییه‌وه‌، خه‌ریكن له‌به‌ر خاتری‌ به‌رزكردنی‌ باڵای‌ ته‌لارێك یان مۆڵێك له ‌به‌ین ده‌چن.

به‌شێكی‌ زۆر له‌و سیمبولانه‌ی‌ ناو شار و شارۆچكه‌كانی‌ كوردستان، هیچ رۆڵێكی كاریگه‌ریان نه‌بێت‌، ده‌توانێ‌ت له‌ لایه‌ك مێژوو بپارێزێت‌، له ‌لایه‌كی‌ دیكه‌ ده‌توانێت یاده‌وه‌ری‌ ئه‌و نه‌وه‌یه‌ بپارێزێ‌ كه‌ تێیدا ژیانی‌ سیاسی‌‌و كۆمه‌ڵایه‌تی‌‌و فه‌رهه‌نگی‌ تێدا به‌سه‌ربردووه‌، ئێستا به‌ هۆی‌ نۆژه‌نكردنه‌وه‌ی‌ ئه‌و شه‌قام‌و شوێنانه‌، خه‌ریكن هه‌م مێژووه‌كه‌ی‌‌و هه‌م یاده‌وه‌رییه‌كه‌ی‌ له‌نێو ده‌چن، ئه‌مه‌ كاریگه‌رییه‌كی‌ خراپتری‌ بۆ سه‌ر نه‌وه‌ی‌ نوێ‌ ده‌بێت‌، ئه‌ویش سڕینه‌وه‌ی‌ ئه‌و یاده‌وه‌رییه‌یه‌ له ‌زه‌ینی‌ تاكه‌كان‌و مافی‌ ئه‌و كه‌سانه‌ش كه‌ له‌نێوماندا نه‌ماون.

هه‌موو ئه‌و سیمبولانه‌ی‌ ناو شار جۆرێكی‌ تری‌ سه‌رمایه‌ی‌ ره‌مزی‌ شارو ئه‌و نه‌ته‌وانه‌یه‌ كه‌ پێكه‌وه‌ ده‌ژین، نه‌پاراستنی‌ وه‌كو خۆی‌‌و ئه‌و چیرۆكانه‌ی‌ له ‌پشتیانه‌وه‌ راوه‌ستاوه‌، گوێنه‌دانه‌ به‌و به‌هایه‌ی‌ كه‌ به‌شێكه‌ له‌ خه‌یاڵدانی‌ كۆمه‌ڵگه‌، چونكه‌ گه‌وره‌بوونی‌ شار ته‌نها زه‌روره‌تێك نییه‌ بۆ چاره‌سه‌ركردنی‌ قه‌یرانی‌ نیشته‌جێبوون، به‌ڵكو نووسینه‌وه‌ی‌ ئه‌و چیرۆكانه‌یه‌ به‌فۆڕمێك كه‌ نه‌ته‌وه‌و نه‌وه‌ی‌ نوێ‌ كه‌ڵكی‌ لێوه‌رده‌گرن‌و شانازی‌ پێوه‌ ده‌كه‌ن، هه‌ڵبه‌ت بۆ گه‌شتیاریش چێژی‌ خۆی‌ هه‌یه‌، ئه‌و شارانه‌ی‌ كه‌ خاوه‌نی‌ هیچ سیمبولێك نین وه‌كو به‌شێك له‌ وڵاتانی‌ كه‌نداو، ساردو سڕن له رووی‌ بایۆگرافیای‌ شاره‌وه‌، ئه‌گه‌ر بیانووش بۆ گه‌شه‌سه‌ندنی‌ شار ئه‌وه‌یه‌ كه‌ رووبه‌ر له ‌نێو شاردا به‌هۆی‌ چڕییه‌وه‌ كه‌مه‌، ئه‌مه‌ بیانوویه‌كی‌ نالۆژیكییه‌، چونكه‌ پارێزگاری‌ هه‌ر شارێك یان به‌ڕێوه‌به‌رایه‌تی‌ كه‌لتووری‌‌و مۆزه‌خانه‌و لایه‌نه‌ په‌یوه‌ندیداره‌كان، ده‌بێت‌ ئه‌جێندای‌ خۆیان هه‌بێت بۆ به‌رز راگرتنی‌ ئه‌و شوێنانه‌ی‌ كه‌ هیچیان كه‌متر نییه‌ له‌و شوێنه‌ ئاسه‌واریانه‌ی‌ كه‌ رێكخراوی‌ یۆنسكۆی‌ جیهانی‌ قه‌ده‌غه‌ی‌ كردووه‌و خۆیان نۆژه‌نی‌ ده‌كه‌نه‌وه‌.

ئه‌گه‌رچی‌ بۆ جوانكردنی‌ شاره‌كه‌ هه‌ندێك په‌یكه‌ر دانراون كه‌ گوایه‌ گوزارشت له ‌چیرۆكی‌ ئه‌و شوێنانه‌ ده‌كه‌ن، به‌ڵام له‌ سیمادا هیچ په‌یوه‌ندییه‌كیان به‌سیمبولی‌ شوێنه‌كان له‌ڕووی‌ جه‌وهه‌رو فۆڕمه‌وه‌ نییه‌، به‌تایبه‌تی‌ كه‌ په‌یكه‌ره‌كان له ‌وڵاتی‌ چینه‌وه‌ هاتوون، له‌ حاڵێكدا ده‌بوو یان ئه‌وه‌تا په‌نا ببه‌ینه‌ به‌ر په‌یكه‌رسازی‌ خۆمان، یان ئه‌وه‌تا له‌ وڵاتانی‌ وه‌كو ئیتالیاو یۆنان هاورده‌ بكرانایه‌، وه‌ختێك ئه‌مه‌ ناكرێ‌، ته‌نها ئه‌و مانایه‌ی‌ هه‌یه‌ كورد خه‌مخۆری‌ یاده‌وه‌ری‌‌و سیمبوله‌ نه‌ته‌وه‌ییه‌كانی‌ نییه‌، بۆیه‌ شاری‌ به‌مۆدێل خوڵقاندووه‌.