ئەم هەواڵە بڵاوبكەوە
FaceBook  Twitter  

لەهیچ شوێنێكی ئەم سەر زەمینە بەبارتەقای كۆمەڵگەی كوردی، مەسەلەی سێكس بەلایەنە ئازادەكەی و بە تابۆكەشی نەبووە بەمەسەلەیەكی یاساغ و عەیب، بەپێچەوانەشەوە لەهەموو دونیا سێكس نەبۆتە بەشێك لە بازاڕی میدیا، بگرە بەخاتری ئەوەی بەشێكە لە ئازادی ئینسان رێگەی پێدراوە و كراوە بە ویستی تاك و هەموو ماف و ئەركێكیان پارێزراوە، بەڵام لەرووی یاساییەوە قەدەغەكراوە میدیا وەكو كارێكی ئابڕوبەر تەماشای بكات، كەچی میدیای كوردی بە ئاشكرا وەكو فەزیحەیەك باسی لێوەدەكات و هیچ یاسایەكیش نایگرێتەوە، حكومەتیی كوردیش لەوە ناترسێت ئەم بابەتە دەبێتە هۆی بەرهەمهێنانی ترس لەلای خەڵك و دواتریش توندوتیژی. وەختێك لەسەر ئەم بابەتە دەنووسم، بڕوام بە كاری لەشفرۆشی نییە تاكو پشتگیری لێبكەم، بەپێچەوانەوە دژی هەر جۆرە كۆیلەبوونێكم بەجەستە بێت یان بەروح بەرامبەر بە پارە، بەڵام پایتەختێك لەدونیادا نییە گەشتیاری بێت یان نا ئازادی سێكسی تێدا نەبێت و میدیاش وەكو ئابڕوچوون ناوی بەرێت، بەڵام وەختێك شەرەف و ناموس لەدامێنی ژندا كۆبكرێتەوە و بكرێت بە مەرجێك بۆ پیاوەتی نێرینەی كوردی، بەڵێ دەبێت دژایەتی بكرێت و رێگەی لێبگیرێت، چونكە یەكەم ژن دەبێتە پاشكۆی پیاو و هەموو كەرامەتی لە جەستە و سێكسدا كۆدەكرێتەوە، دووهەم پیاو دەبێتە سەردار و هیچ بەهایەك بۆ جەستەیەكی دیكەی ئینسان نامێنێت كە ژن، بۆیە لەرێگەی ئەم نوسینەوە رووبەڕووی میدیای كوردی دەبمەوە كە چیتر سێكس و دیاردە سێكسیەكان بۆ گەرمكردنی بازاڕی خۆیان بەكار نەهێنن. دەمەوێ ئەوە بە بیری خوێنەر بهێنمەوە كە لەساڵی 2004 بوو لەگەڵ بەرپرسێكی ئەمریكی ناودار و ناسراو چاوپێكەوتنم كرد و یەكێك لە پرسیارەكان ئەوەبوو كە گوایە دەسەڵات فەزایەكی بۆ دروستكردوون تاكو سەربازەكانیان لە فەزایەكی كراوەدا كەلێنی سێكسی پڕبكەنەوە، ئەو بەرپرسە سەربازییە گوتی ئەوە راستە لەبەر ئەوەی من زیاتر لە 50 هەزار سەربازم لەگەڵە بەكوڕ و كچەوە، بەبێ ئەوەی هیچ زەمینە سازییەك هەبێت بۆ خاڵی كردنەوەی كێشەی سێكسیان، ئەی دەبێ چۆن بێت، بەڵێ دەسەڵاتی هەرێمی كوردستان ئەو كەلێنەی پڕكردۆتەوە كە هەفتانە لەكەشێكی تەواو ئارامدا كێشەی سێكسی سەربازەكان چارەسەر دەكەن، بەڵام ئەوەی كە تایبەتە و بۆ گشت نییە، بەنیسبەت دەسەڵاتدارێتی ئێرە مەبەستی لە كوردستان بوو، كەلێنێكە كە مانای ناشارستانێتی خەڵكەكە و حكومەتەكەی نیشان دەدا و میدیاش خراپ باسی دەكەن. گرینگترین باس ئێستا مەسەلەی سەبایەكانە واتە ئەو كچ و ژنانەی یەخسیری دەستی داعشن كە بوون بەقوربانی جەنگ و سیاسەت و مەرجی پیاو بوون، كەچی میدیای كوردی لەبری ئەوەی ئابڕویان بۆ بگەڕێننەوە، بەپێچەوانەوە بەرووە نیگەتیڤەكەی باسیان دەكەن، لەبەرامبەریشدا كوڕێكی كوردی ئازا و نەترس بە جورئەتەوە كچێكی لەو سەبایانە خواستووە تێگەیشتنی باوی كۆمەڵگەی شكان، بەمەش هەم مانای شەرەفی لەپیاو و مەرجی پیاوەتی سەندەوە، هەم پێناسە كۆنەكەشی بۆ ژن سڕییەوە كە گوایە هەر ژنێك دەستدرێژی كرایە سەر و كچێنی لەدەستدا جا بەئارەزووی خۆی بێت یان بەزۆر، ئیدی بەكەڵكی گەڕانەوەی نێو كۆمەڵگە نایات و نابێت وەكو كچی ئاسایی شوو بكات و وەكو ژنی ئاسایی تەماشا بكرێت، لێرە مەبەستم ئەوەیە كەدەبوو میدیای كوردی ئەمەیان بكات بە بازاڕێكی گەرم و كەرامەت بۆ ژنان بگەڕێنێتەوە، نەك ئەوەی لەشفرۆشی وەكو كێشەیەكی ئەخلاقی بكات بە بابەتی میدیایی