ئەم هەواڵە بڵاوبكەوە
FaceBook  Twitter  

تەزكیە 

(شیشیلە لە شان) گەنجێكی بەنگلادیشییە چەند ساڵێك بەر لە ئێستا خەمی ژیان‌و ئازاری نەبوونی گەیاندییە كوردستان، كەس نەیدەزانی ئەو گەنجە دەرچووی زانكۆیە‌و نووسەر‌و شاعیرێكی بەتواناشە، بۆیە ئەو چەند ساڵەی لە هەرێمی كوردستان بوو وێڕای پەیداكردنی بڕێك پارە، هەروەها بە وێنەی كۆمەڵناسێك‌و گەنجێكی بە سەلیقە‌و وردبین بەشێكی زۆری بیرەوەرییەكانی ئەو چەند ساڵەی وڵاتەكەمانی یاداشتكردووە‌و وەكو ستونێكی رۆژنامەوانی لە رۆژنامەیەكی وڵاتەكەیدا بڵاوی دەكاتەوە.

بەشێك لە حزبە سیاسییەكانی كوردستان دۆخێكیان خوڵقاندووە، كە بەشی زۆری خەڵكی ئەو وڵاتە بە زمانی سیاسەت لەگەڵ یەكتری بدوێین، سیاسەت پێگەی مەعنەوی و ئاستی رۆشنبیری خەڵك دیاری دەكات، با شاعیر بیت و رووباری شیعرت شەپۆلان بدات، باوەرزشوانبیت و توتای جەستەیی و هەست و سەلیقەی وەرزشیت لەچڵە پۆپە دابێت، با خاوەن بڕوانامەبیت و توانای ئەكادیمیت لە ئاستێكی بەرزدا بیت، با چاودێری سیاسی و پسپۆڕی بواری ئابوری بیت، با كرێكارێكی بازوو پۆڵایینی كارگەو جوتیارێكە دەست و پەنجە زێرین بیت، باشیرت هەوران دابێنێت و بەوێنەی چیرۆكە ئەفسانەییەكانی گوێی ئاگردان پاڵەوانی دێو بەزێن بیت فلسێكی قەڵپ ناهێنێت، ئەگەر ئەندامی حزبێكی دەست رۆیشتوو و نەبیت خاوەنی هەموو ئەو بەهرانەش بیت دەبێت لە كونجی ماڵەوە دەست بخەیە سەرهەناو ت و خۆت گرمۆڵە بكەی، تەزكیەی سیاسی كولتورێكە بەعس دایهێنا، بەڵام حزبە دەست رۆیشتووەكانی كوردستان خراپتر ئەو كولتورەیان پەیڕەوكرد، ئەو پیاوەی من لە ماڵەكەی چایچی بووم كوڕێكی گێلی هەبوو هەر لەماڵەوە بهاتبایە دەرەوە منداڵانی گەڕەك بە شێتە شێت دوای دەكەوتن، بەڵام لەبەر ئەوەی باوكی ئەندامی حزبێكی دەست رۆیشتوو بوو ئەو كوڕە گێلە كرابوو بە سەرۆكی سەنتەری زۆرزانەكانی كوردستان. هەر لەو كۆڵانەی ئێمە پیاوێك هەبوو بەناوی شێرۆی سەكوژ كەچی حزب كردبووی بەسەرۆكی سەنتەری بەرگری كردن لەمافی ئاژەڵان، هەرلەوێ‌ عەزە چاو رەش هەبوو لەسەر ئازادی بیروڕا ئەندامی حزبێكی ركابەری حزبەكەی گوشاو گۆشە سەربڕی كەچی حزبەكەی كردبووی بەسەرۆكی كۆمەڵەی بەرگریكردن لەمافی مرۆڤ، ئەو وڵاتە زۆر سەیرو سەمەرەی تێدابوو. خەڵك دەكرا ئەندام پەرلەمان كاتی سوێندی یاسایی گەل و گەڵی لێك نەدەكردەوە، هەبوو وەزیری پەروەردە بوو لە خولی داهاتوو دەكرایە وەزیری كشتوكاڵ، پەرلەمانتارەكانیان لەسەر شاشەی تەلەفزیۆن وەكو رۆژنامەنووس قسەیان دەكرد، وەزیر بوو لە حكومەت لەمیدیاشدا وەكو ئۆپۆزسیۆن بوو هەندێك مەلا لەوتاری هەینی باسی موسڵمانەكانی بۆسنەو شیشانیان دەكردو بەلای هەڵەبجەو ئەنفالدا نەدەچوون و لە بۆنەكانیش لەبەر سرودی (ئەی رەقیب) یش كەمارشی نەتەوەكەیان بوو هەڵنەدەستانەوە، بەشێكی زۆر كوردەكان بێگانەو غەریبەیان خۆش دەوێت، بەڵام زۆری سیاسییەكانیان ناوە ناوە وەكو خێلە سەرشێت‌و دواكەوتووەكانی ئەمازۆن بەردەبنە گیانی یەكتری.

  • 1