ئەمە بڵاوبكەوە
FaceBook  Twitter  

ئەو مرۆڤێكە لە تاراوگە دەژیت، بەڵام لە هەموومان زیاتر لە كوردستانە. جوانییەكانی ئەو كە لە كوردپەروەری‌و كوردستان خۆشەویستی‌و شیعرەكانیدا بەرجەستەیە، بەسەر هەموو جوانییەكانی ئێمەدا لە بەرزترین لوتكەدا دەدرەوشێتەوە. هەر جوانی خۆی پێ‌ دەچێت لە شیعر‌و هەڵوێستە بەرزەكانی ئەودا سەنگینی‌و مانای هەبێت. پەشێو شەونییە خەونمان پێوە نەبینێت‌و رۆژیش نییە لێمان توڕە نەبێت، بەڵام لە ئەوج‌و لوتكەی توڕەبوونەكانیشی لە خودی جوانی جوانترە، ئەو بۆ ئێمە رۆڵی دایك دەبینێت، ئەو دایكەی كوڕەكەی بۆ رازیكردنی دڵبەند‌و دڵخوازەكەی دڵی دەرهێنابوو بەڵام نزاو پاڕانەوەی لە خوای دەگرد كە كاتی چوونی بۆ جێگای ژوان‌و پێشكەشكردنی دیارییەكەی بە یارەكەی كوڕەكەی بەرنەبێتەوە، كە دەرگای هیواو ئومێدەكان بە رووی ئێمەدا دادەخرێن، شیعرەكانی ئەو كلیلن بۆ كردنەوە، كە سوپای عەمامە بەسەر‌و نەوەكانی سوڵتان‌و ئەسەد‌و عەلی‌و عومەر لە چوار كەنارەوە لەهەر چوار لای برینەوە گەمارۆمان دەدەن، شیعرەكانی پەشێو شۆڕشێكن بۆ مانەوە، زایەڵە‌و نەعرەتەی بەرەنگاری. پەشێوی پێشڕەوی كاروانی بروسكە ئێستا لەسەر زەمینی تاراوگەدا كە كۆمەڵێك هێماو نیشانەی پیری لێ‌ بەدیاركەوتوون، بەڵام ئەو شاعیرە، دیاری شاعیر بوونیش چونە دەرەوەیە لە ریزی مردووەكان، پەشێو گەورە شاعیری میللەتێكە بە شیعر چەكەرەی بیری نەتەوایەتی خۆی كردووە‌و هەر بە شیعریش پێ‌ رەوكە بووە.

سڵاوت لێ‌ بێت عەبدوڵڵا پەشێو، دەزانم تۆ كە ئێستا بە جەستە دووری لە ئێمە بەڵام دیوانی شیعرەكانت هەر لە ژوور سەری خۆمان داناوە لە شەوانی تەنیایی‌و تاریكی‌و بێ‌ متمانەییەدا پاسەوانیمان دەكەن، لە فەنابوون‌و توانەوە شكستە رۆحیی دەمانپارێزن‌و لەجیاتی هەموومان شەڕ لەسەر جوانی دەكەن، سڵاو پەشێو تۆ كە ئێستا دەیان ساڵە وەكو مۆمێك بۆ رووناككردنەوەی تاریكییەكانی وڵاتەكەی مەم‌و زین‌و شیرین‌و فەرهاد دەسوتێی‌و تۆ كە دەیان ساڵە كانیاوێكی وشك نابیت‌و هەموو كەس لێت دەخواتەوە، خەریكە خۆت لە تینوان دەخنكێیت، دەشزانم تۆ نە لەپیری‌و نە لە مردن ناترسیت، بەڵكو ئەوەی لێی دەترسیت ژیانە.. تەمەن درێژ سەروەری نەتەوە عەبدوڵڵا پەشێو.

  • 1