ئەم هەواڵە بڵاوبكەوە
FaceBook  Twitter  

 

8

(شیشیلە لە شان) گەنجێكی بەنگلادیشییە چەند ساڵێك بەر لە ئێستا خەمی ژیان و ئازاری نەبوونی گەیاندییە كوردستان، بۆیە ئەو چەند ساڵەی لە هەرێمی كوردستان بوو وێڕای پەیداكردنی بڕێك پارە، بەشێكی زۆری بیرەوەرییەكانی ئەو چەند ساڵەی وڵاتەكەمانی وەكو ستونێكی رۆژنامەوانی لە رۆژنامەیەكی وڵاتەكەیدا بڵاوی دەكاتەوە.

حزبەكانی كوردستان لە رووی ناوەڕۆكدا خاوەنی بەرنامەو نەخشەی فیكری و سیاسی خۆیانن، هەریەك لەو حزبانە پەیڕەوی ناوخۆ و بەرنامەی خۆی هەیەو تیایدا ماهییەت و ناسنامەی خۆیان دیاریكردووە، بەڵام بەشی زۆری ئەو حزبانە لەرووی كرداری و لەمامەڵەكردنی سیاسەتی رۆژانەو لەكاركردن لەسەر زەمینی واقیعدا سەدو هەشتا پلە بەپێچەوانەی بەرنامەو پەیڕەوی ناوخۆیان كار دەكەن، حزب لە كوردستان لەرووی جەماوەری و ئەندامەكانی تێكەڵەیەكە لە كەسانی خێل و ئایین و سەرمایەدارو ........... كرێكارو جوتیارو توێژی ناوەڕاست، واتا هیچ حزبێك نییە بەتەنیا نوێنەرایەتی چینێك یاخود توێژێكی دیاریكراو بكات، حزب خۆی بەنوێنەری هەموو چین و توێژەكان و سەرجەم گەل دادەنێت، بەمەش حزب فۆرمێكی جەماوەری وەرگرتووە، حزب لە كوردستان سەنگەرێكی فیكری و چینایەتی نییە بۆ بەرگری كردن لە مافەكانی خەڵكی هەژارو زەحمەتێكێش، بەڵكو سەنگەرێكە خەڵك و توێژە سەلەفی و مشەخۆرو دواكەوتوو هیچ نەزانەكان تیایدا بەرگری لە بەرژەوەندی و ماهیەتی فیكری خۆیان دەكەن، ئەوەی لەژیانی حزبایەتی ونە بەرنامەو پەیڕەوی ناوخۆیە و ئەوەی سەروەرو كاراو بڕیار بەدەستە لەناو حزب ئەوانەن حزبیان كردۆتە كۆمپانیای بەرهەمهێنانی بەرژەوەندییە زاتییەكان.

مەجید چاو زەق ئەندام بوو لە حزبێكی كوردستان، بەڵام چونكە مەبەست و ئیلتزامی ئەو پیاوە بەرژەوەندی زاتی بوو نەك بڕوابوون بە پەیڕەوی ناوخۆ، بۆیە هیچی لەبارەی حزبەكەوە نەدەزانی، لەگەرمەی هەڵبژاردن حزب كۆڕێكی جەماوەری بۆ ئەو پیاوە ساز دەكات، مەجید چاو زەق دەچێتە سەر مینبەرو یەك بەخۆی بەدروشمی بژی و بڕوخێ‌ دەست دەكات بەهات و هاوار، چاوەكانی زەقتر دەكاتەوە، هێندە بەحەماسەو قسە دەكات خویزی دەمی دەم و چاوی لەریزی پێشەوەی ئامادەبووان تەڕ دەكات، بەدەست و قاچی وەكو كەسێك سەرچۆپی گرتبێت ئاوا هەڵدەپەڕی و هاوار هاواری بوو، دواتر مەجید چاو زەق گوتی ئامادەبووانی بەشەرەف و بەغیرەت و ئازاو سەربڵندو قارەمان و تێكۆشەرو دەربەدەرو هەش بەسەرو حزبەكەمان حزبی .......... چاو زەق زمانی تەتەڵەی كردو ناوی حزبەكەی لە بیرچوو؟!! لە كادیرەكەی تەنیشی پرسی هەتیوو حزبەكەمان ناوی چییە؟!! دواتر هەر ئەو مەجید چاو زەقە لەهەڵبژاردن بردیەوەو بەدەنگێكی یەكجار زۆر بوو بە ئەندامی ئەنجومەنی بەڕێوەبردنی وڵات.

  • 1