ئەم هەواڵە بڵاوبكەوە
FaceBook  Twitter  

ماوەیەك پێش ئێستا فەرهاد سەنگاوی لەبەرنامەی ڕووداوو مێژوودا و لەكەناڵی ئاسمانی nrt بەشێوەیەكی دیماگۆجی و چەواشەكاری كەوتە شێواندنی مێژووی پڕلەسەوەری حزبی شیوعیمان و بەبێ بەڵگەو دوور لەهەرجۆرە ڕاستگۆییەك كۆمەڵێك تۆمەتی داتاشراوی دایە پاڵ ئەو حزبەی، ئەگەر جوانییەك لەم وڵاتە مابێت تەنها ئەو حزبەیە . فەرهادسەنگاوی دەڵێت شیوعیەكان كۆمەڵێك پەناهەندەبوون وئێمە داڵدەماندان و كۆمەڵێك خێوەتماندا پێدان. لێرەدا فەرهاد بەكۆنەقینەوە كەسایەتی سیاسی و مەعنەوی جوانترین و دێرینترین حزبی مێژووی عێڕاق وكورستان لەچوارچێوەی دەستەواژەی كۆمەڵێك پەناهەندەو لێ قەوماو پێناسەدەكات و بەمەش دەیەوێت حزبی شەهیدان لەهەرجۆرە مۆركێكی سیاسی ونیشتمانی و خەباتگێڕی داببڕێت و چەواشەكارانە بیكاتە پەناهەندە. دیارە ئەوەی پیشەی درۆنەبێت و فرچكی بە شیری شێواندنی مێژوو نەگرتبێت دەزانێت حزبی شیوعیمان لەنیوەی دووەمی حەفتاكان خەباتی چەكداری وپێشمەرگایەتی كردە دروشمی ناوەندی خەبات و دوای ئەمەش هەزاران لاوی كوردو عەرەب و نەتەوەكانی تری ناردە چیاكانی كوردستان. ئەو بڕیارەش گوڕوتێینێكی گەورەی دایە شوڕش وبزووتنەوەی ئازادیخوازی كوردستان. هەرخوودی بەڕێز مام جەلال تاڵەبانی لەكتێبی دیداری تەمەن و لەچەندین بۆنەی جیاجیا گوتویەتی ڕاگەیاندنی خەباتی چەكداری لەلایەن حزبی شیوعیەوە وزەو تینێكی گەورەی دایە ئێمە . ئەی كەوایە فەرهاد سەنگاوی بۆچی ئەو بڕیارە مێژووییەی حزبی شیوعی و هەزاران ژن وپیاوی پێشمەرگەی شیوعی دەكاتە پەناهەندە ؟ باجارێ لەوەگەڕێین فەرهاد لەتەوەرێكی تری قسەكانی دەڵێت حزبی شیوعی لەسەرەوە لەگەڵ ئێمە پێك هاتبوو، بەڵام دواتر نامەیەكی ئەوحزبەمان گرت هەمووی دژی یەكێتی بوو!!! هەڵبەت ئەمەش ناهەقی وبوختانێكی تری فەرهادە بەرامبەر شیوعیەكان و خۆڵ كردنە لەچاوی مێژوو. ئەگەرنا ئەو نامەیەی فەرهاد باسی دەكات ژمارەیەك برادەری دیاری یەكێتی لەبیرەوەریەكان باسی ئەونامەیەیان كردووە و گوتویانە هی لایەنێكی سیاسی تربوو بووە نەك هی حزبی شیوعی. ئەی كەواتا فەرهاد سەنگاوی بۆ وادەكات و بۆچی ئەو هەموو چەواشەكاریە دەكات؟

وەڵامەكەی ئەمەیە: فەرهادسەنگاوی ڕاستگۆنەبوو بەرامبەر حزبەكەی كە یەكێتی نیشتمانی كوردستانە منی شیوعی چ چاوەڕوانییەكی ڕاستگۆیی لەم پیاوە سەنگەر گۆڕە بكەم؟ . فەرهادسەنگاوی ڕاستگۆنەبوو لەگەڵ حزبی دووەم كەبزووتنەوەی گۆڕانە شیوعیەكان چاوەڕوانی چ ڕاستگۆییەك لەو پیاوەبكەن كەحزب گۆڕین لەلای ئاوخواردنەوەیە . دەبوایە فەرهادسەنگاوی تۆبەی نسوح بكات و شەرم بیگرێ؟ چونكە هەموومان دەزانین ئەوپیاوە دەنگ گڕە كێ یە و وردو درشتی لاپەڕەكانی مێژووی دەزانین؟ ئاخر لێیاندەن بیانگرن بیانكوژن فەرهاد داهێنەری بوو؟ تێم دەگەی فەرهاد مەبەستم چیە؟ فەرهاد دەبوایە لەخۆی بپرسێت ئەو هەموو پارەوپوول و كۆشك و تەلارەی لەكوێ بوو؟ كە چەند ساڵێك پێش ئێستاخۆی و جلێكی كۆن و پێڵاوێكی دڕاو لەشاخ هاتەوە ؟ لەكاتێكدا سەدان پێشمەرگەی دێرینی شیوعی كەزۆر لەفەرهاد جوانترو خەبات گێڕتر و دڵسۆز تربوون ئێستا بە وێنەی كۆمەڵێك هەڵۆی پاڕو باڵ وەری و بەدوای ژیاندا دەگەڕێن . حەیف بۆزەمانەی بێ وەفا كەلەسایەی سمێڵ بابڕەكان درۆ چۆتە سەرشانۆی سیاسەتی دەست ڕۆیشتن و ڕاستیش بەوێنەی شێرێكی بریندار چۆتەوە بێشەڵانی تەنیایی خۆی !!!!! حەیف دزوو دوڕوو لەسەرشاشەی تیفییەكان بسكەی سمێڵیان دێ و مرۆڤە جوان و ڕاستگۆكانیش خراونەتە دەرەوەی بازنەی مێژوو. دڵنیام ڕۆژێك دێت هەموو ئەوانەی بوكی ڕاپەڕینی ئازاریان بەدەست وپێ ی خەناوی وبەڕەش پۆشی ناردەوە ماڵەباوان دەدرێنە دادگای گەل . دڵنیام لەداهاتوێكی نزیكدا چیدی سمێڵ قەترانی وبابڕەكان نەك جورئەتی شێواندنی مێژوویان نابێت، بەڵكو خۆیان دەرێنە دادگای مێژوو.

  • 1