ئەمە بڵاوبكەوە
FaceBook  Twitter  

بەر لەوەی بێمە كوردستان چیڕۆكە تەنز ئامێزەكانی نووسەری ناوداری تورك (عەزیز نەسین)م خوێندبووەو، بەتایەتی چیرۆكی (ئیبراهیم زەبۆك) پێم وابوو هاوشێوەی ئیبراهیم زەبۆك نە لە رابردوو نە لە ئێستاو داهاتووی نەك توركیا بەڵكو هەموو دنیا نییە.

بەڵام كە منی بەنگلادیشی چوومە كوردستان و (مەلا عەلی) كەڵەكم بینی، زانیم هەڵەم لەو تێگەیشتم (مەلا عەلی) دانیشتووی شارۆچكەیەكی كوردستانە، بەردەوام بەمەندیل و كەواو رەمزە ئاینییەكان لەسەر شاشەی تەلەفزیۆنەكان بەدیار دەكەوت و وەكو پزیشكێكی گەورەو شارەزا رێنوێنی تەندروستی بۆ خەڵك بڵاو دەكردەوەو دەرمانی چارەسەریشی بۆ هەموو جۆرە نەخۆشییەك بەنەخۆشییە ترسناكەكانی وەكو شێرپەنجەو سەكتە شەوە دیاری دەكرد (مەلا عەلی كەڵەك) دەیگووت باشترین دەرمانی هەموو دەردان میزی حوشترە، قسەكانی ئەو پیاوە نەك هیچ بنەمایەكی زانستی نەبوو، بەڵكو حەلەق و مەلەقیش بوون.

بەڵام ئەوەی سەیر بوو ئەوە بوو كەمەلا عەلی توانیبووی لەسەر ئاستێكی یەكجار فراوان كاریگەری لەسەر خەڵك دابنێت و ئەو نەخۆشخانەی ئەو پیاوە كردبووەیەوە قەڵەبالغترین نەخۆشخانەی كوردستان بوو رۆژێكیان پرسیاری ئەوەم لە یەكێك پیاوە رۆشنبیرەكانی كوردستان كرد كەوا حزبەكان و لایەنە بەرپرسەكان چۆن ئەوە قبوڵ دەكەن پیاوێكی وەكو مەلا عەلی بەبێ‌ ئەوەی خاوەنی بڕوانامەیەكی زانستی بێت و تەنانەت هیچ لە بنەماكانی تەندروستی نازانێت و كەچی ئاوا خۆی كردووە بە پزیشكی هەمووشت زان؟ پیاوە رۆشنبیرەكە وەڵامی دامەوە گووتی كابرای بەنگلادیشی ئەتو چی دەزانی نەخۆشخانەی مەلا عەلی كەڵەك لەبەر بەرپرسەكان بە بەر خەڵكی هەژار ناكەوێت، رۆژێكیان بەمەبەستی چارەسەری نەخۆشی سەردانی بنكەیەكی تەندروستی شارم كرد.

بینیم بنكەكە چۆڵًە، پرسیارم كرد بۆ وایە؟ كار گوزاری بنكەكە گووتی سەرۆكی بنكەو سەرجەم فەرمانبەرانی بنكە بەهۆی خواردنەوە ژهراوی بوونەو بەمەبەستی چارەسەری چوونەتە لای مەلا عەلی كەڵەك!!!