ئەمە بڵاوبكەوە
FaceBook  Twitter  

بە ساڵاچووان بەدبەختترین و بێ‌ نەواترین توێژی كۆمەڵگای كوردستانن، پیری بارێكی یەكجار قورسە لەسەر شانی مرۆڤەكان و بگرە ئافاتێكی بەڵاگیانییە و وەكو مۆتەكە نیشتۆتە سەر سنگی خەڵك و هەناسەی لێ بڕیبوون، بەشێكی زۆری خەڵكی ئەو وڵاتە بەقسە بەردەوام بەشان و باڵی پیرەكان هەڵدەڵێن، بەڵام هەر ئەو خەڵكەش دەیان دەستەواژە و قسەی سارد و ئازاربەخش دەنێن بە تەوێڵی ناوچەوانی پیرەكان.

بۆ نموونە منی بەنگلادیشی بەردەوام گوێ بیستی ئەو قسانە دەبووم: پیری و هەزار عەیب، پیاو كە پیربوو دەخەڵەفێت، بەسەری تۆ پیر بووی و كەڵكی هیچیت پێوە نەماوە، ئینسان كە پیربوو مردنی بۆ باشترە، واتا ڕۆژانە گوێ‌ بیستی ئەو قسانە دەبووم كە گەنج و خەڵكی تەمەن ناوەڕاست لەبارەی پیرییەوە دەیانكرد. گۆرانیبێژێكی ناوداری كورد هەبوو یەكێك لە گۆرانییەكانی ئەوە بوو: خۆزگە لە دنیا مردن هەبووایە پیری نەبووایە، جگە لەمەش بەشێكی زۆر كوردەكان ئەو ڕاستییەیان لە بیر خۆیان دەبردەوە كە پیری وێستگەیەكە لە قۆناغەكانی تەمەنی مرۆڤ و كەم كەس هەیە نەگاتە ئەو وێستگەیە. 

خدرە كوتك پیاوێكی تەمەن چل ساڵ بوو، دراوسێی ئەو ماڵە بوو كە من تیایدا چایچی بووم، دایك و باوكی كە پیر بوون بەوپەڕی بێ‌ بەزەیی فڕێدان بۆ شوێنی خەڵوەتگای پیری، ڕۆژێك یەكێك لە دراوسێیەكانمان پێی گوتم خدرە كوتك دە ساڵە سەردانی دایك و باوكی نەكردووە، ئەو ڕۆژەی من چووم بۆ لایان و بینیم پیری و مردن هێز و برستی لێ‌ بڕیبوون، كە منیان بینی دایان لە پڕمەی گریان، دایكی گوتی؛ من وا دەمرم و بە خدر بڵێ‌ بێت بۆ لام و تەنیا بۆ ئەوەی دواماڵئاوایی لێ بكەم، بەڵام كە پێم گوت هەر گوێیشی پێنەدام، سەرەنجام هەردوو ئەو دایك و باوكە پیرە مردن و شارەوانی ناشتنی، لە هەمووی سەیرتر ئەوە بوو دوای ئەوە خدر كوتك بە تەزكییەی حزبی كرا بە بەڕێوەبەری یەكێك لە ناوەندەكانی خەڵوەتگای پیری لە كوردستان.

  • 1