ئەمە بڵاوبكەوە
FaceBook  Twitter  

لەناو كورد خەڵكی دڵسۆز و ڕۆشنبیر و شاعیر و لێزان و كارزان و بەهرەدار گەلەك زۆر بوون، هەر گوند و دێهاتێك كوچە و كۆڵاًنی هەر شارێك بگەڕابای چەندین كەسی پسپۆڕ و شارەزاو وردبین و خاوەن سەلیقەی فراوانت دەدی، بەتایبەتیش ئەو چەند ساڵەی منی بەنگلادیشی لە كوردستان بووم، چەندین گەنجی بەهرەدار و خاوەن ئەزموون و بیرتیژم ناسی، كە دەتوانرا لەچەندین كایەوە بواری جیاجیادا بخرێنە بواری ئیش و كاركردن و سوود لە وزە و توانایان وەربگرێت، بەڵام حزبایەتی بەرتەسك و سیاسەتی ناعەقڵانی و بەش بەشێنە قۆرخكاری سیاسی وای كردبوو، بەشی هەرە زۆری ئەو گەنجانە بخرێنە دەرەوەی بازنەی ئیداری و حزبی و سیاسی و بەرپرسیارێتی، دەیان گەنجم دەناسی لە بواری ئابووری پسپۆڕبوون، شارەزایەكی قووڵیان لەسیاسەتی نێودەوڵەتی و بەڕێوەبردنی ئیش و كاری ئیداری و ڕۆشنبیری و ئابووری هەبوو، لە ڕۆژنامە و گۆڤارەكان، لەناوەندەكانی تری میدیایی چەندین گەنجم دەبینی كە ڕۆئیایەكی فراوان و توانایەكی زانستی و پەروەردەیی و تەكنیكی و ئیداری و سیاسییان هەبوو، بەڵام حزبەكان پێوەر و فۆتەكەیان بەدەستەوە بوو، كە نەدەبوو یەك كەس لە بڕیار و فەرمایشتەكانی ئەوان دەربچێت، باشترین و دڵسۆزترین كەس لای حزبەكان ئەوانە بوون، كوێرانە و هەرەمەكییانە بڕیار و فەرمانەكانی حزب جێبەجێ بكەن، بەرپرسە حزبییەكان وتەیەكیان هەبوو تایبەت بە ئەندامەكانیان، واتا ئەوەی پێت دەڵێن جێبەجێی بكە و دواتر گفتوگۆ لەسەر ئەو ئیشەی پێت دەسپێرین بكە، ئەو سیاسەتی ناعەقڵانی و داماڵڕاو لەهەر پرەنسیپێكی زانستی حزبەكان وای كردبوو سەدان گەنجی پڕ لە وزە و بەهرە فەرامۆش بكرێن و لە كونجی تەنیایی ماڵەوە و شەقامی بێكاریدا ڕۆژگاری خەم بەڕێ‌ بكەن، هەر ئەوەش وای كردبوو، بەشێكی زۆری پۆستە هەستیار و گرنگەكانی كایەی ئیداری و حزب بە كەسانی تەمبەڵ و زۆربڵێ‌ پڕ بكرێنەوە، لەو شارەی من لێی دەژیام فەعۆ كلاوچی هەبوو، قۆڵی دەیان كەسی بڕیبوو، بگرە ئەو پیاوە لای هەموو شارییەكان بە فەعۆ كلاوچی ناسرابوو، بەڵام كاتێك هەڵبژاردن بۆ ئەنجوومەنی ڕاستگۆیانی وڵات كرا، فەعۆ بە دەنگێكی زۆر بوو بە ئەندامی ئەنجوومەن.

  • 1