ئەمە بڵاوبكەوە
FaceBook  Twitter  

ئەوەی لەناو كوردەكان بەردەوام ئازارێكی دەروونی زۆری دەدام ڕوانینی و مامەڵەی بێ‌ جێ و دواكەوتووانەیان بوو لەگەڵ ژن. ژن لای پیاوی كورد بوونەوەرێكی لاواز و هیچ لەبارا نەبوو بوو، زەعیفە دەستەواژەیەكی بەردەوام بوو كە پیاوەكان بەتەوێڵی ژنەكانەوە دەیانلكاند . ژن بوون لایان عەیبەیەكی گەورە بوو، بەشێكی زۆری ئەو عەقڵیەت و نەریتەی پیاوسالاری كوردەكان، ڕەگ و ڕیشەكەی دەچووە ناو ئاینەكەیان، چونكە لە ئاینی ئیسلام لەكاتی دابەشكردنی میرات بەدوو خوشك مافی یەك برایان هەیە، لەكاتی وەرگرتنی ڕای ژنان لەسەر هەر پرس و ڕووداوێك ئەوا دوو ژن وەكو یەك شایەت مامەڵەیان لەگەڵ دەكرێت، جا با ئەو ژنە وەزیر بێت، ئەندام پەرلەمان بێت و ئەندامی مەكتەبی سیاسی حزبێكیش بێت، لەناو كوردەكان باس كردن لە گەورەیی ژن و گرنگی ڕۆڵ و پێگەی ژن لەناو كۆمەڵگادا قسە و باسی بەردەوامی پیاوەكانە، هەموویان ئەوەندە جوان بەژندا هەڵدەڵێن دەیانبەنە ئاسمان، بەڵام هەر ئەم پیاوانە لە ژیانی ڕۆژانەیاندا بەردەوام ناوی ژن بەسووكی دەهێنن و دەیخەنە ناو ڕستەی بێ‌ مانا، بۆ نموونە پیاوان لەكاتی یەكتری شكاندن و ئاراستەكردنی قسەی ئازاربەخش بەیەكتر، بەژنانی ناوی یەكتری دەهێنن، بڕوا بكەن ئەگەر بەپیاوێكی كورد بڵێیت ژنانی، بۆی هەیە بە دار و بەرد و چەقۆ پەلامارت بدات، سەروبینی زمانی پیاوی كورد باسكردنە لە گەورەیی دایك، دایك وێردی سەر زمانی گەورە و بچووكیانە، كەچی ژن بوونیش لایان كەمی و نزمی و سوكایەتییە و لە بیریان چووە دایكیش ژنە، ئەگەر كەسێكیش ترسنۆك بێت، هەر پێی دەگوترێت ژنانی، هەڵبەت كەم پیاوی كورد هەبوو ئەگەر دەوڵەمەند و دەستڕۆیشتوو بووایە زیاتر لە ژنێكی نەبێت، بەئاشكراش نەبووایە بەدزی ژنێكی تری دەهێنا، حەمە شۆفڵی دراوسێمان ترسنۆكی وەكو خۆی نەبوو، بەڵام هەبوونی دارایی و دەستڕۆیشتوویی وایكردبوو كە سێ‌ ژنی هەبوو، هەر ئەو حەمە شۆفڵە كە ژن لای ڕەمزی (زەعیفە) ترسنۆكی بوو، بۆخۆی هێندە ترسنۆك بوو شەو نەیدەوێرا بە تەنیا لەماڵ بخەوێت و نەك هەر ئەوە لەناو خەڵك بە دز و قۆڵبڕ و ترسنۆك ناوی دەركرد بوو، شەوێكیان قاڵۆچەیەك دەچێتە ناو شەڕواڵی حەمە شۆفڵ، لە ترسان هێندە هاواری كردبوو، لەهۆش خۆی چوو بوو بە پڕە پڕ گەیاندیانە نەخۆشخانەی فریاكەوتن.

  • 1