ئەمە بڵاوبكەوە
FaceBook  Twitter  

لەچەند ڕۆژ و مانگی ڕابردوو ژمارەیەك نووسەرو ئەدیب و ڕۆشنبیری دیارو كارای كورد كۆچی دواییان كرد و بەنێو تونێلە تاریكەكانی بێ گەڕانەوەی مەرگدا بەجێیان هێشتن. لەوانە جەمال نەبەز، مستەفا ساڵح كەریم، ڕەئوف حەسەن و حەكیم كاكەوەیس.

ئەو بەڕێزانە لەپەنجا ساڵی ڕابردوو ڕۆڵێكی گەورەیان بینی لە خزمەت كردن و گەشەپێدانی زمان و ئەدەیب و فەرهەنگی كوردی. ئامادەیی ئەوان لە نێوكایە مەعریفی و ڕۆژنامەوانی و فەرهەنگییەكان، ئاوەدانییەكی گەورەی بە كتێبخانە و كولتووری و ڕۆشنبیری كوردی بەخشی بوو، ناكرێت باسی مێژووی زیاتر لە چل ساڵی ڕابردووی بزاڤی مێژوو و زمانی كورد بكەین و جەمال نەبەز وەكو پێشەنگێكی ئەو بزاڤە نەبینین. ناكرێت باسی بزاڤی ڕۆژنامەوانی و ئەدەبی وەرگێڕان و چیڕۆكی كوردی بكەین، ناوی مستەفا ساڵح كەریم نەهێنین، ناكرێت باسی چیرۆك و ئەدەب و نووسینی كوردی بكەین لەو مێژووەداو ناوی ڕەئوف حەسەن نەهێنین. ناكرێت باسی بزاڤی ڕۆمان و چیڕۆك و نووسینی كودی بكەین هەر لەو مێژووەدا، بەڵام ناوی حەكیم كاكەوەیس نەهێنین.

قۆناغێكی حەتمییە لە مێژووی تەمەنی هەموو مرۆڤێك و كارەساتێكەو شاردنەوەی ڕوخساری جوانییەكانە، بەڵام حەسرەتی قووڵی خەمی گەورەی من ئەوەیە كە لەلایەك ڕۆیشتنی ئەو بەڕێزانە بۆشایییەكی گەورە لە نێو ماڵی ئەدەبی و ڕۆشنبیری كورد بەجێ دەهێڵێت كە پڕكردنەوەی ئەو بۆشاییەش لە ئایندەیەكی نزیكدا یەكەجار قورسە، لەلایەكیش ئەو نووسەرو ڕۆشنبیرانە كاتێك ڕۆیشتن كە ناوماڵی ڕۆشنبیران و ئەدیبان و نووسەرانی كورد وێرانترە لە ناو ماڵی سیاسییەكان، گوتاری میدیایی و ڕۆشنبیریمان جێگای داخیشە بەشێك لەو ڕۆشنبیر و ڕۆژنامەوانانەش خراپتر لە سیاسییەكان، سیاسەت دەكەن و ئەوانەش لافی سەربەخۆی لێ دەدەن، بەجۆرێك لە جۆرەكان بزانن و نەزانن وتار و نووسین و هەڵوێستەكانیان دەچێتە ڕێڕەوی گوتارە سیاسییەكان، داخەكەم ئەوانە كاتێك وەغری یەكجاری دەكەن، كە گوتاری ڕۆشنبیری كوردی پەرتەوازەیە و نەیتوانی بوو ببێتە كاریگەری بەسەر پرۆسەی مەدەنیكردن و بیناكرنی دیموكراسیەت و پێشكەوتن، وەغەرتان خێر، یادتان بەخێر پۆلە تیشكەكەی ڕاڕەوە تاریكەكان.

  • 1