ئەم هەواڵە بڵاوبكەوە
FaceBook  Twitter  

بەرەبەیانێكی سەرەتایی رۆژێكی پایزەی ساڵی 1972 باوكم دەستی گرتم و بردمی بۆ قوتابخانەو لەسەر یەكێك نەك كورسی بەڵكو تەنەكە رەق و تەقەكانی دانام و وەكو هەر باوكێكی تری گوندنیشنی بە مامۆستاكەمی گوت: ئەوە كوڕەكەمە، گۆشتی بۆتۆو ئیسقانیشی بۆ من، دڵم بە وێنە چۆڵەكەیەكی بابردەڵەی كەسیرەبووی ناو باوو بۆران لەناو قەفەزی سینگم هەڵدەلەرزی، كە گوێ بیستی ئەو قسەیەی باوكم بوو قوتابخانە لەبەرچاوم بووە ئەو دۆزەخەی كە مەلای گوندەكەمان هەموو رۆژانی هەینی بەرگوێی دانیشتوانی گوندەكەمانیدا، نیوەرۆ بەدەم هیلاكی و ماندووبوونێكی روحی و دەروونی دەگەڕامەوە ماڵەوە، باوكم پێیی گوتم: كوڕم (ان شاء الله) دەبیتە پزیشك یاخود ئەندازیار، دواتر كەباڵام كردو عەشق و تاسەی زانین و خۆ رۆشنبیركردن كردمی بەكرمی ناو كتێب و رۆژنامەكان، ئیدی لەوە تێگەیشتم كە بۆچی باوكان و سەرجەم تاكەكانی كۆمەڵگای ئێمە حەز بەوە دەكەن كوڕەكانیان ببن بە پزیشك یاخود ئەندازیار، هۆكارەكەشی ئەوەیە كۆمەڵگایەك بەردەوام بەحوكمی نەبوونی میكانیزم و پێداویستیە سەرەتاییەكانی ژیانێكی پاك و تەندروست بەردەوام نەخۆشەو نەخۆشیشی زۆرجار هێماو ئاماژەی مردنە بەتایبەتیش لە ئێستادا زانستی پزیشكی سەلماندوویەتی كە خودی مردن جۆرێكە لە نەخۆشی، پیشەی ئەندازیاریش كە بەردەوام شكۆو پێگەی دیاری لەسەر تابلۆی بیركردنەوەو قەناعەتی كۆمەڵگا هەیە گوزارشت لەوە دەكات كە خەڵكی ئێمە بەردەوام لە رووی رووكەش و دەرەوەدا ئاوێنەی باڵا نومای خۆی دەرازێنێتەوە، بەڵام لەناوەوە وێرانەیەكە بۆخۆی، كۆمەڵگایەك بەردەوام حەزی بە خانووی رەنگاڵەیی و باڵەخانەی بەرزە، ئەوەندەی گرنگی بەتیتلەو بیلبیلە باق و بریقی دەرەوەی خانووبەرە دەدات جارەش ئەو هەوڵی خۆبونیاتنان و خۆ دروستكردنی لەرووی رۆحی و دەروونی و هۆشیاری و مەدەنی نادات، كۆمەڵگایەك بەرووكەش و روخسار لە ئەوجی جوانی دەدرەوشێتەوە، بەڵام لە ناوەوە گرمۆڵە بوو كۆیلەی دەیان كۆت و بەندو زینجیری بونیادە تەقلیدەكان و داب و نەریتی ئاستی كۆمەڵایەتییە، ئا ئەوەی كە باوكم حەز بوونی بە ئەندازیار هەرگیز نەدەشاردەوە، بۆیەش دەبینین كە هونەرو وەرزش و ئەدەب و فەلسەفەكە وەكو سێ كایەی زانستی، ئیستاتیكی، جوانسازی كە رۆڵی گەورەیان لە بیانكردنی مرۆڤ هەیە، لەرووی جوانی ناخ و داهێنان و پێشكەوتن و ژیانی دۆستی، نە لە سیستەم و مەنهەجی پەروەردەدا شوێنێكی ئەوتۆیان بۆ فەراهەم كراوە، نە لای كۆمەڵگاش نرخ و بەهایەكی ئەو تۆی هەیە، ئێستاش لەبیرمە لە قۆناغی سەرەتایی مامۆستا بەبێ تاقیكردنەوە توانا هونەری و وەرزشیەكانمان هەر لەخۆیەوە نمرەی لەسەر وانەكانی هونەرو وەرزش دادەنا، بۆیەش دەبینین دوای 2004 كە بەلێشاو دۆلار روو لە هەرێمی كوردستان دەكات، تەواوی پرۆژەو بەرنامەكانی حكومەت بەدەست رۆیشتووەكانی كۆمەڵگاشەوە لە دروستكردنی باڵەخانەو خانووی مۆدیڵ نوێ رێگاوبان و بەرزە پرد چڕبووەوەو جوانترین شوێن و ناوەندنو و سەنتەرو شوێنە قەرەباڵغەكان و بگرە لا كۆڵانەكانیش كرانە نۆرینگەی پزیشكی، برادەرێكم بەدواداچوونێكی رۆژنامەوانی لەسەر نەخۆشخانەو نۆرێنگەكانی كوردستان كرد، دەرەئەنجام ئەوەی هەڵهێنجابوو كە كوردستان بەقەد وڵاتێكی سەد ملیۆنی نەخۆشخانەو نۆرێنگەی لێیە، بەڵام هاوشانی گرنگیدان بەو دوو بوارە بزاڤی هونەری و ئەدەبی و رۆشنگەری لە شوێنی خۆی نەك هەر نەجوڵا، بەڵكو چەند بەرهەم و خۆزگە بە فلیمی مەرەزەو پیسكەی تەڕ بیرو خولەپیزە دەخوازێت، دەڵێت ئەگەر ویستت كۆمەڵگایەك لەهەموو رۆێكەوە تێك بشكێنیتـ پەروەردەی وێران بكە، مامۆستاكان بێ رێز بكە، لەداهاتوو لەسەر ئەمە وتارێكم دەبێت.