ئەم هەواڵە بڵاوبكەوە
FaceBook  Twitter  

لە مەراكیشی وڵاتی مەغریب، ئەم وڵاتەی زیاتر لە دوو سەد سالە بنەماڵەیەك دەستیان بەسەردا گرتووەو بەوێنەی كا كوت دەیكوتن، داهات و سامان و خێرو بێری وەكو خەرماشە وەكو حووت هەڵدەڵوشن، لەمەغریبی عەرەبی، وڵاتێك لەسەر دەروازەكانی خۆی لەسەر تەوێلی دام و دەزگا حكومی و كۆمەڵایەتی و پەروەردەیی و شوێنە گشتییەكانی خۆی دروشمی الله و رسول هەڵواسراوە، لەو چەند رۆژی رابردوو لەوێدا كارەساتێكی گەورەی ویژدان هەژێن روویدا.

ئەمەش كورتەیەكی روودانی كارەساتەكەیە: پیاوێكی هەژاری مەغریب بەناوی (موحسین فیكری) لەسەر یەكێك لە شەقام و لەژێر یەكێك لە باڵەخانە هەورە بڕەكانی شار ماسی دەفرۆشێت، ئەو رۆژە هەواڵی ئەوە بڵاو دەبێتەوە كە شاژنی مەلیك محەمەدی شەشەم دەیەوێت بەو شەقامەدا تێبپەڕێت، هەر بۆیەش پۆلیسی ئەو شارە دەكەوێتە حاڵەتی ئامادە باشی و چی دەستگێڕو كاسبكاری ئەو شوێنە دەدەنە بەر قامچی و راوە دوونان، نەبادا شاژن بە بینینی دیمەنی هەژارەكان بۆ چەند چركەیەك سەرو دڵی بگیرێت، چونكە ئەو بەردەوام خواردنی خۆش دەخوات و بۆنی خۆش لەخۆی دەدات، پۆلیس پەلاماری موحسین دەدەن و سەرجەم ماسییەكانی سەر عارەبانەكەی فرێ دەدەنە ناو ئۆتۆمبێلی زبڵ رێژی شارەوانی، كە پۆلیس دەڕوات موحسین بەمەبەستی هێنانەوەی ماسییەكانی كەبەری رەنجی ماندووبوونی چەندین شەو رۆژی راوكردنی بوون، خۆی فڕێ دەداتە ناو ئۆتۆمبێلەكە نازانێت كە ئۆتۆمبێلی شارەوانی خەرماشەی هەیەو هەموو ئەو شتانە دەهاڕێت كە دەخرێنە ناوی، بۆیە ماسی فرۆشی هەژار دەكەوێتە ناو بەرداشی پەڕەكانی خەرماشەو لەماوەی چەند چركەیەكدا جەستەی نجڕ ونجڕو هەلا هەلا دەبێت، دوای ئەو كارەساتە موفتی ئەو شارەی مەغریب بەنوسراو سەرجەم وتاربێژە ئاینیەكان ئاگادار كردەوە كە نابێت لە وتاری هەینی بەهیچ شێوەیەك باسی موحسینی ماسی فڕۆش بكرێت، چونكە ئەوە قەدەرێكی ئیلاهی بووەو كێ دەڵێت موحسین داوێن پیس و ناخ پیس نەبووەو هەر بۆیەش خودا نەیخستۆتە ناو زبڵ و پیسایی و بەو شێوەیە لەناوی نەبردووە، دیارە كارەساتی موحسین فكری زۆر لە هی (بو عزیزی) تونسی گەورەتر بووە و بگرە مانادارترو ناخ هەژێنتربوو.

چونكە بوعزیز لەپێناوی رزگار بوون لەژیان كۆتایی بەژیانی خۆی هێناو موحسینی ماسی فرۆش بۆ گێڕانەوەی ژیانی رۆژانە دوور لە خواست و ئیرادەی خۆی كۆتایی بەژیانی هات، دڵنیام ئەگەر ئیسلامی سیاسی بەهاری عەرەبی نەدزیباو ئەمریكاو رووسیاو عێراق و ئێران و توركیاو سوریا ئیرادەی راپەڕینی گەلانیان سەر نەبڕیبا تراژیدیای موحسینی ماسی فڕۆش تەقینەوەیەكی گەورەی بەدوادا دەهات. جێی باسە مەغریب یەكێكە لەوڵاتە هەژارەكان و دانیشتوانی بەهێزو زەبری شان و ملیان ژیان لە قوڕگی شێر دەردەهێنی، بەڵام مەلیكەكەی كە هەرزەكارێكی گێژ و وێژە بەیەكێك لە پێنج ملیار دێرەكانی رۆژهەڵاتی ناوەڕاست دادەنرێت، لەكاتی نووسینی ئەو وتارەم هاوڕێی بەڕێزم هێرش مەغدید لەرێگای مۆبایل نامەیەكی بۆ ناردم كەتیایدا رێنوێنی كرد بووم لەسەر چۆنیەتی بەدەست هێنانی نوێترین هەواڵ بەڵام من لەداخی تراژیدیای مەرگی ماسی فڕۆشەكە، یەكسەرموبایلەكەم كوژاندەوەو رۆژنامەكەی بەردەمم فڕێدا و چوومە خەوێكی قووڵ كە تا بەیانی خەریكی كۆكردنەوەی پارچە گۆشتەكانی جەستەی موحسین بووم.