ئەم هەواڵە بڵاوبكەوە
FaceBook  Twitter  

زیرەك كەمال

دەڵێن ئەوانەی هێمن و لەسەرخۆن و بەقووڵی لە دیمەن و رووداوەكان و ژیان دەڕوانن، یان مرۆڤی ترسناكن یاخود لە ناخەوە كەسانی جوان و مرۆڤ دۆست و داهێنەرن. (كەریم كاكە)ی نووسەرو شاعیرو پێشمەرگە لەبەرەی دووەمیانە.

پیاوێك كە سەیری دەكەی ئەگەر شاعیرانەو بەرچاو روونانە لێی ورد نەبیەوە هەست دەكەی پیاوێكی گۆشەگیرو وشك و برینگە، بەڵام كە بە ئەسپایی لێی نزیك دەبیەوە كەسێكە بەوێنەی دەریا، بەڕووی دەرەوەدا هێمن و ئارام و لەناخیشەوە پڕە لە شەپۆلی پڕ لە جووڵەو ماسی رەنگاڵەیی، خاكە دێمی زمان و شیعرو نووسینی چاوەڕوانی هەوری دەریای هێمنی ئەون.

كەریم كاكە لەسەر ئاستی سیاسیدا پێشمەرگەیەكی پارتیزان و خەباتگێرێكی رێگای نیشتمان و دیموكراسیەت و چەپ و پێشكەوتو خوازی بوو، بۆیەش نووسینەوەی بیرەوەرییەكانی خۆی، هەوڵێكی ئەوە بۆ كۆكركردنەوەی پەڕە وەریوەكانی بەهاری تەمەن و مێژووی لاوێتی خۆی و بەیەكەوە بەستنەوەی ئەڵقە لەیەكتری پچڕاوەكانی سات و رۆژو هەفتەو مانگ و ساڵەكانی ئەو مێژووە بووەو كە ئەو هاوڕێیە لە ئەشكەوت و كونە ورچ و پێ دەشت و تونێڵە تاریكەكانی شۆڕشدا بەسەری بردووە.

كەریم كاكە پیاوێكی راستگۆو گران و سەنگین و بەویقارە، بۆیەش دەبینین لە نووسینەوەی بیرەوەرییەكانی و لەباس كردن و خستنەڕووی رەوتی رووداوەكان و باسكردنی لەكاراكتەرەكانی ناو حزب و شۆڕشدا نووسینەكانی لە ئەوجی جوانیدا دەدرەوشێتەوە، كەریم كاكە وەكو ئەو هاوڕێ‌ و هەڤاڵە سیاسیانەی نەكردووە كە لەنووسینەوەی بیرەوەرییەكانیان خۆیان كردۆتە رۆستەمی زاڵ و پاڵەوانی دیۆ بەزێن و فریشتەو بەرامبەریشیان كردۆتە جانەوەرو شەیتان و سەربازی بەزیوی شەڕگەی تێكشان، هەموو ئەو هاوڕێی و پێشمەرگانەی كە لەگەڵ ئەو ژیاون و بیرەوەرییەكانیان خوێندۆتەوە، دەستی ئافەرین و راستگۆیی بۆبە سنگەوە دەگرن و دەڵێن كەریم كاكە وەكو چۆن لەژیانی ئاسایی و سیاسی و كۆمەڵایەتیدا راستگۆبوو، لەگێڕانەوەو نووسینەوەی یاداشتەكانیش هەمان راستگۆیی بەرجەستە كردووە، من بیرەوەرییەكانی سەرجەم ساسییەكانی كوردستانم بەهاوڕێیەكانی خۆشمەوە خوێندۆتەوە، هەموویان بەبێ‌ هەڵاوێركردن بەشێوەی سەر پێیی و رووكەشانە قسەیان كردووە، نەك نەچوونەتە ناو واقیعی رەوتی رووداوەكان، بەڵكو وەكو خلیسكانەی سەر بەفر بەسەریدا هەڵخلیسكاون، لەكاتێكدا لەهەموو وێستگەو قۆناغە مێژوویەكانی شۆڕش و حزبایەتی لەلوتكەی بڕیاریدان و بەرهەم هێنان و ئاراستەكردنی سیاسەت و بڕیاری سیاسی بوون، كەچی لە ئاستی نسكۆو كەوتن و ناشیرینەكان خۆیان كردووە بەكەڕەی شەربەت و خاوەنی هەموو جوانییەكان و هاوڕێ‌ و هەڤاڵەكانی خۆشییان كردووە بە ئەهریمەن و كابانی چێشت سوتاوو ترسنۆك، هەر ئەمەش وایكردووە كە دەستكەوت و سەركەوتن و جوانییەكانی ناو شۆڕش و حزب هەزاران باوكی هەبێت و شكستبەزین و هەڵاتنەكانیشوەكو هەتیوی سەرمابردەڵە و بێ‌ باوك بمێنێنەوە، كەریم كاكە چونكە خۆی جگە لەوەی پێشمەرگە بووە، لەهەمان كاتدا شاعیرو ئەدیبێكی بەتواناو رۆشنبیرو هزر پاراوە، هەربۆیەش لەماناكانی زمان بەباشی تێشگەیشتووەو دەزانێت هەر بابەت و نووسینێك جا ئەو بابەت و نووسینە دەقێكی ئەدەبیش نەبێت، پێویستە زمان ببێتە بناغەی داڕشتنی هێڵە گشتییەكانی بۆیەش دەبینیی كەریم كاكە وەكو چۆن لە شیعرەكانی ئێستا تیكاو شیعریەت وەكو راوی هەنگوین لەشانەی زماندا چۆڕاوەتەوە ئاواش لە یاداشتەكانیدا زمان لە ئەوج و لوتكەی جوانیدا دەدرەوشێتەوە كە سێك كە ئەگەر شارەزایی لەمێژووی سیاسی حزبەكان و بزوتنەوەی پێشمەرگایەتیدا نەبێت، هەست دەكات یاخود وا دەزانێت گۆڵەستێرەكان و سەرجەم نووسین و یاداشتەكانی كەریم كاكە لەسەر زەمینی واقیعدا روویان نەدادوەو بەڵكو دەقی ئەدەبین و هیچی تر، من كەمتر لە ژیانی كۆمەڵایەتی لەگەڵ ئەو پیاوە تێكەڵاوم، بەڵام بەردەوام وەكو مامۆستایەك سەیری دەكەم، ئەگەرچی ئەو پێی ناخۆشە بەوناوە بانگی بكەین، بەڵام ئەو بەڕاستی مامۆستایە، دەست خۆش و ئافەرین كەریم كاكە كەلێنە گەڕای گوڵ ئەستێرەكان بكوژێنەوە.

هەر كاتێكیش كە خەریكە فەوزای سیاسی و نەڕە نەڕو قیڕە قیڕی سیاسییەكانی سەر شاشەی تیڤیەكان و فیسبووك دەست دەنێتە بینا قاقام و بێ‌ ئومێدی خەریكە رامدەماڵێت و من یەكسەر دەگەڕێمەوە بۆ خوێندنەوەی بیرەوەرییەكانی كەریم كاكە، بۆیەش لەو رووەوە قەرزاری ئەوم و پێی دەڵێم تەمەن درێژ بێت كەریم كاكەی مامۆستا.