ئەمە بڵاوبكەوە
FaceBook  Twitter  

جەماوەری خۆڕاگری كوردستان

دانیشتووانی سەربەرزی پارێزگای هەولێر

لە بیرەوەریی یادەكانی راپەرینی گەلی كوردستاندا ,دەسپێك لە پێنجی ئادار لە دەروازەی راپەریندا ,لەخۆپیشاندانی 6ی ئاداری نێو جەرگەی شاری هەولێر, كەحزبی شیوعی سەركردایەتی كرد و ترس و هەیمەنەی بەعسییەكانیان تێكشكاند ,لە 8 ی ئادار جەژنی ئافرەتان و 11ی ئازار رزگاركردنی یەكجارەكیی پارێزگای هەولێر لەدەستی رژیمی بەعس و جەژنی نیشتمانی و نەتەوەیی نەورۆزدا,لە سەرجەمی ئەم بۆنەو سەركەوتن وسەروەرییانەی گەلەكەماندا ,كە بەرهەمی یەكڕیزی وتەبایی نێومالی كوردستانیانن , بەوپەری ئیرادەوە لە ئەنجامی خەبات وقوربانیدانی گەلەكەماندا , لە وەڵامی سەركوتكردن و كوشتن و بڕین هەرەشەی لەناوبردنی بەكۆمەڵی گەلەكەماندا بەدی هاتوون , كەحزبی شیوعی بەشانازییەوە لەڕیزی هەرەپێشەوەی كاروانی ئەم خەبات وقوربانیدانە بووە و , ئێستاش لە روانگەی بەرپرسیارێتییەوە داكۆكی لە تەواوی دەسكەوتەكانی راپەرین وسەروەرییەكانی گەلەكەمان دەكات .

لە ساڵوەگەری بۆنەكانی ڕاپەرین و نەورۆزدا بەناوی كۆمیتەی پارێزگای هەولێری حزبمانەوە پیرۆزبایی گەرممان ئاراستەی خەڵكی تێكۆشەری كوردستان , بەتایبەتی دانیشتووانی شاری قەڵا و منارە دەكەین , سەری رێز و وەفادارییمان بۆگیانی پاكی شەهیدان دادەنەوێنین و سڵاوی خەبات وتێكۆشانی بەردەوام ئاراستەی پێشمەرگە دێرینەكان و زیندانیانی سیاسی و رێكخستنەكانی حزب و دۆستان و هاوڕێیانمان دەكەین كە بەردەوام لە لەلوتكەی گیانبازی و ڕیزی هەرەپێشەوەی سەنگەری داكۆكیكردن لەگەلەكەماندا بوون .

لە كاتێكدا ئەم یادە دەكەینەوە، كوردوستان و ناوچەكە ماوەی زیاتر لەسالێكە روبەرووی پەتای كۆرۆنا بووەوەتەوە , سەروەری خاكی هەرێم بەشێوەیەكی مەترسیدار پێشێل دەكرێ‌ و رووبەرووی داگیركاریی هەمەلایەنە دەبێتەوە , ئازادییە گشتییەكان رۆژ بەرۆژ زیاتر پاشەكشە دەكات , دەیان لە رۆلەكانی گەلەكەمان دووچاری گرتن وراوەدوونان دەبنەوە ,هەر گردبوونەوەیەكی مەدەنیانە یاساغ كراوە .ئەمە سەرەرای قەیران گەلێكی ئابووری و گەندەلی و ناشەفافی لەداهاتەكانی ناوخۆ و وزەدا و , بێمتمانە كردنی خەڵك و پەرتەوازەیی لایەنەكان لەمەر پرسە نیشتمانی ونەتەوەییەكاندا , لە ئەنجامی ئەم سیاسەتەدا گەلی كوردوستان زیاترخراوەتە بەردەم هەرەشە و دڵەراوكێ‌ و پێگەی كوردستانیش زیاترو زیاتر رووبەرووی هەرەشە ولاواز كردن و بێ متمانەیی دەبێتەوە .

لەساڵڕۆژی خۆپیشاندان و راپەرینەكانی ئادار و رزگاركردنی پارێزگای هەولێر و دەوروبەرییدا، كۆمیتەی پارێزگای هەولێری حزبی شیوعی كوردستان لەژێر رۆشنایی گوتارو هەڵوێستی ئۆپۆزسیۆنی حزبدا داواكارە: -

- هەرچی زووە سنووریك بۆ پێشێلكارییەكانی سەر سەروەرییە نیشتمانییەكان ,بەتایبەتی هێرش وهەرەشە جددییەكانی رژیمی توركیا دابنرێت , لەناوخۆدا رێگا لەپێشلكارییەكانی سەر ئازدییەكان بگیرێت وئازادی بەرقەرا و پارێزراو بێت.

- هەرچی زووە ململانێی تەسكی حزبی وەلاوە بنێن و یاری بەقووتی خەڵك و سەروەریی نیشتمانی و دەسكەوتەكانی میللەتەوە نەكە ن , بۆ بنەما ئەخلاقی وشەفافییەت وعەدالەت وحكومەتی دامەزراوەیی بگەرێنەوە .

- بەزووترین كات بەپیر داخوازیی خەڵكەوە بچن‌و چارەسەری باری گرانی دارایی‌و ژیانی رۆژانەی هاولاتییان بكەن وباج ورسوماتی زۆر و كرێی ئاووكارەبای سەرهاولاتییان كەم كەنەوە و گرنگی تایبەتی بە بواری تەندروستی و دابین كردنی پێكوتە بۆ هاوڵاتیان بدەن , موچەی پاشەكەوتكراوی فەرمانبەران بگێرنەوە .

- داوا لەلایەنی فەرمانڕەوا دەكەین كۆدەنگی ڕاستەقینە كوردستانی بەرجەستەكەن وپالپشتی جەماوەر و هێزولایەنە تێكۆشەرە رەسەنەكانی كوردستان فەرامۆش نەكەن ,كەئەمەش بە لەبەرچاوگرتنی ئەرك ومافی هەموولایەك دێتەدی , ئەمەش خالی بەهێزی نێوماڵی كوردوستانییە.

- داوا لە جەماوەری هەرێمی كوردستان و دانیشتووانی هەولێری خۆراگر بەتایبەتی دەكەین پاڵپشتی لایەنەكانی ئۆپۆزسیۆن بكەن وهەردەم هێزی فشار بن , لەپێناوی باشتركردنی باروگوزەرانی ژیانیان و ڕێگریكردن و سنووردانان لەسەرەرۆییەكانی دەسەلات و بەهەدەردانی سەروەت وسامانی كوردستان .

- سڵاو لەرێكخستنەكان و ئەوهاورێیانەی بەوپەڕی وورە بەرزییەوە خۆپیشاندانی (6)ی ئاداریان ئەنجامدا .

- سلاو لەپێشمەرگەكانی كوردستان و جەماوەری خۆراگری شاری هەولێر و دەوروبەری كە ڕۆڵی یەكلاكەرەوەیان گێڕا لە ڕزگاركردنی شاری هەولێر و دەوروبەری .

- سەری رێز بۆ سەرجەم شەهیدانی گەلی كوردستان و ڕزگار كردنی شاری هەولێر و دەوروبەری دادەنەوێنین .

- نەمری وسەربەرزیی بۆ شەهیدانی حزب و گەل .

كۆمیتەی پارێزگای هەولێر

حزبی شیوعی كوردستان

( 5) ی ئاداری 2021

چالاکی حزبی