ئەمە بڵاوبكەوە
FaceBook  Twitter  

بەرز‌و پیرۆزبێت ساڵیادی دامەزراندنی حزبمان

پاراستنی دەستکەوتەکانی گەلەکەمان‌ و خۆشگوزەرانی و عەدالەتی کۆمەڵایەتی ئامانجمانە

  

 بەبۆنەی (31) ئادار، ساڵوەگەڕی دامەزراندنی حزبی شیوعی کوردستان‌و عێراق پیرۆزباییەکی گەرم ئاراستەی سەرجەم هاوڕێیانی حزبمان دەکەین‌و سەرفرازی‌و ئاسوودەییان بە ئاوات دەخوازین، و هیواخوازین ئەمیادە مێژوویی‌و شکۆدارە ببێتە مایەی زیاتر بەهێزکردن‌و پتەوکردنی رۆڵی حزبمان لەسەر رێگای زیاتر وەدیهێنانی خەون‌و ئامانجی دێرینەمان کە ئەویش نیشتمانێکی ئازاد‌و گەلێکی بەختیارە.

 دیارە (31)ی ئادار نەک هەر بۆ ئێمەی شیوعییەکان بەڵکو بۆ سەرجەم رێبواران‌و خەباتگێڕانی رێگای ئاشتی‌و دیموکراسی‌و سۆسیالیزم رۆژ‌و بۆنەیەکی گرنگ‌و مانادارە، چونکە لەو رۆژەداو هەشتاو حەوت ساڵا بەر لە ئێستا حزبی شیوعیمان وەکو زەڕوڕەت‌و پێداویستییەکی مێژوویی‌و وەکو وەڵامدانەوەیەک بۆ قۆناغی ئەوسای کوردستان‌و عێراق کەوا گەلەکەمان لە ژێر زەبر‌و باری گرانی زوڵم‌و ستەمی چینایەتی‌و نەتەوایەتی دیناڵاند دامەزراو، و بە لەدایک بوون‌و هاتنە مەیدانی حزبە تێکۆشەرەکەشمان هاوار‌و بێزاری‌و بیری ئازادی‌و سەربەخۆیی کۆمەڵانی خەڵکی وڵاتەکەمان چوارچێوەی پرەنسیپ‌و رێکخراوەیی خۆی وەرگرت‌و خەبات لە پێناوی رزگاربوون لە کۆت‌و پێوەنە‌و زوڵم‌و ستەمی دیکتاتۆریەت‌و سەرمایەداری‌و دەرەبەگایەتی چووە ئاستێکی باڵاو گەشەکردوو، چونکە شیوعییەکان بەوپەڕی دلێری‌و جوامێرییەوە لێوەشاوانە‌و لەخۆبوردوانە بوونە رێبەر‌و سەرقافڵەی خەبات‌و تێکۆشانیچەوساوەکان‌و رەنجدەرانی بیروبازو، و لەو رێگایەشەوە قوربانییەکییەکجار گەورەیان داوە و توانییان لە سی حوزەیرانی ١٩٩٣ شێوازی رێکخستنی شیوعییەکانی کوردستان وەک حزبی شیوعی کوردستان ڕابگەیەنن و لەو کاتەوە سی و یەکی ئادار بەیادی لە دایکبوون و سی حوزەیران بەیادیڕاگەیاندن پێشوازی دەکرێت.

  هەڵبەت لە هەموو وێستگە‌و قۆناغە مێژووییەکان زیاتر لە هەشتا ساڵی تەمەنی حزبەکەمان بەردەوام دوژمنانی ئازادی‌و چینایەتی‌و بیری پێشکەوتوخوازی بە ئاگر‌و ئاسن رووبەڕووی هاوڕێ قارەمانەکانمان بوونەتەوە‌و پێیان وابووە لە رێگای ترس‌و تۆقاندن‌و زیندان‌و سێدارە‌و مەنتیقی هێزەوە دەتوانن پاشەکشە بە تێکۆشانی شیوعییەکان بکەن‌و لە گۆڕەپانی خەباتدا دووریان بکەنەوە، بەڵام بڕوای بەهێز‌و پتەوی حزبمان‌و هاوڕێیە دلێرەکانمان ئەو خەون‌و ئامانج‌و مەرامانەی دوژمنانی لەباربردووە‌و لە رێگای فیداکاری‌و گیان بەخشینیان ئاڵای بەرگریکردن لە گەل‌و نیشتمانیان هەر بە بەرزی هێشتۆتەوە.

 ئەمڕۆ ئێمە لە کاتێکدا هەشتاو حەوتەمین ساڵیادی حزبەکەمان دەکەینەوە وڵاتەکەمان بە هەل‌و مەرجێکییەکجار ناسکدا تێپەڕ دەبێت دوژمنە لە مێژینەییەکان گەلەکەمان بە نەخشە‌و پیلانی ئاشکراو ژێر پەردە بە بەردەوامی لە دژی قەوارەی هەرێمی کوردستان‌و دەستکەوتەکانی گەلی کوردستان لە کاردان و بەهەر شێوەیەک بۆیان بلوێت ‌و بڕەخسێت هەوڵی لاوازکردن‌و نەهێشتنی ئابووری ئەو قەوارەیە دەدەن، و بەداخەوە لەسەر ئاستی ناوخۆیش لە دەرەنجامی سیاسەتی نیولیبرالیزم و نەبوونی سیستمێکی سیاسی و ئابووری کە لایەنی کەمییەکسانی سیاسی و دادپەروەری دابین نەکردوە و کە ئەمەش ھاوکاتە لە گەڵ  نەبوونی سیاسەتێکی عەقڵانی‌و بوونی لاوازی لە گوتار‌و هەستی نیشتمانی‌و نەبوونی شەفافیەت لە داهات‌و سەرچاوە ئابوورییەکان‌و ململانێی ناشارستانی‌و نادیموکراسیانەی نێوان هەردوو حزبی حوکمڕان‌و گەندەڵی‌و ناعەدالەتیکۆمەڵایەتیکە تێکڕای ئەمانە بۆنەتە هۆکاری رەخساندنی زەمینە‌و پاڵپشتی کردنی سیاسەتی دوژمنکارانە لە دژی گەلی کوردستان.

 ئەمڕەوشە باری سەرشانی گەلەکەمانی بە ئەندازەیەکی ترسناک قورس کردووە، کەوا کاریگەرییەکی ترسناکی داناوە لەسەر لاوازکردنی هەست‌و گیانی نیشتمانی و کاڵ کردنەوەی ئەو رۆحیەت‌ویەکێتییەی کە بووە بناغەی راپەڕینی ئاداری 1991‌و سەرجەم دەسکەوتەکانی گەلی کوردستان لە مێژووی تێکۆشانیدا.

 گەلی کوردستانی خەباتگێڕ

 هاوڕێیانی ئازیز

 ئێمە لە کاتێکدا بەوپەڕی شانازییەوە ساڵوەگەڕی دامەزراندنی حزبەکەمان لە هەموو لایەک پیرۆز دەکەین، سەر لە نوێ‌ داوا دەکەین هەرچی زووە بەپەلە سنورێک بۆ بێکاری و ھەژاری دابنرێت و ژیانی خەڵکی کەمدەرامەت مسۆگەر بکرێت، و ڕێگا لە تەشەنەکردن‌و قوڵبوونەوەی پەتای گەندەڵی‌و نادادی کۆمەڵایەتی‌و بەهەدەردانی سامانی گشتی‌و نەبوونی شەفافییەت لە کایە ئابووری‌و سیاسی‌و ئیدارییەکان بگیرێت، و باج و پول وەرگرتن لە سەر خەڵکی زەحمەتکێش زیاد نەکرێت، و یاسای وەبەرھێنان ھەموار بکرێت و هەرێمی کوردستان لە هەموو رووێکەوە بخرێتە سەر راستەهێڵی بە دامەزراوەیی کردن‌و کۆتایھێنان بەحزبایەتیکردنی کایەکانی پێشمەرگایەتی و ئاسایش بھێنرێت، و ماوە بە پێشێلکاری لە سەرجەم ئازادییە گشتییەکان و مافەکانی ژنان نەدرێت، و کۆتایی بەو هەموو پاشاگەردانی‌و ئاڵۆزی‌و بێ‌ متمانەیی‌و لەیەکتری ترازانە بهێنرێت کەوا شان بە شانی نەخشەو پیلانەکانی دوژمنانی گەلەکەمان بۆتە مایەیمەترسی بۆ سەر قەوارەی هەرێمی کوردستان‌و سەرجەم دەستکەوتە بە خوێن بەدەستهێنراوەکان.

 لە هەشتاو حەوتەمین ساڵوەگەڕی حزبە تێکۆشەرەکەمان سڵاو دەنێرین بۆ گیانی پاک و بەرزەفڕی شەهیدە سەربەرزەکانمان، ئەوانەی گیانی بەرز‌و پیرۆزی خۆیان کردە سور خەڵاتی گەل‌و نیشتمان.

 سڵاو لە فیداکاری و ورەی بەرزی بنەماڵەی شەهیدان، ئەوانەی لە پێناوی کێشەی رەوای گەلەکەمان رۆڵە ئازیزەکانیان لەدەستدا.

 سڵاو دەنێرین بۆ پێشمەرگە دێرینەکانی حزب کە سەرجەم لاپەڕە‌و وێستگە جوانەکانی بەهاری تەمەنیان بە حزب‌و گەل پێشکەش کرد.

 سڵاو لە زیندانیانی سیاسی کە بە خۆڕاگری‌و بەرز راگرتنی ئاڵای حزبەکەیان لە زیندانە ترسناکەکانی فاشیەت سەری گەل‌و نیشتمان‌و حزبەکەیان بەرز کردەوە.

  حزبی شیوعی کوردستان

 مەکتەبی سیاسی

30-ی ئاداری 2021

چالاکی حزبی