ئەمە بڵاوبكەوە
FaceBook  Twitter  
 
لە تێکۆشاندا بۆ ئایندەیەکی گەشەدار بۆ ڕەنجدەرانی بیر و بازو و تەواوی گەل و ئازادی کوردستان، گەشبینین!
سی حوزەیرانی 1993 ویستگەیەکی دیکەی تێکۆشانی چلۆنایەتی ریکخراوەیی شیوعییەکانی کوردستانە کە تیایدا رێکخراوی هەرێمی کوردستان دووەمین کۆنگرەی خۆی بەست و بوو بە کۆنگرەی راگەیاندنی حزبی شیوعی کوردستان ـ عێراق.
تێکۆشانی شیوعییەکانی کوردستان هاوکات بووە لە گەڵ بڵاوبونەوەی هزری مارکسی و بیری سوشیالستی و لە دایکبوونی حزبی شیوعی عێڕاق و پەرەسەندنە سیاسییەکان کە تیایدا شێوازی رێکخراوەیی ئەو تێکۆشانە لە ساڵی 1945دا چوارچێوەی خۆرێکخستن لە ڕێکخراوی لقی کوردی حزبی شیوعی عێراق کە مافی دانانی بەرنامەو پێڕەوی ناوخۆیی پێدراوە، وەرگرت، و پاشان بوو بە لقی کوردستان کە لە ئایاری (1966) دا یەکەمین کۆنفرانسی خۆی بەست، و دواتر لە سێیەمین کۆنفرانسی حزبی شیوعی عێراق لە کانوونی یەکەمی (1967) گۆڕا بۆ (رێکخراوی هەرێمی کوردستانی حزبی شیوعی عێراق)، و لە ئایارى (1969)دا کۆنگرەی یەکەمی خۆی بەست، و بەرنامەیەکی نیشتمانیء دیموکراسی، داڕشت، و دوواتر لە سی حوزەیرانی 1993دا حزبی شیوعی کوردستان کە بەردەوامبوونی سەرجەم ئەو تێکۆشان و قوربانیدانەیە، ڕاگەینرا.
هەر لە دووای ڕاگەیاندنی حزبی شیوعی کوردستان وەرچەرخانێکی چلۆنایەتی گرنگ لە تێکۆشانی چینایەتی و داکۆکیکردن لە بەرژەوەندی خەڵکی زەحمەتکێش و بەرپرسی ڕاستەوخۆی شیوعییەکان لە مەسەلەی نیشتمانی کوردستان و داکۆکی لە ماف و ئازادییە سیاسی و کۆمەڵایەتی و مەدەنییەکان و مافەکانی ژنان، هاتەکایەوە، و لە چوارچێوەی پەرەسەندنی ڕووداو و ڕەوشی سیاسی و کۆمەڵایەتی، حزبی شیوعی کوردستان هەڵوێستی گونجاوی چینایەتی و نیشتمانی خۆی وەرگرتووە.
لە ڕەوشی ئەمرۆی کوردستان و عێڕاق و ناوچەکە و جیهان حزبمان لە ڕوانگەی هەڵوێستی خۆی وەک ئۆپۆزیسونی چەپی دیموکراسی جەخت لە سەر نەهێشتنی گەندەڵی و کۆتایهێنان بە دیاردەی دوو ئیدارەیی و بنیاتنانی دامەزراوەکان و ئەنجامدانی چاکسازی هەمەلایەن و ڕاستەقینە و دانانی دەستورێکی دیموکراتی عەلمانی لە کوردستان، دەکاتەوە.
لەم میانەشدا چاکسازی ڕاسنەقینە پێویستی بە سیاسەتێکی ئابوری نوێ بە پێچەوانەی مەرجەکانی سندوقی دراوی نێودەوڵەتی و بەتایبەت کردنی ڕەها و ئابوری بەرخۆر هەیە بە جۆرێک حکومەتی هەرێم ئەرکەکانی خۆی لە بواری خوێندن و تەندروستی وخزمەتگوزارییە کۆمەڵایەتییەکان و دابینکردنی موچەی شایستە بۆ کارمەندان، ببینێت، و پەرلەمان یاسای وەبەرهێنانی بیانی هەموار بکات، وشەفافیەت لە بوارە جۆراجۆرەکانی سیاسەتی نەوت وگاز مسۆگەر بکرێت، و دەروازە سنورریەکان کۆنتڕۆڵ بکرێت.
بەردەوامبوونی ئاراستەی چاکسازی ناوخۆیی پێویستی بە سیاسەتێکی دەرەکی سەربەخۆ ویەکگرتووی حکومەت لەسەر بنەمای بریاری نیشتمانی سەربەخۆیی کوردستانی دوور لە جەمسەرگیری هەیە، ولە سەرئاستی هەموو بەشەکانی کوردستان رێگا لە ناکۆکی لاوەکی و شەری ناوخۆیی بگیرێت و کێشەی سیاسی نێوان سەرجەم لایەنە سیاسییەکان لە ڕێگای گفتوگۆ و دیالۆگی ئاشتیانە و تەحریم کردنی شەڕی ناوخۆ و رێزکرتنی تایبەتمەندی و پاراستنی سەروەری هەر بەشێکی کوردستان بگیرێت.
لە ساڵڕۆژی ڕاگەیاندنی حزبمان بەڵینی تێکۆشان بۆ جەماوەری گەلەکەمان دووپات دەکەینەوە کە بە حزبی تێکۆشانی نیشتمانی و چینایەتی دەمێنینەوە ، و لە پێناوی نیشتمانیکی ئازاد و گەلێکی بەختیار و مافی بڕیاردانی چارەنووس بۆ گەلی کوردستان و دیموکراسی بۆ عێڕاق لە خەباتدا بەردەووام دەبین، و رێگای عەدالەتی کۆمەڵایەتی و یەکسانی و سۆشیالزم کە هەڵبژاردەیەکی مێژووییە بۆمان رێگای بەردەوامی تێکۆشانمان دەبێت و سەرچاوەی هزر وکارەکانمان و هەڵوێست وەرگرتن لە چوارچێوەی مارکسیزم و شوناسی نیشتمانی کوردستانی و بەرژەوەندییە باڵاکانی چینە زەحمەتکێشەکان، و داکۆکی لە ئازادییەکانی مرۆڤ و مافی ژنان و دیموکراسی، دەبێت.
لە ساڵرۆژی ڕاگەیاندنی حزبماندا سڵاوی رێز و وەفاداری خۆمان بۆ خێزانی سەرجەم شەهیدانی سەربەرزی حزبی شیوعی و سەرجەم شەهیدانی کوردستان و بزوتنەوەی دیموکراتی عێڕاق دەنێرین.
مەکتەبی سیاسی حزبی شیوعی کوردستان
کۆتایی حوزەیرانی 2021

چالاکی حزبی