ئەمە بڵاوبكەوە
FaceBook  Twitter  

ئا : سه‌یدعه‌تا

ئه‌م كتێبه‌ باس له‌ژیانامه‌ی شه‌هیدێكی ڕێگه‌ی ڕزگاری و چۆنیه‌تی خیانه‌ت لێكردن وڕاده‌ستكردنی ده‌كات به‌ڕژێم ، زۆرن ئه‌و خانه‌وادانه‌ی له‌پێناو ئازادی مرۆڤایه‌تیدا خه‌ڵتانی خوێن بون ، شه‌هیدبون خوێن ڕشتن له‌پێناو ئازادی گه‌لاندا كۆتایی نایه‌ت ، ئازاد كردنی مرۆڤایه‌تی له‌سه‌ر زه‌ویش له‌بن نایه‌ت ، به‌داخه‌وه‌ ئه‌وبنه‌ماڵانه‌ی ژیانی خۆیان به‌ختكردوه‌ له‌پێناوی مافی ڕه‌وای گه‌له‌كه‌ماندا ، به‌ده‌ستی خۆفرۆش و جاسوس وچاشه‌ كورده‌كانی ڕژێمه‌ یه‌ك له‌دوای یه‌كه‌كانی ئه‌م ووڵاته‌ بوه‌ ، شه‌ڕی كورد كوژی جۆری هه‌یه‌ به‌ڵام هه‌موی یه‌كتر كوژی پێ ده‌وترێت ، ئه‌م كتێبه‌ له‌نوسینی ( سواره‌ محه‌مه‌د ئه‌مین ئاغا ) یه‌ برا شه‌هیدێكی سه‌ركرده‌یه‌ سۆی دڵی خۆی ده‌خاته‌ ڕوو بۆ گیانی پاكی شه‌هیدانی نه‌ته‌وه‌كه‌ی ، خانه‌واده‌ی سواره‌ خاوه‌نی چه‌ندین شه‌هیدن له‌پێناو ئازاد كردنی گه‌له‌كه‌ماندا ، چۆكیان دانه‌داوه‌ له‌خه‌باتی شۆڕشگێرانه‌ی ئازادی گه‌له‌كه‌ماندا ، له‌سه‌رتای ڕاپه‌ڕینی نه‌ته‌وه‌ی كورده‌وه‌ به‌شدارن هاوخه‌من هه‌وڵ ئه‌ده‌ن تا ئه‌م ساته‌وه‌خته‌ ، كه‌دوابرایان شه‌هید دكتۆر ڕزگاره‌ له‌شه‌ڕی داعش لەنزیک شاری موسڵ گیانی فیداكردوه‌ .

بیره‌وه‌ریه‌تاڵه‌كان به‌هیچ جۆرێك یه‌خه‌ی خانه‌واده‌ی شه‌هیدان به‌رنادات ، سواره‌ هه‌وڵ ئه‌دات له‌بیره‌وره‌یه‌كانی خه‌باتی پێشمه‌رگایه‌تیدا ، باس له‌ موهه‌ندیس عه‌بدوڵا ئاغای براو هاو‌سه‌نگه‌ری بكات ، ئه‌ندازیاری جوانه‌مه‌رگ خه‌باتی چه‌كداری و سیاسی دژی ڕژێمی داگیركه‌ری به‌عس بوه‌ ، له‌سه‌ره‌تای لاوێتی یه‌وه‌ وه‌ك سیمبولێكی سه‌ربازێكی وون له‌ناخی خاكو نیشتمانێكی به‌شخوراو چاوی به‌ دونیاكه‌وتوه‌ ، شه‌هید عه‌بدوڵا گه‌نجێك له‌ناو نازو خۆشه‌وسیتی خێزانه‌كه‌یدا له‌هیچی كه‌م نه‌بوه‌ ، له‌ناو هه‌ڤاڵانی پێشمه‌رگه‌شدا جیاوازیه‌كه‌ی ئه‌وه‌نده‌ بوو كه‌سێكی خاكی بێنازو قسه‌ خۆش و جوامێربوه‌ ، له‌خه‌می هه‌مواندا ژیاوه‌ ، باوه‌ڕی به‌شه‌ڕی براكوژی نه‌وبوه‌ و هه‌میشه‌ هه‌وڵیداوه‌ لایه‌نه‌ سیاسیه‌كان یه‌كبن دۆستایه‌تی برایه‌تی هه‌بێت له‌نێوانیاندا .

_ئه‌ندازیارعه‌بدوڵا له‌سالی 1946له‌ده‌ڤه‌ری شارباژێڕ له‌بنه‌ماڵه‌یه‌كی عه‌شایه‌ر له‌دایك بوه‌ ، قۆناغه‌كانی خوێندنی سه‌ره‌تایی و ناوه‌ندی و دواناوه‌ندی له‌ پارێزگای سلێمانی ته‌واو كردوه‌ ، خوێندكارێكی زیره‌ك و ووریا بوه‌ ،‌ له‌ته‌ك ئه‌وه‌شدا به‌هۆی بنه‌ماڵه‌ شۆڕشگێڕه‌كه‌یه‌وه‌ ، خولیای كاروباری سیاسی ده‌كه‌وێته‌ مێشكیه‌وه‌ ، به‌هۆی بارودۆخی ئه‌وكاته‌ی شاره‌وه‌ له‌ساڵی 1967 ڕوده‌كاته‌ به‌غدا له‌وێ پۆلی شه‌شه‌می دواناوه‌ندی ته‌واو ده‌كات ، دوای ئه‌وه‌ له‌كولیژی ئه‌ندازیاری له‌ زانكۆی موسڵ وه‌رده‌گێرێت ، پاش ئه‌وه‌ی كۆلیژی ئه‌ندازیاری به‌شی بیناسازی ته‌واو ده‌كات ، ساڵی 1971 ده‌بێت به‌پێشمه‌رگه‌ ، نوسه‌رو ڕۆشنبیرێكی چاوكاراوه‌و چاودێرێكی سیاسی ئه‌وكاته‌ده‌بێت ، له‌به‌ر دلێری و ئازایه‌تی پله‌كانی پێشمه‌رگایه‌تی بڕیوه‌ تا ئامربه‌تالیۆنی له‌هێزی خه‌بات ، به‌شداری زۆربه‌ی شه‌ڕه‌ سه‌خته‌كانی شۆڕشی ئه‌یلولی كردوه‌ له‌ساڵی 1974 دا .

_پاش نسكۆ ....

له‌گه‌ڵ بنه‌ماڵه‌ی پێشمه‌رگه‌كان به‌ره‌ و باشووری عێراق ده‌یان گوازنه‌وه‌ له‌شاری سه‌ماوه‌ جێنشینیان ده‌كه‌ن ، له‌وكاته‌دا ده‌ی گه‌ڕێنه‌وه‌ سه‌ر پیشه‌ی ئه‌ندازیاری و دای ده‌مه‌زرێنن ، سه‌رسه‌ختانه‌ له‌ گه‌ڵ هه‌ڵدانه‌وه‌ی شۆڕشی نوێی گه‌له‌كه‌ماندا بۆ ده‌رفه‌تێك ده‌گه‌ڕا بگه‌ڕێته‌وه‌ شاخ ، له‌ساڵی 1980دیسانه‌وه‌ ده‌بێته‌وه‌ به‌پێشمه‌رگه‌ .

_شه‌هیدعه‌بدوڵا .... له‌ده‌ست پێكدا خه‌مێكی گه‌وره‌ سه‌ردڵی ده‌گرێت ، له‌نسكۆی ساڵی 1975له‌گه‌ل فه‌تاح ئاغای بری لێك داده‌بڕێن ، له‌شۆڕشی نوێ به‌ره‌و دیداری برا ده‌كه‌وێته‌ ڕێ و شاخه‌وشاخ ته‌یده‌كات ، به‌داخه‌وه‌ هێزه‌كانی پێشمه‌رگه‌ له‌داستانێكی خوێناوی گه‌وره‌دا له‌گه‌ڵ هێزه‌كانی عێراقدا ڕوبه‌ڕوو ده‌بنه‌وه‌ ، كاك فه‌تاح ئاغای برای شه‌هید ده‌بێت له‌به‌رواری 1/11/1980به‌دیدار ڕۆحه‌ زیدوه‌كه‌ی ناگات ، پاش ماڵئاوی له‌ ڕؤحی برای شه‌هید ده‌گه‌رێته‌وه‌ بۆ چیای سورێن له‌ته‌ك هاوخه‌باته‌كانی ده‌جه‌نگن بۆ دواڕۆژی ئازادی گه‌ل ونیشتمان ، له‌وكاته‌دا ناوچه‌ی چوارتای پارتی داده‌مه‌زرێنن ، خۆی و هه‌ڤاڵه‌كانی به‌ردی بناغه‌ی ناوچه‌كانی تری سلێمانی و پێنجوێن و دوكان داده‌نێن ، له‌به‌ر دڵسۆزی ئازایه‌تیان زۆربه‌ی هه‌ڤاڵه‌كانی وه‌ك خۆی شه‌هیدبون .

_به‌ربونه‌ی له‌شاخێكی به‌رزه‌وه‌ ..

هه‌ڤاڵ عه‌بدوڵا له‌سه‌ رچیایه‌كی به‌رزه‌وه‌ به‌رده‌بێته‌وه‌ به‌سه‌ختی بریندار ده‌بێت ، نامه‌یه‌ك بۆ سواره‌ی برای ده‌نوسێ بۆسلێمانی ئه‌ویش له‌وهه‌موومه‌ترسیه‌دا له‌گه‌ڵ دكتۆر نه‌جمه‌دین ده‌چێت به‌هانایه‌وه‌ ، له‌ناو به‌فرێكی سه‌ختی زستانه‌دا له‌گوندی دۆڵه‌چوت ئه‌یدۆزنه‌وه‌ ، به‌زه‌حمه‌ت ده‌گه‌نه‌ لای و برینه‌كانی بۆ تیمارده‌كه‌ن ، دوای ئه‌وه‌ی هه‌ست به‌باش بونی ته‌ندروستی ده‌كات ، له‌ته‌ك سواره‌ی برای ده‌چن بۆشاری مه‌ریوان و له‌وێشه‌وه‌ ده‌گه‌نه‌ تارانی پایته‌ختی ووڵاتی ئێران ، له‌نه‌خۆشخانه‌ ده‌مێنێته‌وه‌و نه‌شته‌رگه‌ری بۆده‌كه‌ن ، پاش ماوه‌یه‌ك له‌ ڕێگه‌ی په‌یوه‌ندیه‌كانی حیزبه‌وه‌ ڕه‌وانه‌ی ووڵاتی نه‌ماس كرا بۆ چاره‌سه‌ری ته‌واو ، ئه‌وجاره‌ش عه‌بدوڵای موهه‌ندیس له‌مردن ڕزگاری ده‌بێت به‌ڵام شه‌هید بوون هه‌ر به‌دوایه‌وه‌تی و لێی ناگه‌رێ ، دوای چاك بونه‌وه‌ دیسانه‌وه‌ ده‌گه‌ڕیته‌وه‌ بۆ ناو هێزی پێشمه‌رگه‌ .

_شه‌هید ته‌نها ئه‌ندازیاری بیناسازی نه‌بوه‌ به‌ڵكو ئه‌ندازیاری ئاشتی و برایه‌تی حیزبه‌كانیش بوه‌ ........ له‌ساڵی 1982له‌شارباژێڕی زێدی باو باپیرانی سنوری ناوچه‌ی چوارتا زۆر فراوان ده‌بێت ، هێزێكی گه‌وره‌ی پێشمه‌رگه‌ دروست ده‌كات هه‌وڵی برایه‌تی له‌نێوان حیزبه‌كاندا ئه‌دات ، له‌و ناوچه‌یه‌ زیاتر له‌ساڵێك ده‌مێنێته‌وه‌ له‌گه‌ڵ زۆربه‌ی حیزبه‌كانی وه‌ك پارتی و یه‌كێتی سۆشیالیست و حیزبی شوعی و پاسۆك پێكه‌ باره‌گا‌چێ ده‌كه‌ن وه‌ك هاوپه‌یمان له‌سه‌نگه‌رێكدا ئه‌ژێن ، ئه‌وه‌ش به‌هه‌ڵوێست و هیمه‌تی جه‌نابیان ده‌بێت ، هه‌روه‌ك پێشتر باسمان كردن ئه‌ندازیار به‌هۆی كه‌و‌تنه‌خواره‌وه‌ وبریندار ئه‌بێت ، ده‌چێته‌ ده‌ره‌وه‌ی ووڵات له‌و دابڕانه‌دا شه‌ڕی براكوژی له‌ شارباژێڕه‌وه‌ ده‌ست پێده‌كاته‌وه‌ .

_عه‌بودڵا ئاغا .... دوای گه‌ڕانه‌وه‌و چاكبونه‌وه‌ی بێ هیوانه‌بوه‌ بۆ هه‌لێكی تر ده‌گه‌ڕا ئاشته‌وایی حیزبه‌كان دروست كاته‌وه‌ .....

له‌ساڵی 1986له‌گه‌ڵ وه‌فدێكی پارتی به‌سه‌ر په‌رشتی فازیل میرانی ده‌گه‌نه‌ سه‌ركردایه‌تی یه‌كێتی نیشتمانی ، له‌و دیداره‌دا به‌رێز مام جه‌لال هێرۆخان ده‌بینن له‌یاخ سه‌مه‌ر زۆر ڕێزیان لێ ده‌گرن ، پاش واژۆكردنی ڕێكه‌وتنی یه‌كێتی و پارتی ، شه‌هید ده‌بێته‌ به‌رپرسی هێزی سه‌ربازی لقی چوار و باره‌گاكه‌ی له‌ سورێنه‌وه‌ ده‌گوازێته‌وه‌ بۆ قه‌ره‌داخ له‌گوندی جافه‌ران جێگیرده‌بن ، ئێسته‌ زۆر نزیكه‌ له‌سنوری سلێمانیه‌وه‌ هه‌ست ده‌كات ئه‌ركێكی نوێی بۆ دروست بوه‌ ، ده‌ست ده‌كات به‌زیند وكردنه‌وه‌ی ڕێكخستنه‌كانی حیزب و تاڕاده‌یه‌كی زۆر باش سه‌ركه‌توده‌بێت ، هێنده‌ ڕۆحی گه‌رمه‌ و كۆڵنه‌ده‌ره‌ زۆرجار ئاگاداری ده‌كه‌نه‌وه‌ پێویسته‌ به‌ووریایه‌وه‌ كار بكات ، بێمنه‌ت ئه‌بێت له‌خۆ پاراستن ، گه‌رداری ئازادی به‌خوێن ئاو نه‌ردیت قه‌ت به‌ناگرێت ، تاكه‌ دروشمی ئه‌و پیاوه‌ نوسه‌ره‌ ڕۆشنبیره‌ ئه‌ندازیاره‌ ده‌بێت .

_چۆنیه‌تی شه‌هید كردنی‌ ..... دوای ئه‌وه‌ی په‌یوه‌ندیه‌كی زۆر توندو تۆڵ دروست ده‌كات ، له‌گه‌ڵ هاوڵاتیانی ناوچه‌كه‌و شانه‌ ڕێكخستنه‌كانی ناوشاردا ، له‌به‌رامبه‌ریشدا ڕژێمی به‌عس له‌ڕێگه‌ی سیخوڕكانیه‌وه‌ سه‌رقاڵی پیلان دانان بوه‌ بۆ ئه‌وه‌ی ده‌سگیری كه‌ن یان بیكوژن ، خاڵی لاوازی شه‌هید زۆری متمانه‌یه‌ به‌هه‌موان ، سه‌رقاڵی ئه‌وه‌نیه‌ كێ باشه‌و كێ خراپه‌ له‌دڵه‌وه‌ خزمه‌تی میوان دۆستانی كردوه‌ ، له‌وسه‌روبه‌نده‌دا ڕژێم له‌ڕێگه‌ی زۆڵه‌ كوردێكی خیانه‌تكار و خه‌ڕاته‌وه‌ واته‌ ( بێناسنامه‌ ) به‌ناوی (ساله‌ خه‌یات ) و حه‌مه‌كه‌ریم خه‌ڕاتی برایه‌وه‌ ، كه‌ نازناوی خه‌یاتیان له‌خۆیان ناوه‌ بۆ ئه‌وه‌ی له‌قه‌بی خه‌ڕات له‌خۆیان بكه‌نه‌وه‌ ، خۆیان به‌خه‌ڵكی ده‌ره‌به‌ندیخان ناساندوه‌ ، له‌دوای نسكۆ توانیویانه‌ دڵسۆزانه‌ مه‌فره‌زه‌ی خاسه‌ی ئیستیخبارات دروست كه‌ن له‌ناوچه‌ی گه‌رمیان و قه‌ره‌داغ و شاره‌زوور ، له‌ساڵی 1981 فه‌رمانده‌یه‌كی یه‌كێتی به‌ناوی دكتۆرچیا و هاوه‌ڵه‌كانی شه‌هید ئه‌كه‌ن ، چه‌ندین پێشمه‌رگه‌ی لایه‌نه‌كانی تری وه‌ك حیزبی شوعیان شه‌هید كردوه‌ ، له‌هه‌مان كاتدا فه‌وجێكی جاشایه‌تی خه‌فیفه‌یان هه‌بوه‌ سه‌دان چه‌كداری له‌خۆ گرتوه‌ ، نه‌خشه‌ی ئه‌مجاره‌یان ئه‌هریمه‌نانه‌بوه‌ له‌ڕێگه‌ی هاوڕێ یه‌كی دڵسۆزی شه‌هید عه‌بدوڵاوه‌ به‌ناوی ( قادر غه‌فوری ئه‌ندازیار ) كه‌سێكی دڵپاكو نیشتمان په‌روه‌ربوه‌ ، كاریگه‌یان كردوه‌ته‌سه‌ری ، ڕایان سپاردوه‌ بڵێ به‌ كاك عه‌بدوڵا ئێمه‌ تاوانبارین تابینه‌قاقه‌مان له‌خیانه‌ت چه‌قیوه‌ و ئه‌مانه‌وێت چالاكیه‌كی گه‌وره‌ ئه‌نجام بده‌ین بۆ ئه‌وه‌ی شۆڕش لێمان خۆش بێت ، له‌چڵكاوی غه‌در و خیانه‌ت ڕزگارمان بێت ، هێدی هێدی زۆڵ ئاسا خۆیان له‌ شۆڕش و كاك عه‌بدوڵا نزیك ده‌كه‌نه‌وه‌‌ ، كار ده‌گاته‌ ئه‌وه‌ی (حه‌مه‌خه‌ڕات ) خۆی ده‌گه‌یه‌نێته‌ ناوچه‌ ڕزگار كراوه‌كان ، ماوه‌ی هه‌فته‌یه‌ك ده‌مێنێته‌وه‌ شونێكی گونجاو دیار ده‌كات بۆ چێ كردنی خێزانه‌كانیان له‌دوای ئه‌نجامدانی چالاكیه‌كه‌یان ، چه‌‌ند جارێك شه‌هید وهه‌ڤاڵه‌كانی له‌ شاری سلێمانی له‌ته‌كیاندا داده‌نیشن ، پاش ماوه‌یه‌ك نه‌خشه‌ی داگیركردن و به‌ده‌سته‌وه‌دانی ( قه‌زای ده‌ربه‌ندیخان ) ده‌خه‌نه‌ ڕوو ، شه‌هید زۆری پێ با شبوه‌ به‌پێویستی زانیوه‌ حیزبه‌كانی تریش به‌شداری كه‌ن له‌و چالاكیه‌دا دانیشتنی له‌گه‌ڵیاندا ئه‌نجام داوه‌ ، هه‌رچه‌نده‌ ئاگاداریان كردوه‌ به‌هیچ جۆرێك ئه‌وجاشانه‌ جێگه‌ی سیقه‌نین ، به‌ڵام جه‌نابیان سوربوه‌ له‌سه‌ر گرتنی شاری ده‌ربه‌ندیخان وه‌ك چالاكیه‌كی زۆر بێوێنه‌ هاتوه‌ته‌ به‌چاوی ، پاش ماوه‌یه‌ك شه‌هید ده‌گه‌ڕێته‌وه‌ بۆماڵه‌وه‌ له‌نزیك خێزانه‌كه‌یدا پشویه‌ك بدات ، له‌وكاته‌دا بروسكه‌یه‌ك ده‌نێرن بۆماڵه‌وه‌ پێویسته‌به‌زووترین كات بگه‌رێته‌وه‌ بۆ ده‌ربه‌ند فه‌قه‌ره‌ كاتی چالاكیه‌گه‌وره‌كه‌یان زۆر نزیكه‌ ، موهه‌ندیس قادر و جه‌ماعه‌تی سلێمانی چاوه‌رێن ، له‌به‌رواری 22/9/ 1987 بۆ دواجار ڕێگه‌ سلێمانی ده‌گرنه‌به‌رله‌ماڵی خۆفرۆشان ده‌مێننه‌وه‌ ، ڕێوی ئاسا جاشه‌كان ده‌یانخه‌نه‌ داوه‌كه‌وه‌و ته‌سلیم به‌ حیزبی به‌عسیان ده‌كه‌ن ، له‌به‌رواری 23/9/1987 هه‌ردو ئه‌ندازیار عه‌بوڵائاغاو قادرغه‌فورو له‌ته‌ك هه‌ڤاڵ نه‌وزاد مه‌جید شه‌هید ده‌كرێن ، منیش ئه‌وكات پێشمه‌رگه‌بووم به‌داخه‌وه‌م چه‌ند ڕۆژێك له‌خزمه‌تیدا بوین ، ئه‌ویش له‌قه‌ره‌داخه‌وه‌ هاتنه‌وه‌ بۆ شاخی سورێن و باره‌گاكانی كه‌ڕه‌جاڵ .

تۆڵه‌ به‌زه‌بره‌ به‌ڵام به‌سه‌بره‌ ...

ده‌سته‌یه‌ك گیان فیدا و قاره‌مان كه‌بریتی ده‌بن له‌ حه‌وت پێشمه‌رگه‌ خۆیان ئاماده‌ ئه‌كه‌ن بۆ تۆڵه‌ كردنه‌وه‌ ، خۆیان شیك پۆش ده‌كه‌ن تفه‌نگه‌كانیان تاقی ده‌كه‌نه‌وه‌ ده‌كه‌ونه‌ حاڵه‌تی ئاماده‌ باشیه‌وه‌ ، به‌ سه‌یاره‌یه‌كی ژماره‌ سه‌وزی ده‌ستگیركراوی حكومه‌ت ، به‌ڕۆژی ڕوناك به‌ره‌و شاری هه‌ڵه‌مه‌ت وقوربانی به‌ناو بازگه‌كانی عه‌ربه‌ت و سلێمانی تێ ده‌په‌ڕن ، له‌گه‌ڕه‌كی توی مه‌لیك ده‌وه‌ستن سه‌رژمێریه‌كی خۆیان ده‌كه‌نه‌وه‌ بۆ دڵنیابون ، پێش چالاكیه‌كه‌یان حه‌زیان له‌ جگه‌رو كه‌بابی شارده‌بێت ، فه‌رمانده‌ی هێز دڵێان ناشكێنێ و كاتیش زۆماوه‌ به‌ده‌سته‌وه‌ ، خۆیان تێر و پڕده‌كه‌ن له‌كه‌باب وجگه‌ر و چای ڕه‌ش ده‌كه‌ن به‌سه‌ریا و سه‌روجگه‌ره‌ش ده‌كێشن ، وه‌ك كه‌س له‌ماڵه‌وه‌ نه‌بێت بێترس و گیان فیدان ، له‌وكاته‌دا چه‌كادارێكی میری ده‌یان ناسێته‌وه‌ واده‌زانێ ته‌سلیم بونه‌ته‌وه‌ سڵاویان لێ ده‌كات وه‌ڵامی ئه‌ده‌نه‌وه‌ ، خیانه‌تكاران هێشتا له‌خه‌ودان بۆكات كوشتن به‌ره‌و سه‌رچنار ده‌كه‌ونه‌ ڕێ ، زۆر دلێرانه‌ ‌هه‌ڵسوكه‌وت ئه‌كه‌ن له‌وێش ده‌یان ناسنه‌وه‌ ، له‌كاتی دیاری كراودا به‌ره‌ ئامانجه‌كه‌یان ده‌كه‌ونه‌ڕێ بۆ گه‌ڕه‌كی ڕیعایه‌ شه‌باب به‌ناوی گه‌یاندنی نامه‌یه‌ك بۆ ( ساله‌خه‌ڕات )، كاتی ده‌گه‌نه‌ به‌رده‌م ماڵی تاوانبار چه‌ند چه‌كدارێكی ئه‌وان له‌به‌ر ده‌رگاده‌بن بۆ پاسه‌وانی ، هه‌ریه‌كه‌یان كڵاشینكۆفێكی به‌ده‌سته‌وه‌یه‌ ، زۆربه‌هێمنی و له‌سه‌رخۆداده‌به‌زن ، فه‌رمانده‌ له‌ چه‌كداره‌كان نزیك ئه‌بێته‌وه‌ ئه‌وانی تریش داده‌به‌زن هه‌ریه‌كه‌و نێچیرێك بۆ خۆی هه‌ڵ ئه‌بژێرێت ، پاش سڵاو فه‌رمانده‌ ئه‌ڵێ هاتوین بۆلای كاك حه‌مه‌ساڵه‌ح خه‌یات یان كاك حه‌مه‌كه‌ریم خه‌یات ، نامه‌ی مه‌رگیشی به‌ده‌ستیه‌وه‌یه‌ ئه‌ڵێ نامه‌یه‌كی گرنگمان پێیه‌ بۆیان ، چه‌كدارێكیان ئه‌ڵێ لێره‌نین چون بۆ سه‌فه‌ری به‌غدا ته‌نها كاك حه‌مه‌ی خه‌یات لێره‌یه‌ ، هه‌رئێستا ئاگاداری ئه‌كه‌م چاوه‌ڕی كه‌ن ، فه‌رماده‌ی قاره‌مان به‌هێمنی ئه‌لێ فه‌رمون هیچ فه‌رقیان نیه‌ ، حه‌مه‌ خۆی و چه‌ند چه‌كدارێكی تر دێنه‌ ده‌رێ هه‌موان تفه‌نگیان به‌ده‌سته‌وه‌یه‌و چوارده‌ور گیراوه‌ ، تێك ئاڵاون كوڕی ئازاو قاره‌مان ده‌ور ده‌گێڕێ ، به‌چاو حه‌مه‌ تێ ده‌گه‌یه‌نێ گوایه‌ نامه‌كه‌ زۆر گرنگه‌ هه‌ندێك دوری ده‌خاته‌وه‌ بۆ ئه‌وه‌ی كه‌س به‌نهێنیه‌كه‌نه‌زانێ ، فه‌رمان‌ده‌ به‌خێرای تفه‌نگه‌كه‌ی داده‌گرێت حه‌مه‌ به‌سزای خۆی ده‌گه‌یه‌نێ له‌و لاشه‌وه‌ له‌چاو تركانێكدا هه‌موان نێچیری خۆیان ڕاو ده‌كه‌ن ، سه‌رشه‌قامه‌كه‌ ده‌كه‌نه‌ جۆگه‌له‌ی خوێنی تۆڵه‌ ، ئوتۆمۆبێله‌كه‌شیان به‌نارجۆك ده‌ته‌قێننه‌وه‌ ، به‌داخه‌وه‌ له‌زۆر به‌ی ماڵه‌كانه‌وه‌ ده‌ست ده‌كرێت به‌ته‌قه‌كردن هه‌رچه‌نده‌ به‌ره‌و ڕوی ئه‌وان نابێت دیاره‌ چه‌كدارانی خه‌فیفه‌ بون ترساون ، له‌سه‌ر بانی دراوسێ یه‌كیانه‌وه‌ سه‌رۆك جاشێك ده‌ست ڕێژده‌كات به‌ناو پێشمه‌رگه‌كاندا دوو كه‌سان بریندار ده‌كه‌ن برینه‌كانیان سوكه‌ ده‌بن ، له‌یه‌ك چركه‌دا چه‌كداره‌كه‌ی دراوسێش بێ ده‌نگ ده‌كه‌ن ، هێزكه‌ی پێشمه‌رگه‌ هه‌ڵۆ ئاسا به‌په‌له‌ سواری پیكابه‌كه‌یان ده‌بن تا دوریش ده‌كه‌ونه‌وه‌ گوێان له‌ته‌قه‌ ده‌بێت ، به‌بێ دواكه‌وتن زۆر ئازایانه‌ له‌كوێ وه‌ هاتون له‌وێشه‌وه‌ ده‌گه‌ڕێنه‌وه‌ ، كه‌خه‌ته‌رترین ڕێگه‌یه‌ گه‌ڕانه‌وه‌یان له‌ بازگه‌ی سلێمانی عه‌ربه‌ته‌وه‌ ، یه‌كێك له‌ پێشمه‌رگه‌ برینداره‌كان له‌ هێزه‌كه‌ داده‌بڕێت سه‌یاره‌یه‌كی ته‌كسی لادای نیشتمان په‌روه‌ر سواری ده‌كات تا ده‌ی گه‌یه‌نێته‌ ماڵی ناسیاوێك ، پاش چه‌ند ڕۆژ تیماركردن ده‌گه‌ڕێته‌وه‌ لای هاوسه‌نگه‌ره‌كانی ، له‌دوای ڕاپه‌ڕینی گه‌لی كوردستان ( حه‌ساڵه‌ح خه‌یاتیش ) به‌سزای خۆی ده‌گات .

له‌كتێبی بیره‌وه‌ری داستانی تۆڵه‌

له‌نوسینی : سواره‌ محه‌مه‌د ئه‌مین ئاغا

ئا : سه‌یدعه‌تا