ئەمە بڵاوبكەوە
FaceBook  Twitter  

دڕکی حوزن!

پێم دەڵێن

بۆچی پەرێزی هۆنراوەکانت

سەراپا دڕکی حوزنیان لێ ڕواوە

و

قەڵەمی حەزت

سیخناخە لەمرەکەبی ڕەشبینی

بۆچی

شیعرەکانت وەرزی پاییزیان پۆشیوە

و

دێڕەکانت نەزیفن بەفرمێسک

بۆچی

هەردەم کێڵگەیەکی تەژی لەحەسرەتی

و

شەتڵی بێزاری دەنووسیتەوە

بۆچی

گریانت کردووە بە ملوانکەی

خۆزگەکانت

و

هێندە هاوەڵی تەنیاییت

بۆچی

شەقامی وشەکانت

بیابانی لێ هەڵدەستێ

و

گیرفانی ڕستەکانت

پڕن لەچۆڵەوانی

بۆچی

چۆڵەکەی نیگات

هنێدە کزوماتە

و

ئاسمانی خەونەکانت

بێ بارانی دایپۆشیوە

پێم دەڵێن

هێشتا سەر لەبەیانی تەمەنتەو

دەستت داوەتە گۆچانی پیری

هێشتا

وشەکانت زمانیان نەگرتووە

و

لەئەشق دڵشکاو

لەژیان زویری

کەس لێم ناپرسێت

کە من بۆچی هێندە خەفەتبار و مەئیوسم

ئایە بۆ عەشقێکی مەحاڵ دەنووسم؟!

------------