ئەمە بڵاوبكەوە
FaceBook  Twitter  

1

سلێمانی، منارەیەك بوو لە هەتاو

درەختێ‌ بوو لە مۆنادی شینی ئاقیق

سپێدەیەك بوو لە خوناو

با هات پرچی داهێنا

باران هات تەڕی كردەوە

بەفر هات سپیی كردەوە

سوار هاتن ڕەشیان كردەوە

2

كتێبی شار دەكەمەوە

پیرۆزترین كتێبی خوایە

لە دەرگای شار دەدەمەوە

گەورەترین دەرگای دونیایە

3

سلێمانی، نامەوێ‌ دارالمولكی بابان بی

من دەمەوێ‌ تۆ ڕەونەقی جوانى و

هەم مەلەكوتی ئینسان بی

4

لە سەرشەقام چڵەدارێكم نووسییەوە

لە ڕەگەزی درەختی دەرگای سەرا بوو

كە دامگیرسان، هەڵمی مێژووی لێ‌ هەڵدەسا

ورد ورد فرمێسكی هەڵدەڕژان

5

جاران لە شار كە گوڵە گەنمێ‌ دەپشكووت

ڕێ‌ ڕێ‌ بۆنی دەگەیشتەوە چەمی وان

ئێستا گوڵجاڕیش دەپشكوێ‌

بۆنی ناگاتە كانێسكان

6

كە چوومەوە بۆ لای پیروەیسی مه‌ڵكەندی

گەنجەكان باریان كردبوو

جگە لە شەوێكی درێژ

هیچم نەدی

7

سلێمانی كتێبێكە لە ڕووناكی

لەوەتەی دایانخستووە

شەیتان لە ناویا نووستووە

8

كتێبی پاك

دەستی پاك دەیكاتەوە

9

چوارباغ دەڵێی چوارچرایە

قازی ئاسا

لە چوارمێخەی خەمی نیشتمان درایە

10

كچەكانی سلێمانی

دەڵێی شەونمی سەر گیان

كە خۆر هەڵدێ‌ دەتوێنەوە

سپێدانیش، خۆیان و مشتێ‌ تریفە

بۆناو كتێبی مەحزونی شار دێنەوە

11

لە تووی مەلیك

میرەكانم بیر كەوتنەوە

لەبەر كەزی درێژو گەشی پەریخان

بریقەی زرمەی شمشێریان

دەگەیشتە تاقی ئاسمان

ئێستاش پەریخان هەر ماوە

خۆی لە تارا شاردۆتەوەو شانەی عاجی فڕێداوە

بە دیار تەونی هەڵوەشاوەی

میرنشینەكان وەستاوە

12

كوانێ‌ ئەو چین و ماچینە ؟

شیعرێ‌ لەدیوانی نالی

وەك تنۆكێ‌

بە سەر گەڵای

گۆڕستانی مامە یارەوە تكا بوو

گوتی بەر لەوەی باركەم و جێیان هێڵم

لەمێژ بوو سوپا شكابوو

13

ئەوەی من هەستی پێدەكەم، دەینووسمەوە

ئاگرێكە لە شاباڵان تەكاندەدا

داوای فڕینم لێدەكا

14

ویستم بچم بۆ دەرگەزێن

سەرێ‌ لە دەرگای زین بدەم

نە زین ئەو زینەی جاران بوو

نە مەم لەڕەنگی باران بوو

ئاشقانیش مات ومەلوول

لە ژێر زناری ئەوینی، بە فێڕۆ چوویان

وەستا بوون

15

زەرگەتە دەڵێی كۆترە

لە نێو پیرۆزەی ئاسماندا

بە سەر بێچووی خەمی مێژوو، هەڵكورماوە

لەدەرگای هەرماڵێ‌ دەدەی

تەنها مشتێ‌ خۆڵەمێشی پەریخانی تیا ماوە

16

شەقامەكان، هەمووی هەر دەنگی شكانە

هەڵدانەوەی كوانووی برین

وردوخاشبوونی ئێسقانە

ئەوەی وەك باران دەبارێ‌

تەنها هاواری ئینسانە

17

كە لە پەنجەرەی ئەزمڕەوە

لە ناوشووشەی بەفری چیا

سەیری سلێمانیم دەكرد

مەل قەتار قەتار ڕەت دەبوون

مزگەوتەكەی شێخی گەورە

تاك و تەنها دەمایەوە

منارەكەی، سەری لە ساماڵ دەردێناو

بۆ تابان دەچەمایەوە

18

ئێستا شار وەك جاران نییە و بێ‌ نموودە

بێ‌ هەیبەتی خەنجەرەكەی ناو پشتوێنی

شێخ مەحمودە

19

سلێمانی، دەزانم تۆ وەك قەقنەس وای

لە ئاسماندا، لە ناو خۆڵەمێشی خۆتدا

زیندوو دەبییەوە

تۆ لە ڕەگەزی كاژی

تەیری گول لە گەڵاتا ناژی