ئەمە بڵاوبكەوە
FaceBook  Twitter  

 

کەبەدوای سیمای پیریدا دەگەڕای

کەس وەکو من

ئاوڕێکـی لەسەر شانی دانەناو

لە شیعرێکـا پایزت هەڵـــگــرێتەوە !

لە ئاوێنەی تڵخی ئەو سەفەرەت پرسیـبـو :

کوا شیعر ،

قسەی دڵی ئێمە دەکـا ؟!

بەڵام نــا !

کە چڵێک لە ئێوارەی ئەوێ

دەکەوێتە چاوی غوربەتەوە

نەهاتنت لە هەموو کات تەڕ تــر دەبــێ !

من لەکاسەی سەری ئەو یەقینەوە

خوێنی شیعرو بۆنی تۆم

لەژێر ڕەگی دار هەرمێیەک حەشار دەدا !!

شیعر نەبــا

کێ دەیزانی دڵی هەتاو چەند گەورەیە ؟!

ئەو دەمەی ،

تەفسیری کوشتن لە کتێبێکدا کۆن دەبــێ و

لەوسەری ئاواییەکانی وەریـنەوە

حەیرانێک ،

بە باراندا دێتەوە !

ئەو دەستە تەزیوەکانی بەفر و کونی شمشاڵێکی کۆن

دەخاتە بەرتاڤگـەی شیعرێکی سپی

تا گۆرانیەک ئاشق دەبـێ !!

ئەو دەمەی ،

لە پشت ئەو گۆرانیانەوە دەڕوا

کە پایزیان لێ دەچۆڕێتەوەو

کۆڵوانەی باخچەیەکی پۆشتە

دەخاتە سەرشانی کۆترێکــی بـێ ئەمەل !

کەدەرگای زەمەنت داخستەوە

گوێت لە شــــکـــانی دڵی (بــا ) بوو ؟!

گوێت لەنرکەی مردنی ئاقیبەت بوو ؟!

لە کۆڵانی فیراقـا ،

قوڕاوی ئەو غەدرەی

لە برژانگەکانی مرازو لەسێبەری حەنین و

لەشانی نامورادی هەڵدەسوو ؟!

شیعر نەبــا

لەوانەبوو بەو زوانە

گۆرانیەک نەنێریە سۆراغم

لەوانەبوو

زۆر شت بگۆڕێ :

باران قۆپچەی کراسەکەی داخاتەوەو

نەهێڵـێ هەورێکی گەنج ستیانەکەی ببینــێ !

لەوانەبوو

نوری شیعرێک

نەیەتەوە بەر پەنجەرەی خامۆشیت !

نەهێڵێ خەیاڵ جارێکی تر

عەتـر لە شانی بدات !!

خۆمن بەخۆڕایی ناڵێم : شیعر نەبــا

باڵای ئەو هەمو یەئسە

لەهەیوانی کام پایزەدا ڕادەکشا ؟!

بۆ سۆراغی ماچێـک

سەفحەی ڕوومەتی کام بارانـە

جێگەیەکی بۆ لێو دەمـا ؟!

شیعر نەبــا

لێم یەقینە نەتدەزانـی بە مردنـم و

پرچی گەلێک بیرەوەریش

بەدڕک و داڵـی کۆچێکی شینەوە جێ دەمـا !!