ئەمە بڵاوبكەوە
FaceBook  Twitter  

سازدانی: هێرش مغدید

مەهدی حەسەن یەكێكە لە كەسایەتییە هونەرییەكان لە بواری شانۆ‌و دەرهێنەرێكی بەئەزموونیشە، لە گۆشەی یەك پرسیار لێمان پرسی: هۆكاری كەمی یاخود نەبوونی بینەری شانۆ بۆچی دەگەڕێنیتەوە؟ لە وەڵامی ئەو پرسیارەدا هونەرمەند مەهدی بەو شێوەیە وەڵامی داینەوە.

هۆكار زۆرن لەسەرەی هەمووشیان كەمتەرخەمی حكومەتە، لەو هەولێرە هۆلێكت نییە كاری شانۆی تێدابكرێت ئەوەی ئێمە ئەنجامی دەدەین لەناچارییە و تەنیا بۆئەوەیە كەكارەكانمان رانەوەستێ، كە بینەرهاتە هۆڵێك كورسیەكەی لەسەری دادەنیشێ كورسیەكی باش نەبێ ، لەزستان لەبەر سەرما بلەرزێ و لەهاوین هەموو گیانی ببێتە ئارەقە، جارێكی دیكە تاقەتی نابێت بێتەوە، لەم حالەتە چی روودەدات؟! ئێمەی شانۆكاریش ناتوانین بە بلیت فرۆشتن بینەر بێنینە هۆڵەكە لەبەر ئەوەی خوا خوامانە بینەر بێت. هۆڵی رۆشنبیری پارەیەكی زۆری بۆ تەرخانكرا بۆ تەعمیركردن كەچی بەكەلكی هیچ نایەت تەنانەت هونەرە میللیەكان كەلەوێ رۆژانە مەشق دەكەن زۆربەیان پشتیان تەواو نیە لەبەرئەوەی تەختەكەی سەقەتە، رەچاوی هەڵواسینی رووناكی نەكراوە ، یەك پەردەی نییە، لەوەدەچی ئەندازیارێك هاتبێ هۆڵی ماڵێكی نۆژەن كردبێتەوە، خاوەن ماڵیش هیچ نەزان بێت. پارەی زۆر سەرف دەكرا كە پارە هەبوو هۆڵێك دروست نەكرا، لە شاری سلێمانی بەناوی پایتەختی رۆشنبیری بیست ملیار دینار تەرخانكرا بۆ ژێرخان . بۆ هێنانی چاپخانە و دروست كردنی گەلەری و هۆڵی سینەما و شانۆ . كەچی پارەكە تەواو بوو شاریش هەروەك خۆیەتی ئەوەی هەبوو هەر ئەوەیە و بێ زیادبوون . من چومە پرۆڤەی یەك لە كارە شانۆییەكانمان دەرگای هۆلم كردەوە كارەبا نیە ، گەرما هەر وازی لێبینە، پەنجەرەمان كردەوە بۆ ئەوەی كەمێك رووناك بێت چاومان دەق و یەكتر ببینێ، كورسی تۆزاوی . بەهەرشێوەیەك بێت قەناعەتمان بەخۆمان كرد !! كاك دیار عومەری شانۆكار لەولاتی سوێد تەلەفۆنی كرد و كامێرای كردەوە ئەویش لە هۆڵا بوو مەشقی دەكرد . تەماشامان كرد ئەو لە چ هۆلێك مەشق دەكات ئێمە لەچ هۆڵێك ؟!؟! دوای تەلەفونەكە كەس تاقەتی نەما گوتمان با ئەمڕۆ بەس بێت و رۆشتینەوە ماڵ.