ئەمە بڵاوبكەوە
FaceBook  Twitter  

لە كۆڵانێك جێماوم نە بارانی لێ دەدا نەهەتاو

ڕەنگێكیان جێهشتووە لەشەودا نایەتەوە

 تینوویە وەك كۆڵان

لە دەستەكانیدا درووشمی مەرگی هەڵگرتووە

لە چاوەكانیدا وەك پێكەنینی دۆزەخ تیرهاوێژە

شەوانە دەمەوێ  دەربچم

دەمەوێ بۆنی هەتاو لە مانگ وەربگرم و ڕێككەوم لەگەڵ  تاریكی

لەكۆڵانێك كەوتووم دەردی ئەو گوڵانە دەخوێنم سەرخۆشن

وێنەكانی دووركەوتنەوە دەكێشم

جەوری خەنەبەندانەكان دەنووسم

عاشقی ژنێكی قەرەجم

دەستەكانی كۆڵان ماچ دەكەم

بەرگی كۆڵان لەبەردەكەم

ژوانی كۆڵان دەڕێژم

خۆم لە ماچی تاریكی هەڵدەسووم

لەوەتەی هەم كفنی خۆم بەكۆڵەوەیە

گۆرانی شەیتانی بوون  گەورە دەكەم

باڵای لە باڵای كۆڵان دەدەم

جگە لە پەنجەیەكی خۆم نەفرەت لە هیچی دی ناكەم

بەو پەنجەیەم مەرگی خۆم نووسیوەتەوە

شێتبوونی دەریاكانم هێناوەتە ناوڕوح

بەهەمووشتێك تووڕە دەبم

لەگەڵ سێبەری  تەور شەڕدەكەم

لەگەڵ  ژەهری جووتبوون شەڕدەكەم

لەگەڵ خەنی بوونی تاڤگەكان شەڕ دەكەم

ئەو كۆڵانەی ئێمە نەگریانی هەیە نە چۆپی

نە شیعری لێدەخوێندرێتەوە نەگۆرانی

نە نوێژی لێدەكرێ نەسەما

نە نادی لێیە نەمزگەوت

لێرە پێچەوانەی ویستی خودا بەڕۆژوون

پێچەوانەی شەیتانەكان نوێژی ئیستیخارە دەكەن

پێچەوانەی سروشت پرچی خۆیان دەڕننەوە

لەو كۆڵانە بەدڵ پێمخۆشە بگریم ناهێڵن

بەدڵ پێمخۆشە  هاواربكەم ناهێڵن

بەدڵ پێمخۆشە  كەعبەیەكی لێدروست بكەم و لەسوجدەی خودا گیانم دەرچی ناهێڵن

دەمێكە لەو دونیایە وەڕەس بووم

ڕەنگە بادامی كەونەساڵێك سەرخۆشم بكا

ڕەنگە چریكەی شەڕابەكەی مەغۆل گێژم بكا

ئەوەتا لەو كۆڵانە كەوتووم

یەك یەك مەرگی سپی فریشتەكان دەبینم