ئەمە بڵاوبكەوە
FaceBook  Twitter  

 

 

شیڤان شێرزاد

بەڕێوەبەرایەتی گشتی ڕۆشنبیری و هونەری تورکمان، لە ڕێوڕەسمێکی شایستەدا بە ئامادەبوونی ژمارەیەکی بەرچاو لە ئەدیب و نووسەر و مێژوونووس و هونەرمەندان، قەڵغانی ڕێزلێنانی بەخشیە دەستەیەک لەو کەسایەتیە ناسراوەکانی هەولێر، کە ژیانی خۆی پێشکەش بە هونەر و کلتوور و ئەدەبی تورکمانی کردووە.

لە ڕێوڕەسمەکەدا (گەیلان ئاڵتی بەرماغ) بەڕێوەبەری گشتی ڕۆشنبیری و هونەری تورکمان سەبارەت بە ڕێزگرتن لە کۆشش و تەمەنی پڕ لە بەخششی ئەو کەسایەتیە هونەریی و مێژوونووسانە وتارێکی پێشکەش کرد و تێیدا ئاماژەی بۆ ڕۆڵی بەرچاوی ئەوانە کرد، کە نزیکەی نیوسەدەیە خزمەت بە هونەر و کلتووری کوردی و تورکمانی دەکەن و تا بە ئەمڕۆش دەگات لە خزمەت و وشە و ئاواز و گۆرانی و موزیکی شیرینی تورکمانی دا بەردەوامن، هەر بۆیە وەک وەزارەتی ڕۆشنبیری و لاوانی حکوومەتی هەرێمی کوردستان و بەڕێوەبەرایەتیە گشتیەکەمان، ئەم ڕێوڕەسمەمان سازکرد، کە بتوانین ڕێز لە قەڵەم و هونەری جوان و ڕەسەنیان بنێین.

هاوکات گوتیشی: هەمیشە ئامادەین لە خزمەت ئەو هونەرمەندانە بین، کە بە پڕۆژە جوانەکانیان دەیانەوێ سیمای هەولێری پایتەخت جوانتر بکەن و خزمەتێکی دیکە پێشکەش بە ڕەوتی ئەدەبی و کلتووری گەلەکەمان بکەن.