ئەمە بڵاوبكەوە
FaceBook  Twitter  

ئەو سێبەرە لە کوێ هەڵخەم ؟!

خەریکە ئێمەش ،

گۆزەکانمان پڕ دەبن لە تاریکـــی .

فێرنەبووین ،

ئاوڕ لە سێبەری هەتاوێک بدەینەوە !

خەریکە ئێمەش ،

وەڕەس دەبین لە ڕەنگکـردنـی سپێدەو

لەبەتاڵکردنەوەی نوشتەکانی ئیمان و

پڕکردنــی مەرکانەکانی دووری !!

فێرنەبووین ،

لە خۆڵەمێشی خەزان ،

کتێبێکـی لێ پڕ کەیــن و

چڵێک لە مۆسیقا لە ئەگریجەی باران دەین !

فێرنەبووین ،

بۆنی بڵێسەکانی ،

لەسەربانی ؛ بـا ؛ هەڵنەخەیــن !

لەوانەیە پایز بێت و پێڕانەگەین

لەدیواری کەنەفتی ؛ بــا ؛ بنوسـیــن

خەتای پەنجەکانی قەدەربوو

خۆڵی کردە چاوی هەتاو !!

ئاخر چیبکەم !

تۆ لەپەڕینەوەی هەناسەکانی من

لە ماریفەتی ئێوارەیەکی ئاڵ و

بەسەر پەرژینە کەسکەکانی شیعر ڕانەهاتــی !

پێم گوتـی :

ڕۆژێک دەبێ

باشووری ئەو ڕوبارەم

پڕ دەکەی لە نهەنگــی حاشات

بەردی ئەو دنیایە دەگریە شوشەی پیاوەتیم !

هەرخۆم زانیم !

ڕۆژێک دەبمە شیعرو ،

لە هاوینــی ئاگرێک بەردەبم !

زانیم ڕۆژێک ،

وەک گۆرانی لەسەر بەردە لووسەکانی ڕوبار شین دەچمەوەو

بۆ ئەبەد وەک ( ئــاو )دەربەدەر دەبم !!