ئەمە بڵاوبكەوە
FaceBook  Twitter  

دەنگی ترازانی تیلەی چاوێکم گوێ لێبوو

هەرێمی دڵنەوایی نقووم بوو

چیرۆکی بارانێکی پێنووسی

هیچ ترپەیەک نەبوو نەبێ مۆسیقا

سەرم خستۆتە سەر خوێندنەوەی خەیاڵەکانت

لە ڕۆخی گریان

جەمبوونی هەرایەک دەبینم وەک ڕووناکی

شکانی سوپایەک بێرە دادێ

ڕەنگی تای گەرمی پەرتووکەکانی ساڵ دەبینم

قەمبووری وەڕسبوون

وەرزەکان ژێکانی بەربوونەوە

تەوری تاریکەکان بە نیگای تەرمێک پێدەکەنێ

لە گەواڵەی چیمەن دەترسێ

گەر دەنگم گەیشتبایە عەڕشی عەزیم

دەمگوت ئەو كۆد و تەڵیسمانە دوور بخەوە لێم

دەمگوت هاواری من هی ئەوە نییە بە زەنگیانەی خەونێكەوە هەڵبواسرێ

دەمگوت دەمەوێ لەو بەند و سایەقەی مرۆڤ دەرم بكەی

دەمگوت ڕەچەڵەكی ئەو حەشیمەتە بكەوە بە ئاو

چی بكەم دەنگم ناگا بە یەكەم بارانی ئیلاهی

پێی بڵێم

چ كارەساتێكە سەوزبوونی من

چ ئاماژەیەكی ترسناكە عاشق بوون

جگە لە هەڵوەدابوون و سووتاندنی نامەكانی ژوان بەشتێكیدی ڕاناگەم

جێگەی دڵی من بكەوە تا خەریكی تەواوكردنی خۆم بم

تا گوارەی تەوبەكردنی تاهەتایم قسە نەكا

ئەو ڕۆژەی كە بەو هەموو ماندووبوونەوە دەستت لەدروستكردنی دونیا هەڵگرت

لەبەر تاقیگەی بووڕوغێكی تیژدا سەرم قرتا

لە ژێر كەوشی پێستی جانەوەرێكی عیفریتدا

دڵم لەرزی

كەس نەیتوانی

دەنگی تەقینەوەی كانییەكان بكا بەئایەت

لە دەنگی ترازانی تیلەی چاوێكدا

قەرەبرووتی ئەو عالەمەم بینی نەدەزانن قسە بكەن

نەدەزانن چیرۆكی جووتبوونی خۆیان بگێڕنەوە

گەر دەنگم گەیشتبایە عەڕشی عەزیم

بڕەك دەخەوتم و چەهچەهەی بولبوول و سەركەوتنی پێغەمبەرەكانم لەبەر دەكرد

قووڕمیشی چركەكانی ئاوسبوونی زەویم دوا دەدەخست و نزام دەكرد خودایە ئەو مێرووستانەی مرۆڤایەتی جگە لە وێرانبوون

جگە لە جەنگی تارماییەكان

جگە لەبوونەوەرێكی سەیر

جگە لەگۆشتخۆرێكی ترسناك

جگە لە تووڕەبوونێكی ناشیرین

جگە لە وێرانكردنی تەختی تۆ

چ میراتێكی دیكەی تێدایە

بمانبەوە بۆ پاسیڤ

بۆ تاڵتاڵووكەی گەڕەلاوژێكانی سەرگەردانی

ئێمە جگە لە تاریكییەكی تاریك سەمبوولی شتێكی دی نین

....

بەكر ئاڵەیی

29/7/2022