ئەمە بڵاوبكەوە
FaceBook  Twitter  

منارەی مەعبەد بیری عرووبەی نەپۆشیبوو

پەتای توندئاژۆیی هۆشی جەوانی کوردی نەدۆشی بوو

ناوی کچەکانمان مەستورە و خانزادو چرۆ بوو

ئێمە ڕۆڵەی مێدبووین، خەلافەت ئەفسانە و قەعقاع درۆبوو

ڕێبازمان شیعری ئەی ڕەقیب و

ئایینمان ئیشق و مرۆ بوو

لەبیرم دێ

دایکمان حەفسەخانی نەقیب و سینەم جەلادەت بەدرخان بوو

ئایەت و سورەتەکانمان شەنگال و پێکەوەژیان بوو

ئاتەشگامان سمبولی عیشق و ئەدرەسی ڤیان بوو

لەبیرم دێ

دەستێکمان جیلوە و مەسحەفا ڕەش و ئەوەیترمان زەندو ئاڤێستابوو

کەی کورد بێگانە پەرستێکی چەشنی ئێستابوو

لەبیرم دێ

ئێمە ئاستیاگ و دیاکۆو کەیخەسرەو یەزدە کورد بووین

سمکۆ و قازی و شێخ ڕەزای دەرسیمی و لەخۆ نەبورد بووین

لەبیرم دێ

مەلاکانمان موتەنەویر، بیرمەندو ڕۆشنبیربوون

لە مرۆڤ دۆستی و شیعر و ئەدەب

لە لوتکەدابوون، چرای ژیربوون

لەبیرم دێ

تەکێکانمان ماڵی ئەوین بوون

برابوون هەرچی دیندار و بێ دین بوون

لەبیرم دێ

خانەقای مودەڕیس و حوجرەی نالی

له شیعرو فەلسەفە و ماریفەت ڕێبەربوون

میحرابی مەحەبەت و مەنزڵگای ئارامی و قوتابخانەی هونەربوون

لەبیرم دێ

مەڵای گەورە، هێمای پلۆڕالیزم و ئایکۆنی جوانی بوو

ئەو حەزرەتی موحەمەد، ئەشۆ زەردەشت، بودا، موسا، عیساو مەزدەک و مانی بوو