ئەمە بڵاوبكەوە
FaceBook  Twitter  

ئەمجارەیان

پێنوسەکەم دەدەم بە تۆ

چەند پەیڤێکی پێبنووسی

تا بزانم تۆش وەک ژنێک

بە ئازاری عەشق ئاشنا دەبی

ئەمجارەیان

کە خەوتم خەیاڵی ژوانێ

دەکەم

تا بزانم وەکوو جاران

ئاوێزانی بەژنم دەبی

ئەمجارەیان

کە دێرێکم هۆنیەوە

دەتکەم بە ناونیشانی شعرێک

تا بزانم وشەکانم سۆزی دڵت

دەجولێنی

ئەمجارەیان

کە شووشەی بادەم لارکردەوە

لە کاسەی لێوم پێکەکەت پڕکە

تابزانم گەر مەستیشبی

ماچێکم لێ دەسێنی

ئەمجارەیان

کە کەزیەکانم خاوکردەوە

گوڵە نێرگز ناکەم بە قردێڵە

تا بزانم پەنجەکانت

لە قژما دەئالێنی

ئەمجارەیان

کە شەو هاتەوە

من نیگابانی هەنگاوت دەبم

تا بزانم سێوەکانم

لە نێو دەستەکانی خۆت

دەنوێنی