ئەمە بڵاوبكەوە
FaceBook  Twitter  

 

21ی ئەم مانگە دادگای دەستوری تورکیا رایگەیاند، دۆسیەی داخستنی پارتی دیموکراتی گەلان (هەدەپە)ی وەرگرتوەو  پێداچونەوە بەدۆسییەکەدا دەکەن، بەگوێرەی بڕیارەکەش هەدەپە ماوەی 60 رۆژی لەبەردەم دایە بۆ ئەوەی داکۆکی لەخۆی بکات و بەڵگەکانی پێشکەش بکات.

میتحەت سانجار، هاوسەرۆکی پارتی دیموکراتی گەلان (هەدەپە) رایگەیاند، دادگای دەستوری تورکیا بە وەرگرتنی دۆسیەی داخستنی پارتەکەیان "هەڵەیەکی مێژویی" کردوە، لەم پرسەشدا هیچ پارتێکی ئۆپۆزیسیۆن پشتگیری بۆ داخستنی هەدەپە پیشان نەداوە.

میتحەت سانجار بە رۆژنامەنوسانی راگەیاندوە،  دادگای دەستوری "هەڵەیەکی مێژویی" کردوە و لەم کاتەدا پارتەکەیان نزیکەی 12٪ی دەنگدەرانی باکوری کوردستان و تورکیا پێکدەهێنن.

باسی لەوەشکردوە، "رێگە بە داخستنی هەدەپە نادەین. هێزی گەورەترکردنی هەدەپە و درێژەدان بەم رێبازەمان هەیە. ئەگەر دادگەی دەستوری لە کۆتایی ئەم پرۆسەیەدا بڕیاری داخستنی هەدەپە بدات، ئەوان نیشانیدەدەن کە ملکەچی کارتەکانی فشار، هەڕەشە و پلانە تێکدەرەکان بون".