ئەمە بڵاوبكەوە
FaceBook  Twitter  

 

نرخی نه‌وت له‌بازاره‌كانی وزه‌ له‌جیهاندا ئه‌مڕۆ سێشه‌ممه‌، جارێكی دیكه‌ به‌رزبونه‌وه‌ی به‌خۆوه‌ بینی و رێژه‌یی پێوانه‌یی تۆماركرد به‌جۆرێك له‌ماوه‌ی حه‌وت ساڵی رابردودا به‌و شێوه‌یه‌ به‌رز نه‌بوه‌ته‌وه‌ و نرخی هه‌ر به‌رمیلێك گه‌یشته‌ 83.86 دۆلار.

ئاژانسی رۆیته‌رز بڵاویكرده‌وه‌، به‌هۆی بونی مه‌رجی پێشوه‌ختی وڵاتانی به‌رهه‌مهێنه‌ری نه‌وت "ئۆپێك" و زیادبونی خواست له‌سه‌ر نه‌وت كه‌ هاوكاته‌ له‌گه‌ڵ بوژانه‌وه‌ی دامه‌زراوه‌ پیشه‌سازییه‌كان، ئه‌مڕۆ سێشه‌ممه‌ به‌های نه‌وت له‌بازاره‌كانی وزه‌ له‌جیهاندا گه‌یشته‌ به‌رزترین ئاست و نرخی هه‌ر به‌رمیلێك نه‌وتی برێنت  به‌رێژه‌ی 0.25% به‌رزبوه‌وه‌ و به‌ 83.86 دۆلار مامه‌ڵه‌ی پێوه‌كرا.

هه‌ر به‌گوێره‌ی ئاژانسه‌كه‌، نرخی نه‌وتی جۆری ته‌كساسیش به‌رێژه‌ی 0.21% به‌رزبونه‌وه‌ی به‌خۆوه‌ بینی و گه‌یشته‌ 80.69 دۆلار.

به‌رزبونه‌وه‌ی به‌های نه‌وت هاوكاته‌ له‌گه‌ڵ ئاسایی بونه‌وه‌ی ژیان له‌زۆرێك له‌وڵاتان و كرانه‌وه‌ی سه‌رجه‌م ناوچه‌ گه‌شتیاری و كارگه‌ و دامه‌زراوه‌ پیشه‌سازییه‌كان كه‌ به‌تێكرا خواستیان له‌سه‌ر نه‌وت زیادكردوه‌، به‌جۆرێك ماوه‌ی نزیكه‌ی دو مانگه‌ به‌های نه‌وت به‌به‌رده‌وامی به‌رزده‌بێته‌وه‌.

لای خۆیه‌وه‌ كارۆلین باین، راوێژكاری ئابوری له‌دامه‌زراوه‌ی ئیكۆنومیكس رایگه‌یاند، پێشبیی ده‌كه‌ن تا كۆتایی ئه‌مساڵ خواست له‌سه‌ر نه‌وت زیاتربێت و ده‌گاته‌ به‌رزترین ئاست، به‌ڵام له‌سه‌ره‌تای ساڵی 2022ه‌وه‌ جارێكی دیكه‌ خواست له‌سه‌ر ئه‌و وزه‌یه‌ رو له‌دابه‌زین ده‌كات.

په‌یوه‌ست به‌م بابه‌ته‌ش دامه‌زراوه‌ی Bank of America له‌دواین راپۆرتی خۆیدا رایگه‌یاندوه‌، له‌و باوه‌ڕه‌دان سه‌ره‌ڕای ناجێگری نرخی نه‌وت، به‌ڵام هه‌نگاوه‌كانی ئۆپیك و بوژانه‌وه‌ی بازاره‌كانی جیهان، له‌سه‌ره‌تای ساڵی داهاتودا به‌های هه‌ر به‌رمیلێك نه‌وتی برێنت بۆ 100 دۆلار به‌رز ده‌كه‌نه‌وه‌.