ئەمە بڵاوبكەوە
FaceBook  Twitter  

ناوەندی چاپەمەنی و راگەیاندنی هێزەکانی پاراستنی گەل (هەپەگە)، کە باڵی سەربازیی پارتی کرێکارانی کوردستانە، بڵاویکردەوە، لە 24 کاتژمێری رابردوودا گەریلا لە هەرێمەکانی زاپ و ئاڤاشین شەش سەربازی تورکیایان کوشتووە.

بەگوێرەی راگەیەندراوێکی ناوەندی چاپەمەنی و راگەیاندنی هێزەکانی پاراستنی گەل (هەپەگە)؛ گەریلاکانی پەکەکە لە هەرێمی زاپ هێرشیان کردووەتە سەر هێزەکانی سوپای تورکیا و بەو هۆیەوە چوار سەرباز کوژران و لە رێگەی بەکارهێنانی چەکی قورسیش لە ناوچەی ئاڤاشین، دوو سەربازی دیکە کوژران و سێ سەربازیش برینداربوون.

لای خۆشیەوە ئەمڕۆ یەکشەممە 22ی ئایاری 2022، وەزارەتی بەرگریی تورکیا، گیانلەدەستدانی سێ گەریلای لە ئەنجامی تۆپبارانکردنی پێگەیەکی گەریلاکانی پەکەکە لە ناوچەی زاپ بڵاوکردەوە و رایگەیاند، لە رێگەی فڕۆکە بێفڕۆکەوانە چاودێرییەکانیانەوە جموجۆڵی گەریلایان دەستنیشانکرد و تۆپخانەکانیش، گەریلاکانیان کردە ئامانج.

بەرەبەیانیی رۆژی 18ـی نیسانی 2022، ئۆپەراسیۆنی چنگ - قوفڵ لەلایەن سوپای تورکیا لە ناوچەکانی ئاڤاشین، مەتین و زاپ لە خاکی هەرێمی کوردستان لە دژی پەکەکە دەستیپێکرد.

وەزارەتی بەرگریی تورکیا گیانلەدەستدانی 95 گەریلا و کوژرانی 13 سەربازی سوپای وڵاتەکەی راگەیاندووە. لە بەرامبەردا هەپەگە کوژرانی 469 سەربازی تورکیا و گیان لەدەستدانی 28 گەریلا و راگەیاندووە.