لەڕێکەوتی ١٨ی نۆڤەمبەری ٢٠٢٥دا بە ماوەیەک بێدەنگی بۆ ڕێزلێنان لە شەهیدانی حزبمان و گەلەکەمان،کۆمیتەی ناوەندی بە مەبەستی تاوتوکردنی هەڵبژاردنی خولی شەشەمی ئەنجومەنی نوێنەرانی عێراق،کە لە٢٠٢٥/١١/١١ دا ئەنجامدرا،کۆبونەوەی خۆی بەئامادەبوونی هەموو ئەندامانی گرێدا.
کۆمیتەی ناوەندی ڕێزوسوپاسی بۆ هەموو هاوڕێیان، لەکادیرو ئەندامان و دۆستان و بنەماڵەی شەهیدان و تێکۆشەرانی دێرین و ئەو لایەنە سیاسی وڕێکخراوانە تۆمارکرد کە بەدەنگ داوای حزبمانەوە هاتن و پشتیوانیان بۆ کاندیدای پشتیوانیلێکراوی حزبمانیان کرد.
ئەگەرچی نوێنەری پشتیوانیلێکراومان سەرکەوتنی بەدەست نەهێنا،لەئەنجامی بەکارهێنانی دەنگی هێزە چەکدارەکان لە دەنگدانی تایبەتدا، بەڵام کاری دەستەجەمعی هاوڕێیان و دۆستانمان، ئەزموونێکی نوێی بۆ حزبمان دروستکرد، کە ئێمە لەزیاتر ڕێکخستنەوەی کارەکانمان، هیوای سەرکەوتن و بەرەوپێشبردنی زیاترمان بۆ دروستدەکات.
هەڵبژاردن بۆ ئێمە لە دۆخێکی سەختدابوو، بەهۆی یاسای ناڕەوای هەڵبژاردن و کارەکانی کۆمسیۆن کە بەشێوەیەک بوو لەخزمەت ژمارەیەک لە قەوارەسیاسیەکان و تۆمارکردنی ژمارەیەکی یەکجار زۆری نوێنەری قەوارەکان بۆ بەرژەوەندی ئەو لایەنانە.
جێبەجێنەکردنی یاسای حزبە سیاسیەکان ودیاردە ناشیرینەکانی تری بەردەم هەڵبژاردنێکی ئازادو دیموکراسییانە، لەم خولەدا برەوی پێدرا.
خستنە خزمەتی دامەزراوەکانی دەوڵەت بە دارایی و کەس و دەزگاوە بۆ خزمەتی حزبە دەستڕۆیشتووەکانی نێو حکومەت، ودیاریکردنی کاندید لەسەر بنەمای ئینتیما بۆ خێڵ ، برەودانەوەیە بەسیستمی خێڵایەتی ،کە بووە هۆکاری دروستکرنی ململانێی نێو عەشیرەتەکان ومەترسی لەسەر ئاشتی کۆمەڵایەتی دروست کردووە. هەندێک لایەنی تر لە بانگەشەدا ئاینی وەک کەرەستەی ڕیکلام بەکار دەهێنا.
لایەنێکی تری زەق و ناشیرینی دەسەڵاتداران ،سوود وەرگرتن بوو لە خراپی ژیان و گوزەرانی هاووڵاتیان و بەئەنقەست دواخستنی مافە دارایی و ئابورییەکانیان،لەموچە و گرانی وهەژاری بۆ کڕینی دەنگەکانیان بە نزمترین نرخ، کە ئەمکارە شکاندنی شکۆی هاووڵاتیە،و پێویستە ڕێگری لێبکرێت و شەرمەزار بکرێت.
لایەنێکی تری خراپی ئەم هەڵبژاردنە ڕێک نەکەوتنی کوردستانیان بوو لەناوچە کوردستانییەکانی دەرەوەی هەرێم، لەوبارەیەوە حزبمان لە (کۆمیتەی ناوەندی مەڵبەندەکانی ئەوناوچانە) هەوڵی زۆریاندا بۆ ئەو یەک لیستییە ، ئۆباڵی ئەم پەرتەوازییە دەرەئەنجامی ناکۆکییەکانی هەردوو حزبی (پارتی و یەکێتی)یە،کە لە بەردەوامی ململانێکانییان، لەناوخۆی هەرێم و دواخستنی کاری پەرلەمان وپێکنەهێنانی کابینەی نوێی حکومەت، ئاوی کردە ئاشی پەرتەوازەیی و لەدەستدانی ژمارەیەکی زۆر لە(دەنگ وکورسی) کوردستانیان، کەکاریگەری دەبێت لە نێوخۆی کارو بەرهەمی کوردستانی لەنێو ئەنجومەنی نوێنەرانی عێراقدا.
لەبەر ڕۆشنایی ،ئەوهەڵسەنگاندن لێکدانەوەیەی سەرەوە کۆمیتەی ناوەندی پێداگیری لەسەر ئەم خاڵانەی خوارەوە دەکاتەوە:
+ بەپێویست زانرا کەلە نێو خۆی حزبدا ولە
،هەموو لیژنە حزبییەکاندا، هەڵسەنگاندن بۆ کارو چالاکی و ئەرکەکەنیان بکەن،لە هەموو لایەنەکانییەوە،ڕێز لەهاوڕێیانی چالاک بگرن و لێپرسینەوە لە کەمتەرخەمەکان بکەن.
+ تایبەتمەندی هەڵبژاردن ئامادەکاری پێویست بۆ کۆنفرانسێکی تایبەت،بە هەڵبژاردن و ئامادەکاری داڕشتنی پلانی داهاتوو بکات.
+پاش تێپەڕبوونی زیاتر لە ساڵێک بەسەر هەڵبژاردنی پەرلەمانی کوردستاندا، داواکارە لە حزبەکانی کوردستان،کە خاوەن کورسی پەرلەمانی کوردستانن، یان ڕێکەون بۆ ئەنجامدانی کۆبونەوەی پەرلەمان و دەرئەنجامەکانی بەرەو پێکهێنانی کابینەی نوێ،لەکاتی دواکەوتن لەم ئەرکە، کاربۆ هەڵبژاردنی پێش وەختەی پەرلەمانی کوردستان بکرێت.
+ داواکارین نوێنەرە هەڵبژێرراوەکانی عێراق، سەرەڕای نوێنەرایەتیان بۆ پارتەکانیان، بە ئەرکە نیشتمانی و نەتەوەییەکانیان هەڵسن،لەڕووی مافەدەستوورییەکانی هاووڵاتیان و مادە فەرامۆشکراوەکانی دەستورو هەموارکردنەوەی یاسای هەڵبژاردن وپێکهێنانی ئەنجومەنی ئیتحادی،و یاسای بوجە و یاسای نەوت وگاز....تاد.
+کۆبونەوە داکۆکی لەمافی پێکهاتەکان دەکات،وبەپێویستی دەزانێت کاربکرێت، بۆ داڕشتنەوەی یاسای تایبەت بۆ هەڵبژاردنی نوێنەرانی کۆتاکان بەهەموارکردنەوەی یاساکەو ڕێکخستنەوەی لیستی دەنگدەری پێکهاتەکان و ناوەندەکانی دەنگدانیان بۆ هەڵبژاردنەکانی عێراق و هەرێم، تا بەشێوەیەکی ڕاستەقینە نوێنەری دڵخوازی خۆیان هەڵبژێرن.
کۆمیتەی ناوەندی هەڵبژاردن و بەشداری لە دامەزراوەکانی یاسادانان و حکومەت، بەیەکێک لەشێوازەکانی تێکۆشان دەزانێت،و لەبەردەوامی خەبات لە نێو خەڵک و بەتەنگەوەهاتنی داخوازییەکانیان و ژیانی ڕۆژانەیان و بەتایبەت چینە هەژارو زەحمەتکێشەکان بە ئەرکی لە پێشینەی خۆی دادەنێت، وسووربوونی خۆی لەسەر داکۆکی لەماف و ئازادییەکانی هاووڵاتیان و بەدیهێنانی ئامانجەکانیان سوور دەبێت.
لەتەوەرێکی تری کۆبونەوەکەدا،کۆمیتەی ناوەندی بەدواداچوونی کرد، بۆ ژمارەیەک لە ئەرکە ڕێکخراوەییەکان و بڕیاری پیویستیان لەبارەوە وەرگیرا.
